EZEKIELI 37

1Na rĩrĩ, nĩ kũigua ndaiguire ta njigĩrĩirũo guoko kwa Jehova, ngĩgĩcoka ngĩigua ta njoetwo nĩ Roho wa Jehova, akanjiga thĩ handũ gĩtuamba-inĩ gatagatĩ; nakĩo gĩgĩkorũo kĩiyũrĩte mahĩndĩ; 2nake akĩngereria hakuhĩ namo ngĩmathiũrũrũka; na atĩrĩrĩ, ngĩona atĩ maarĩ maingĩ mũno mũno kũu gĩtuamba-inĩ kĩu; na magĩkorũo me momũ mũno ma. 3Hĩndĩ ĩo agĩcoka akĩnjũria atĩrĩ, Mũrũ wa mũndũ, mahĩndĩ maya-rĩ, maahota gũcoka gũtũũra muoyo? Niĩ na niĩ ngĩcokia atĩrĩ, Mwathani Jehova, wee nĩwe ũũĩ. 4Ningĩ akĩnjĩra atĩrĩ, Rathĩra mahĩndĩ maya ũhoro ũmere atĩrĩ, Inyuĩ mahĩndĩ maya momũ, ta iguai ndũmĩrĩri ya Jehova. 5Mwathani Jehova ekwĩra mahĩndĩ maya ũũ: Atĩrĩrĩ, nĩngũtũma mũcokererũo nĩ mĩhũmũ ya muoyo thĩinĩ wanyu, nĩguo mũcoke gũtũũra muoyo. 6Ningĩ njoke ndĩmwĩkĩre mĩkiha, o na ndĩmwĩkĩre nyama, ningĩ njoke ndĩmũhumbe rũũa rũa igũrũ, na ndĩmwĩkĩre mĩhũmũ ya muoyo, nĩguo mũcoke gũtũũra muoyo; na nĩmũkamenya atĩ niĩ nĩ niĩ Jehova.

7Ngĩgĩcoka ngĩratha mohoro o ta ũguo ndaathirũo; na rĩrĩa ndarathaga mohoro macio, hakĩgĩa mũrurumo, na atĩrĩrĩ, thĩ ĩgĩthingitha, namo mahĩndĩ makĩrika gũcokanĩrĩra, o ihĩndĩ rĩkĩerekera harĩ ihĩndĩ rĩrĩa rĩngĩ rĩagwataine narĩo tene. 8Na niĩ ngĩcũthĩrĩria-rĩ, hĩ! ngĩkĩona mĩkiha ĩgĩĩte mahĩndĩ-inĩ macio, magĩcoka makĩgĩwo nĩ nyama, naguo mwĩrĩ ũcio ũgĩcoka ũkĩhumbwo nĩ rũũa rũa igũrũ; no matiagĩĩtwo nĩ mĩhũmũ ya muoyo thĩinĩ wamo. 9Hĩndĩ ĩo agĩcoka akĩnjĩra atĩrĩ, Mũrũ wa mũndũ, rathĩra rũhuho ũhoro, ũrathe, wĩre rũhuho rũu atĩrĩ, Mwathani Jehova oigĩte ũũ: Ũkani inyuĩ mĩhũmũ ya muoyo muumĩte na mĩena yothe ĩrĩa huho iria inya cia matũinĩ ihurutanagĩra, mũhũmũkĩre andũ aya moragĩtwo, nĩ getha mariũke. 10#Kũg 11.11.Na niĩ ngĩkĩratha ũhoro o ta ũrĩa aanjathĩte, nayo mĩhũmũ ya muoyo ĩgĩũka ĩkĩmatonya, nao magĩkĩriũka, makĩĩrũgamia na magũrũ mao, na magĩkorũo marĩ mbũtũ nene mũno ya ita.

11Nake akĩnjĩra atĩrĩ, Mũrũ wa mũndũ, mahĩndĩ maya-rĩ, nĩmo andũ othe a nyũmba ya Isiraeli; amu-rĩ, nĩ kuuga moigaga atĩrĩ, Mahĩndĩ maitũ nĩ momũ, o nakĩo kĩĩrĩgĩrĩro giitũ nĩkĩũrĩte; tũrĩ athengie o gũthengio biũ ta tũikĩtio na kĩano. 12Tondũ ũcio marathĩre ũhoro, ũmere atĩrĩ, Mwathani Jehova oigĩte ũũ: Atĩrĩrĩ, inyuĩ andũ akwa, nĩ gũthikũria ngathikũria mbĩrĩra cianyu, ndĩmũrutithie muume kũu mbĩrĩra-inĩ icio cianyu, ndĩmũrehe bũrũri wa Isiraeli. 13Na nĩmũkamenya atĩ niĩ nĩ niĩ Jehova, hĩndĩ ĩrĩa ngakorũo ndĩmũthikũrĩtie mbĩrĩra-inĩ icio cianyu, na ngamũrutithia muume kũu mbĩrĩra-inĩ cianyu, inyuĩ andũ aya akwa. 14Na rĩrĩ, nĩ gwĩkĩra ngamwĩkĩra Roho wakwa thĩinĩ wanyu, nĩguo mũtũũre muoyo, na ndĩmũige bũrũri-inĩ wanyu kĩũmbe; na nĩmũkamenya atĩ niĩ Jehova nĩ niĩ njarĩtie ũhoro ũcio, na ngaũhingia; ũguo nĩguo Jehova oigĩte.

15Ningĩ ndũmĩrĩri ya Jehova ĩkĩnginyĩrĩra o ro rĩngĩ, ngĩĩrũo atĩrĩ, 16Wee Mũrũ wa mũndũ, wĩyoere gathanju, ũcoke ũkaandĩke igũrũ atĩrĩ, Gaka nĩko ka Juda, o na ga ciana cia Isiraeli iria irĩ thiritũ nake; ningĩ woe gathanju kangĩ, ũkaandĩke igũrũ atĩrĩ, Gaka nako nĩ ka Jusufu, na nĩ gathanju ka Efiraimu, o na ka andũ othe a mĩhĩrĩga ya Isiraeli arĩa me thiritũ nake; 17ningĩ ũcoke ũtwĩnyitithanirie o kamwe na karĩa kangĩ tũtuĩke rũthanju rũmwe, nĩ getha tũikare twĩ rũthanju rũmwe twĩ guoko-inĩ gwaku. 18Na rĩrĩ, hĩndĩ ĩrĩa ciana cia andũ anyu ikaaria nawe, ikũũrie atĩrĩ, Kaĩ ũtangĩgĩtuonia ũrĩa maũndũ maya ũreka matariĩ? 19Ũgĩciĩre atĩrĩ, Mwathani Jehova oigĩte ũũ: Atĩrĩrĩ, nĩ kuoya ngoya gathanju ka Jusufu, karĩa karĩ guoko kwa Efiraimu, o hamwe na mĩhĩrĩga ya Isiraeli ĩrĩa ĩĩ thiritũ nake; njoke ndĩkanyitithanie na gathanju ka Juda, ndĩtũtue ta rũthanju rũmwe, nao magĩe rũmwe ndĩmanyitĩte na guoko gwakwa. 20Natuo tũthanju tũrĩa waandĩkire igũrũ rĩatuo ũgakorũo ũtũnyitĩte na guoko wĩ mbere yao magĩkwĩonagĩra na maitho mao. 21Ũgĩcoke ũmere atĩrĩ, Mwathani Jehova oigĩte ũũ: Atĩrĩrĩ, nĩngaruta ciana cia Isiraeli ndũrĩrĩ-inĩ, o kũndũ kũrĩa ihurunjũkĩire, na nĩngacicokanĩrĩria ciume ndwere-inĩ ciothe, ndĩcirehe o gũkũ bũrũri wacio kĩũmbe; 22na nĩngacitua rũrĩrĩ rũmwe irĩ kũu bũrũri ũcio, o kũu irĩma-inĩ cia Isiraeli; nacio ciothe igathamakagĩrũo nĩ mũthamaki ũmwe; nacio itigacoka gũtuĩka ndũrĩrĩ igĩrĩ o na atĩa, o na kana icoke kũgayũkanio ituĩke mothamaki merĩ o na rĩ, 23o na kana icoke gwĩthahia cio nyene na mĩhianano yacio ya kũhoyũo o na rĩ, o na kana ciĩthahie na maũndũ ma cio marĩa mathũũre, o na kana ciĩthahie na maũndũ ma cio ma kwagarara watho; no rĩrĩ, nĩ kũhonokia ngacihonokia harĩ ũhoro wacio wothe wa kũ’hutatĩra ũrĩa watũmire mahĩtie, ndĩcitherie o gũcitheria, nĩguo ĩtuĩke andũ akwa, na niĩ nduĩke Ngai wacio.

24 # Ezek 34.24. Nake Daudi ndungata yakwa nĩwe ũgatuĩka mũthamaki wa kũmathamakagĩra; ningĩ othe magĩe na mũrĩithi o ũmwe, o na ningĩ marũmagĩrĩre matuĩro makwa ma cira, o na mamenyagĩrĩre irĩra cia watho wakwa wa kũrũmĩrĩrũo, o na maciĩkage. 25Nao nĩmagatũũra bũrũri ũcio ndaheire ndungata yakwa Jakubu, o kũu mathoguo maatũire; nao matũũre kuo, o ene, o na ciana ciao, o na ciana cia ciana ciao, tene na tene; nake Daudi ndungata yakwa atũũre e mũnene wao o tene na tene. 26O na ningĩ-rĩ, nĩngarĩkanĩra kĩrĩkanĩro nao gĩa atĩ kũgĩe thayũ; nakĩo kĩrĩkanĩro kĩu giitũ nao gĩtũũre mĩndĩ na mĩndĩ, na niĩ mwene ndũũre ndĩmarũmĩirie kĩrĩkanĩro kĩu, na ndũme maingĩhe mũno, o naho handũ hakwa harĩa haamũre ndĩhaake hatũũre o kũu thĩinĩ wao tene na tene. 27#2 Kor 6.16; Kũg 21.3.Ningĩ Gĩikaro gĩakwa gĩgatũũra o hamwe nao, na niĩ nduĩke Ngai wao, nao matuĩke andũ akwa. 28Nacio ndũrĩrĩ iria ingĩ nĩikamenya atĩ niĩ nĩ niĩ Jehova ũrĩa wamũraga Isiraeli akamatheria, hĩndĩ ĩrĩa handũ hakwa hau haamũre hagakorũo harĩ o kũu thĩinĩ wao tene na tene.

Currently Selected:

EZEKIELI 37: OGKBIBLE

Highlight

Copy

Compare