EZEKIELI 46
46
1Ningĩ Mwathani Jehova oigĩte ũũ: Kĩhingo kĩa nja ya na thĩinĩ kĩrĩa kĩrorete irathĩro-rĩ, kĩrĩikaraga kĩhingĩtwo mĩthenya ĩrĩa ĩtandatũ ya wĩra; no nĩkĩrĩhingũragwo mũthenya wa mũgwanja, o na kĩhingũragwo karũgamo-inĩ ka mweri. 2Nake mũnene arĩtonyaga kuo na njĩra ya gĩthaku-inĩ gĩa kĩhingo kĩrĩa kĩa na nja, na arũgame gĩtingĩ-inĩ gĩa kĩhingo-inĩ kĩu kĩa na thĩinĩ, nao athĩnjĩri-Ngai marute ihaki rĩake rĩa njino, o na magongona make ma ũiguano, nake ainamĩrĩre o hau hingĩro-inĩ ya mũrango ahoere ho; na thutha wa ũguo acoke oime; no kĩhingo kĩu gĩtikahingwo nginya o hwaĩ-inĩ wa mũthenya ũcio. 3Nao andũ a bũrũri ũcio marĩinamagĩrĩra mahoere o hau mũromo-inĩ wa kĩhingo kĩu marĩ mbere ya Jehova mĩthenya ya thabatũ, o na tũrũgamo-inĩ twa mĩeri. 4Narĩo ihaki rĩa njino rĩrĩa mũnene arĩrutagĩra Jehova, rĩkarutwo mũthenya wa thabatũ tũtũrũme tũtandatũ tũtarĩ na kaũũgũ, o na ndũrũme ĩtarĩ na kaũũgũ; 5naguo mũtu wa igongona rĩa mũtu ũrutwo eba ĩmwe nĩ ũndũ wa ndũrũme ĩo, naguo ũrutwo nĩ ũndũ wa tũtũrũme tũu o ta ũrĩa angĩhota kũruta, nayo hini ĩmwe ya maguta ĩrutanĩrio na eba o eba ya mũtu. 6Naguo mũthenya ũrĩa mweri warũgama-rĩ, kũrutwo ndegwa njĩthĩ ĩtarĩ na kaũũgũ, na tũtũrũme tũtandatũ, o na ndũrũme ĩmwe; nacio ciothe ikorũo itarĩ na kaũũgũ; 7ningĩ arute igongona rĩa mũtu, arute eba ĩmwe nĩ ũndũ wa ndegwa ĩo, o na eba ĩngĩ ĩmwe nĩ ũndũ wa ndũrũme ĩo, naho ha ũhoro wa tũtũrũme tũu-rĩ, arute o ta ũrĩa angĩhota kũruta, o nayo hini ĩmwe ya maguta ĩrutwo nĩ ũndũ wa eba o eba ya mũtu. 8Na rĩrĩa mũnene egũtonya kuo, nĩagere njĩra ya gĩthaku-inĩ gĩa kĩhingo, nayo njĩra ĩo okĩire, acoke kuuma na nja na njĩra o ro ĩo. 9No rĩrĩ, hĩndĩ ĩrĩa andũ a bũrũri megũthiĩ mbere ya Jehova ciathĩ-inĩ iria njathane-rĩ, mũndũ ũrĩa ũgũtonya nyũmba na njĩra ya kĩhingo kĩa mwena wa gathigathini ahoere kuo-rĩ, akiuma oimĩre njĩra ya kĩhingo kĩa mwena wa gũthini; o nake mũndũ ũrĩa ũgũtonya nyũmba na njĩra ya kĩhingo kĩa mwena wa gũthini, oimĩre njĩra ya kĩhingo kĩa mwena wa gathigathini; ndarĩ hingo angĩcokera njĩra ya kĩhingo kĩrĩa atonyeire; no nĩ gũthiĩ arĩthiaga na mbere arũngĩrĩirie. 10Nake mũnene-rĩ, hĩndĩ ĩrĩa andũ megũtonya, o nake agatonyania nao; na gũkiumwo, makoimania othe hamwe. 11Nacio ciathĩ-inĩ, o na ciathĩ-inĩ iria ituĩtwo-rĩ, mũtu wa igongona rĩa mũtu ũrĩrutagwo eba ĩmwe nĩ ũndũ wa ndegwa ĩmwe, o na eba ĩmwe nĩ ũndũ wa ndũrũme ĩmwe, o naho ha ũhoro wa tũtũrũme tũrĩa tũkũrutwo, arute o ta ũrĩa angĩhota kũruta, nayo hini ĩmwe ya maguta ĩrutwo nĩ ũndũ wa eba o eba ya mũtu. 12Na rĩrĩ, hĩndĩ ĩrĩa mũnene akaruta igongona rĩa indo iria akeyendera kũruta o ro ũguo na ngoro yake, ituĩke ihaki rĩa njino, o na kana magongona ma ũiguano, eyendeire kũrutĩra Jehova o ro ũguo na ngoro yake-rĩ, nĩakahingũrĩrũo kĩhingo kĩu kĩrorete irathĩro, nake arute ihaki rĩu rĩake rĩa njino, o na magongona make ma ũiguano, o ta ũrĩa ahũthĩire gwĩka mũthenya wa thabatũ; nake aamaruta, acoke oime; na thutha wa aarĩkia kuuma, kĩhingo gĩcoke kĩhingwo. 13Nawe nĩũkaruta gatũrũme gatakĩrĩtie mwaka ũmwe gatarĩ na kaũũgũ gatuĩke ihaki rĩa njino rĩa Jehova mũthenya o mũthenya; nawe ũrĩrutage rũcinĩ o rũcinĩ. 14Na ũgakarutanagĩria na igongona rĩa mũtu rũcinĩ o rũcinĩ, naguo mũtu ũcio ũrutwo gĩcunjĩ gĩa gatandatũ kĩa eba ĩmwe, na ũrutanĩrio na gĩcunjĩ gĩa gatatũ kĩa hini ĩmwe ya maguta ma gũkimanio na mũtu ũcio mwega mũhinyu; rĩu nĩrĩo igongona rĩa mũtu rĩa kũrutagĩrũo Jehova hĩndĩ ciothe nĩ ũndũ wa kĩrĩra kĩa watho wa tene na tene. 15Ũguo nĩguo marĩrutaga gatũrũme, o na igongona rĩa mũtu, o na maguta, rũcinĩ o rũcinĩ, rĩtuĩke ihaki rĩa njino rĩa gũtũũra rĩrutagwo hĩndĩ ciothe.
16Ningĩ Mwathani Jehova oigĩte ũũ: Mũnene angĩrathimĩra mũriũ o na ũrĩkũ wa ihĩĩ ciake gĩcunjĩ gĩa gĩthaka gĩake-rĩ, gĩatuĩka igai rĩake; nĩgĩtuĩkĩte kĩa ihĩĩ ciake, tondũ nĩgĩtuĩkĩte gĩacio gĩa kũgayanĩrũo. 17#Alaw 25.10.No rĩrĩ, angĩrathimĩra mũndũ o na ũrĩkũ wa ndungata ciake gĩthaka kiumĩte igai-inĩ rĩake ta arĩ kĩheo amũheete-rĩ, gĩthaka kĩu gĩgaikara kĩrĩ gĩake o nginya mwaka wa kuohoranwo; na hĩndĩ ĩo gĩthaka kĩu gĩcokerere mũnene ũcio; no rĩrĩ, ha ũhoro wa igai rĩu aagaire ihĩĩ ciake-rĩ, rĩgatuĩka rĩa ihĩĩ ciake itũũre narĩo. 18O na ningĩ atĩrĩ, mũnene ndakanatunye andũ igai rĩao na ũndũ wa kũmahinyĩrĩria, no arathimĩre ihĩĩ ciake o igai rĩrĩa we mwene aarathimĩirũo, nĩ getha andũ akwa matikae kũhurunjũka, mũndũ o mũndũ atunyĩtwo igai rĩake rĩrĩa aarathimĩirũo.
19Ningĩ thutha wa ũguo agĩcoka akĩ’hungurĩria itonyero-inĩ rĩa mwena-inĩ wa kĩhingo, akĩnginyia tũnyũmba tũrĩa twamũre twa athĩnjĩri-Ngai, o tũu twarorete mwena wa gathigathini; na atĩrĩrĩ, haarĩ giuco gĩaakĩtwo na hau nyunjurĩ kĩarorete mwena wa ithũĩro. 20Nake akĩnjĩra atĩrĩ, Haha nĩho athĩnjĩri-Ngai makarugagĩra magongona ma mahĩtia, o na magongona ma mehia, na noho magathondekagĩra magongona ma mũtu; nĩ getha matikamarute na kũu nja ĩrĩa ya nyumĩrĩra, matikaamũre andũ namo. 21Hĩndĩ ĩo ningĩ akĩnyumia na nja ĩrĩa ya nyumĩrĩra, akĩ’hĩtũkithĩria mĩena-inĩ ĩrĩa ĩna ya nja ĩo; na atĩrĩrĩ, o koine o koine ka nja ĩo kwarĩ gaca kangĩ. 22Naguo ũguo nĩ ta kuuga atĩ kũu tuune-inĩ tũu tũna, kwarĩ tũca tũirige, natuo twaraihĩte mĩkono mĩrongo ĩna, na tũkaarama mĩkono mĩrongo ĩtatũ; natuo tuothe tũna nĩtwaiganaine ithimĩro. 23Nakuo kũu tũca-inĩ tũu kwarĩ nyũmba ciaakĩtwo mĩhari ĩtũrigicĩirie tuothe tũna na mĩena yothe, ĩgaakwo ciĩkĩrĩtwo handũ ha kũrugĩrũo mĩhari-inĩ ĩo yothe. 24Nake agĩcoka akĩnjĩra atĩrĩ, Ici nĩcio nyũmba cia kũrugagĩrũo, iria irĩrugugĩrũo nyama cia magongona ma andũ nĩ atungati a nyũmba ya Jehova.
Currently Selected:
EZEKIELI 46: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019