EZEKIELI 39

1Atĩrĩrĩ, wee mũrũ wa mũndũ, rathĩra Gogu ũhoro, ũmwĩre atĩrĩ, Mwathani Jehova oigĩte ũũ: Atĩrĩrĩ, wee Gogu, mũnene wa Roshu, na Mesheki, na Tubali, ndĩ wa kũhũrana nawe; 2na nĩ kũhũgũra ngakũhũgũra, njoke ngũtongorie, ndũme uume ituri-inĩ cia mwena wa gathigathini, ngũhire irĩma-inĩ cia Isiraeli; 3njoke ngũthe ũta waku ũkuume guoko gwaku kwa ũmotho, nayo mĩguĩ yaku ndĩmĩgũithie thĩ ĩkuume guoko gwaku kwa ũrĩo. 4Nawe nĩ kũgũa ũkagũa kũu irĩma-inĩ cia Isiraeli, wee mwene, o na itungati ciaku ciothe cia ita, o na ndũrĩrĩ iria igakorũo ii hamwe nawe, njoke ngũneane kũrĩ nyamũ cia rĩera-inĩ iria ngoroku cia mĩthemba yothe, o na harĩ nyamũ cia gĩthaka ũrĩĩke nĩcio. 5Wee-rĩ, ũkagũa baraganya-inĩ, nĩ gũkorũo nĩ niĩ njarĩtie ũhoro ũcio; ũguo nĩguo Mwathani Jehova oigĩte. 6Ningĩ nĩ gũtwarithia ngatwarithĩria Magogu mwaki, o na ndĩũtwarithĩrie andũ arĩa matũũraga megangarĩte o kũu ithama-inĩ, nao nĩmakamenya atĩ niĩ nĩ niĩ Jehova. 7Narĩo rĩĩtwa rĩakwa itheru nĩngarĩmenyithania thĩinĩ wa andũ akwa Isiraeli, na ndikareka rĩĩtwa rĩu rĩakwa itheru rĩcoke gũthahio o na rĩ; nacio ndũrĩrĩ nĩikamenya atĩ niĩ nĩ niĩ Jehova, o we Ũrĩa Mũtheru wĩ kũu Isiraeli. 8Atĩrĩrĩ, ũhoro ũcio ũkiriĩ gũũka, na nĩũgekwo; ũguo nĩguo Mwathani Jehova oigĩte. Mũthenya ũcio-rĩ, nĩguo njarĩtie ũhoro waguo. 9No andũ arĩa matũũraga matũũra ma Isiraeli nĩmakoimagara, maakie mwaki, nacio indo cia mbaara macicine, macine ngo, na ndari, na mota, o na mĩguĩ, o na tũtimũ twa iberethi o na mĩenjerere, nao magaakia mwaki na indo icio mĩaka mũgwanja; 10matigakiune ngũ gĩthaka-inĩ o na kana maciteme mũtitũ-inĩ; nĩ ũndũ magaakagia mwaki na indo icio cia mbaara; nao nĩmagataha andũ arĩa maamatahĩte, o na matunye arĩa maamatunyĩte indo; ũguo nĩguo Mwathani Jehova oigĩte.

11Na nĩgũgakinya atĩrĩ, mũthenya ũcio, atĩ nĩngahe Gogu ũthiko kũu Isiraeli; ndĩmũhe gĩtuamba kĩa njĩra ya agendi kĩĩ mwena wa irathĩro wa iria rĩrĩa inene; nao agendi acio magirĩrĩrio gũcoka kũgera ho nĩ ũndũ wa ũhoro ũcio; tondũ kũu nĩkuo andũ magathika Gogu, na kĩrĩndĩ gĩake gĩothe; nao magagwĩtaga Gĩtuamba kĩa Hamoni-gogu. 12Nao andũ a nyũmba ya Isiraeli makanina mĩeri mũgwanja makĩmathika, nĩguo mathahũre bũrũri ũcio 13Ĩĩ, ti-itherũ magathikwo nĩ andũ othe a bũrũri, naguo ũhoro ũcio ũmarehere ngumo njega, o mũthenya ũrĩa niĩ ngekĩrĩrũo; ũguo nĩguo Mwathani Jehova oigĩte. 14Nao andũ acio nĩmagathura andũ a kũrutaga wĩra ũcio hingo ciothe marũmanĩrio, nao magerage bũrũri ũcio kũndũ guothe nĩguo mathikage ciimba iria ndigaru cia andũ acio ingĩkorũo bũrũri ũcio wothe, nĩguo maũthahũre; na rĩrĩ, mĩeri ĩo mũgwanja yathira-rĩ, nĩguo magaitĩka gũcaria matigari macio. 15Nao andũ acio atuĩkanĩria bũrũri ũcio-rĩ, no makaũtuĩkanagia o ro ũguo, na mũndũ o na ũrĩkũ angĩona ihĩndĩ rĩa mũndũ, ahande kĩmenyithia hakuhĩ narĩo, o nginya hĩndĩ ĩrĩa athikani makarĩthika o kũu gĩtuamba kĩa Hamonigogu. 16Na kwĩ itũũra rĩakuo rĩgetagwo Hainona. Ũguo nĩguo magathahũra bũrũri ũcio.

17 # Kũg 19.17,18. Wee nawe mũrũ wa mũndũ-rĩ, Mwathani Jehova oigĩte ũũ: Atĩrĩrĩ, arĩria nyamũ cia rĩera-inĩ cia mĩthemba yothe, o na nyamũ ciothe cia gĩthaka, ũciĩre atĩrĩ, Wĩyũnganiei mũũke; wĩcokanĩrĩriei igongona-inĩ rĩakwa rĩrĩa ngũruta nĩ ũndũ wanyu, muumĩte na mĩena yothe, mũũke o igongona-inĩ rĩrĩa inene rĩkũrutĩrũo irĩma-inĩ cia Isiraeli, nĩ getha mũrĩe nyama na mũnyue thakame. 18Nĩ nyama cia andũ arĩa marĩ hinya mũrĩrĩa, na mũnyue thakame ya andũ arĩa anene a gũkũ thĩ, na ya ndũrũme, o na tũtũrũme o na ya mbũri, o na ya ndegwa, nacio ciothe nĩ nyamũ iria noru cia Bashani. 19Naho ha ũhoro wa igongona rĩakwa rĩu ngũruta nĩ ũndũ wanyũrĩ, mũkarĩa maguta marĩo o nginya mũhũne, na mũnyue thakame yarĩo o nginya mũrĩwo nĩyo ta njohi, 20mũhũnĩrio metha-inĩ yakwa nĩ nyama cia mbarathi, o na cia arĩa mahaicaga ngari cia ita, o na cia andũ arĩa marĩ hinya, o na cia andũ arĩa angĩ othe a ita; ũguo nĩguo Mwathani Jehova oigĩte. 21Naguo riri wakwa ngaũiga gatagatĩ-inĩ ka ndũrĩrĩ, nacio ndũrĩrĩ ciothe cione matua makwa ma cira marĩa ’hinganĩirie, o na cione guoko gwakwa kũrĩa ndĩciigĩrĩire ndĩciherithie. 22Ũguo noguo andũ a nyũmba ya Isiraeli makamenya atĩ niĩ nĩ niĩ Jehova Ngai wao, kuuma mũthenya ũcio o na thutha waguo. 23Nacio ndũrĩrĩ iria ingĩ imenye atĩ andũ acio a nyũmba ya Isiraeli maarindũrĩtwo nĩ ũndũ wa ũũru wao; nĩ ũndũ nĩmaagararire watho wakwa, na niĩ ngĩmahitha ũthiũ wakwa; naguo ũguo nĩguo watũmire ndĩmaneane moko-inĩ ma thũ ciao, nao othe makĩgũa moragĩtwo na hiũ cia njora. 24O ta ũrĩa maũndũ mao marĩa me thahu maatariĩ, o na ta ũrĩa ũhoro wao wa kwagarara watho wakwa watariĩ-rĩ, ũguo noguo ndamekire; o na ngĩmahitha ũthiũ wakwa.

25Tondũ ũcio Mwathani Jehova oigĩte ũũ: Rĩu nĩ hĩndĩ ngũhũndũra andũ a Jakubu arĩa maarindũrĩtwo, na njiguĩre andũ othe a nyũmba ya Isiraeli tha; narĩo rĩĩtwa rĩakwa itheru ndĩrĩiguĩre ũiru. 26Nao nĩmagakorũo maiganĩtwo nĩ njono cia ũrĩa maaconorithĩtio nĩ ũndũ wa kwagarara watho wakwa wothe makĩnjũkĩrĩra, na macoke gũtũũra bũrũri wao megangarĩte, na hatirĩ mũndũ ũkamaguoyohia; 27o hĩndĩ ĩrĩa ngakorũo ndĩmacoketie kwao ngamaruta ndũrĩrĩ-inĩ, o na ngamacokanĩrĩria ngamaruta mabũrũri-inĩ ma thũ ciao, na ngorũo nduĩtwo mũtheru thĩinĩ wao makĩonagwo nĩ ndũrĩrĩ nyingĩ. 28Nao nĩmakamenya atĩ niĩ nĩ niĩ Jehova Ngai wao, nĩ ũndũ wa ũrĩa ndamarindũrithĩirie ndũrĩrĩ-inĩ, na thutha wa ũguo ngĩcoka ngĩmonganĩria o kũu bũrũri-inĩ wao kĩũmbe; na nditige o na ũmwe wao kuo. 29Ndigagĩcoka kũmahitha ũthiũ wakwa o na rĩ; nĩ ũndũ andũ acio a nyũmba ya Isiraeli nĩndĩmaitĩrĩirie Roho wakwa; ũguo nĩguo Mwathani Jehova oigĩte.

Currently Selected:

EZEKIELI 39: OGKBIBLE

Highlight

Copy

Compare