AGALATIA 5
5
1Nĩ kuohora Kristo aatuohorire nĩguo tũikarage tũtarĩ ngombo: nĩ ũndũ wa ũguo, ta wĩhandei wega, na tigai gũgacoka kuohwo rĩngĩ, ta arĩ icoki rĩa ũkombo muohereirũo ngingo.
2Rĩu-rĩ, niĩ Paulo ngũmwĩra atĩrĩ, atĩ mũngĩĩtĩkĩra kũruithio-rĩ, Kristo ndarĩ ũndũ angĩmũguna naguo o na atĩa. 3Na rĩrĩ, ngũmenyithia o rĩngĩ mũndũ o wothe ũrĩa ũgwĩtĩkĩra kũruithio, atĩ nĩ thirĩ arĩ naguo wa kũhingia watho wothe.
4Inyuĩ mwendaga gũtuwo athingu na ũndũ wa watho-rĩ, nĩmũtigithanĩtio na Kristo; nĩ kũgũa mũgũĩte mũgagĩtigana na Wega wa Ngai. 5Amu ithuĩ-rĩ, nĩ tondũ wa ũrĩa twĩ na Roho, tũtanyaga, o twĩtĩkĩtie, kũheo ũthingu ũrĩa tũtũire tũwĩrĩgĩrĩire. 6Nĩ ũndũ-rĩ, thĩinĩ wa Kristo Jesu ũhoro wa kũrua ndũrĩ kĩguni, o na kana wa kwaga kũrua; ũndũ ũrĩa wĩ kĩguni-rĩ, no wĩtĩkio ũrĩa ũrutaga wĩra waguo na njĩra ya wendani.
7Nĩmũrathiaga na mĩthiĩre mĩega; kaĩ mũgĩcokete kũgirio gwathĩka nĩ ũhoro-wa-ma nũ? 8Kũhatĩrĩrio kũu mũhatagĩrĩrio nakuo-rĩ, gũtiumĩte kũrĩ Ũrĩa wamwĩtire. 9#1 Kor 5.6.Ndawa ya kũimbia mũgate ĩtarĩ nyingĩ nĩĩtũmaga kĩmere gĩothe kĩimbe. 10Niĩ-rĩ, ha ũhoro wanyu ngwĩhoka mũno, ndĩ thĩinĩ wa Mwathani, atĩ mũtingĩgarũrũka ngoro mũgĩe na meciria mangĩ: nake mũndũ ũrĩa ũmũnyariraga, o na angĩkorũo nĩ ũrĩkũ, ndakehũkĩra ituĩro rĩrĩa agatuĩrũo. 11Ĩndĩ niĩ-rĩ, ariũ a Ithe witũ, ingĩkorũo ndũire ’hunjagia ũhoro wa kũrua-rĩ, ngĩtũire ’nyariragĩrũo kĩ? Kũngĩkorũo nĩ ũguo-rĩ, ũndũ ũrĩa ũhĩngithanagia, nĩguo ũhoro wa mũtharaba, nĩ mũthengu! 12Ndenda kaba andũ acio mamũnyariraga maambe metemenge o ene.
13Amu inyuĩ, ariũ a Ithe witũ-rĩ, nĩmwetirũo mũtuĩke andũ matarĩ ngombo; no rĩrĩ, wĩmenyererei atĩ ũhoro ũcio wa kuohorũo ũkombo-inĩ ndũgatuĩke wa gũtũma mũrũmagĩrĩre merirĩria ma mwĩrĩ; nĩ kaba o mũndũ wanyu atungatagĩre ũrĩa ũngĩ nĩ ũndũ wa kwendana. 14#Alaw 19.18.Tondũ-rĩ, ũhoro wothe wa watho nĩũhingĩtio na kiugo kĩmwe, nakĩo nĩ gĩkĩ, atĩrĩ, Enda mũndũ ũrĩa ũngĩ o ta ũrĩa wĩendete wee mwene. 15Ĩndĩ mũngĩrũmana mũkĩrĩanaga-rĩ, wĩmenyererei mũtikananinane inyuĩ ene. 16Na ningĩ nguuga atĩrĩ, thiagai mũtongoretio nĩ Roho, na mũtigeka maũndũ marĩa meriragĩrio nĩ mwĩrĩ. 17#Rom 7.15-23.Nĩ ũndũ mwĩrĩ nĩwĩriragĩria maũndũ marĩa matangĩendwo nĩ Roho; nake Roho akenda maũndũ marĩa matangĩendwo nĩ mwĩrĩ; nĩ ũndũ maũndũ macio merĩ nĩmahĩtanĩtie; na nĩkĩo mũtahotaga gwĩka ũrĩa mwĩendeire inyuĩ ene. 18No akorũo mũtongoragio nĩ Roho, mũtiathagwo nĩ watho. 19Na rĩrĩ, maũndũ ma kĩĩmwĩrĩ marĩa mekagwo nĩmoĩo o wega, namo nĩ maya: ũmaraya,#5.19 Ũmaraya: rora kohoro kaandĩkĩtwo Mar 7.21. na merirĩria mathũku, na ũũra-thoni, 20na kũhoya mĩhianano, na kũrogana, na ũthũ, na kũũgitana, na ũiru, na marakara, na ngarari, na kwamũkana, na morutani mahĩtanu, 21ningĩ gũcumĩkĩra, na kũrĩwo, na maruga marĩa mainagĩrũo nyĩmbo itaagĩrĩire, o na maũndũ mangĩ ta macio: naho ha ũhoro wamo-rĩ, ngũmwĩra na ma, o ta ũrĩa ndamwĩrire na ma rĩa mbere, atĩ andũ arĩa mekaga maũndũ ta macio, matikagaĩrũo ũthamaki wa Ngai. 22No maciaro ma Roho nĩmo maya, nĩ wendani, na gĩkeno, na thayũ, na gũkirĩrĩria, na gũtugana, na gwĩkana wega, na kwĩhokeka, 23na kũhorera, na kwĩgirĩrĩria merirĩria ma mwĩrĩ: macio-rĩ, gũtirĩ watho wa kũgiria mekagwo. 24Nao andũ arĩa a Kristo Jesu nĩmarĩkĩtie kwamba mĩĩrĩ yao mũtĩ igũrũ hamwe na thuti ciayo o na merirĩria mayo.
25Tũngĩkorũo tũtũire muoyo nĩ ũndũ wa Roho, nĩtũthiage o tũtongoretio nĩ Roho mĩthiĩre-inĩ iitũ. 26Nĩtũtigage kwĩĩkĩrĩra, tũkĩũgitanaga na tũkĩiguanagĩra ũiru.
Currently Selected:
AGALATIA 5: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
