EZEKIELI 28

1Ningĩ, ndũmĩrĩri ya Jehova ĩkĩnginyĩrĩra o rĩngĩ, ngĩĩrũo atĩrĩ, 2Mũrũ wa mũndũ, aria na mũnene wa Turo ũmwĩre atĩrĩ, Mwathani Jehova oigĩte ũũ: Tondũ ngoro yaku nĩĩyambatĩrĩtie, nawe ũkoiga atĩrĩ, Niĩ ndĩ ngai, na njikarĩire gĩtĩ kĩa Mũrungu, gĩkĩ kĩigĩtwo o gũkũ maria-inĩ, no wĩ mũndũ wa gũkũ thĩ, na tiwe Ngai, o na ũngĩkorũo ũtũũgĩrĩtie ngoro yaku ĩtuĩke o ta ngoro ya Ngai-rĩ, 3atĩrĩrĩ, kaĩ wĩ mũũgĩ ma, ũgakĩra Danieli-ĩ! Hatirĩ hitho o na ĩrĩkũ mangĩhota gũkũhitha! 4Tondũ wa ũũgĩ waku o na ũndũ wa ũrĩa ũkuũkĩirũo nĩ maũndũ nĩwĩyoneire ũtonga, na ũkeonera thahabu na betha cia kũigwo mũthithũ-inĩ wa indo ciaku cia bata. 5Tondũ wa ũrĩa ũũgĩ waku ũnenehete, o na tondũ wa wonjorithia waku, nĩwĩingĩhĩirie ũtonga, nayo ngoro yaku ĩkeyambatĩria nĩ ũndũ wa ũtonga ũcio waku. 6Tondũ ũcio Mwathani Jehova oigĩte ũũ: Tondũ ngoro yaku ũmĩtuĩte o ta ngoro ya Ngai-rĩ, 7atĩrĩrĩ, tondũ wa ũhoro ũcio, ngakũrehithĩrie andũ a ndũrĩrĩ magũtharĩkĩre, nao nĩ a rũrĩrĩ rũĩ itua-nda; na nĩmagagũcomorera hiũ ciao cia njora, makũninĩre igweta rĩa ũũgĩ ũcio waku, na mathahie riri waku. 8Nao nĩmagagũikũrũkia na thĩ magũkinyie o irima-inĩ; nawe ũkue gĩkuũ ta kĩa andũ arĩa moragĩtwo, o kũu ndĩra-inĩ cia maria. 9Rĩu-rĩ, nĩũgagĩcoka kuugĩra o hau mbere ya mũkũũragi atĩ niĩ ndĩ ngai? No rĩrĩ, rĩrĩa wĩ moko-inĩ ma ũcio mũkũguraria-rĩ, nĩũkamenya atĩ ũkĩrĩ o mũndũ wa gũkũ thĩ, na tiwe Mũrungu. 10Ũgakua gĩkuũ o ta kĩa andũ arĩa mataruĩte, ũũragĩtwo na guoko kwa andũ a ndũrĩrĩ, nĩ gũkorũo niĩ nĩ niĩ njarĩtie ũhoro ũcio; ũguo nĩguo Mwathani Jehova oigĩte.

11O na ningĩ ndũmĩrĩri ya Jehova ĩkĩnginyĩrĩra, ngĩĩrũo atĩrĩ, 12Mũrũ wa mũndũ, itĩkana na macakaya, ũcakaĩre mũthamaki wa Turo, ũmwĩre atĩrĩ, Mwathani Jehova oigĩte ũũ: Wee wathimwo-rĩ, wonagwo wĩ wa kũhingia maũndũ mothe marĩa makinyanĩru, nawe ũkaiyũrũo nĩ ũũgĩ, na ũgathakara o gũthakara biũ. 13Nĩ gũtũũra watũire Edeni, mũgũnda wa Ngai, natuo tũhiga twa goro twa mĩthemba yothe nĩtuo kĩndũ kĩrĩa wehumbaga nakĩo, natuo nĩtuo wakiki ũrĩa mũtune, o na yakuti ĩrĩa ĩhaana ngoikoni, na arimathi, na thumarati ĩrĩa theru, na onigithi, na njathibi, na yakuti ĩrĩa ya bururu, na thumarati ya ũruru, na baregathu, na thahabu; na ũkoimwo thutha nĩ gĩtutu kĩnene kĩa ahũri tũhembe, na ahuhi mĩtũrirũ; mũthenya ũrĩa watuirũo mũthamaki-rĩ, nĩguo maũndũ macio maahaarĩirio. 14Wee nĩwe warĩ mũkerubi mũitĩrĩrie maguta ũrĩa wagitanagĩra; na niĩ ngĩkũiga wega, na ũgĩkorũo ũrĩ kĩrĩma-inĩ kĩrĩa kĩamũre kĩa Ngai; nawe ũgĩcanga kũndũ guothe ũthiũrũrũkĩirio nĩ mahiga mekũhenia ta mwaki. 15Na rĩrĩ, kuuma mũthenya ũcio watuirũo mũthamaki-rĩ, waikaraga wĩ mũkinyanĩru mĩthiĩre-inĩ yaku, o nginya hĩndĩ ĩrĩa ũhoro ũtarĩ wa ũthingu waambire kuoneka thĩinĩ waku. 16Tondũ wa ũrĩa wonjorithia waku ũingĩhĩte, nĩkĩo waiyũire maũndũ ma ũhinya thĩinĩ waku, ũgĩkĩĩhia; tondũ ũcio ngũikĩtie o ta kĩndũ kĩgwatie thahu, uume kĩrĩma-inĩ kĩa Ngai, nawe, wee mũkerubi ũyũ ũgitanagĩra, nĩngũninĩte uume gatagatĩ-inĩ ka mahiga macio mahenagia ta mwaki. 17Ngoro yaku nĩyatũũgĩrĩtio nĩ ũndũ wa ũthaka waku, ũgathũkia ũũgĩ waku nĩ ũndũ wa gũkenga, na tondũ ũcio niĩ ngũikĩtie o thĩ tĩri-inĩ, na ngakwaragania thĩ mbere ya athamaki nĩguo makuone. 18Tondũ wa ũrĩa waganu waku ũrĩa waneka ũingĩhĩte, na ũndũ wa maũndũ marĩa matarĩ ma ũthingu ma wonjorithia waku-rĩ, kũndũ gwaku kũrĩa kwamũre nĩgũthahĩtio, na tondũ ũcio niĩ na niĩ ngũgwatĩtie mwaki o kũu thĩinĩ waku, naguo nĩũgakũnina biũ, na niĩ ngũgarũre ũtuĩke o mũhu mũtheri gũkũ thĩ ũkĩonagwo nĩ andũ othe arĩa makwĩroreire. 19Nao andũ othe arĩa mũũyaine nao thĩinĩ wa ndũrĩrĩ nĩ kũgega magakũgegera; wee nĩũtuĩkĩte ũndũ wa kũguoyohania, na ndũgacoka kuoneka o na rĩ.

20 # Joel 3.4-8; Zek 9.1,2; Mat 11.21,22; Luk 10.13,14. Ningĩ ndũmĩrĩri ya Jehova ĩkĩnginyĩrĩra, ngĩĩrũo atĩrĩ, 21Mũrũ wa mũndũ, ikara ũroretie ũthiũ waku Zidoni, ũrĩrathĩre ũhoro, 22uuge atĩrĩ, Mwathani Jehova oigĩte ũũ: Atĩrĩrĩ, ndĩ wa kũhũrana nawe, wee Zidoni, na nĩngonagwo ta arĩ kũgoocwo ngũgoocwo thĩinĩ waku; nao andũ nĩmakamenya atĩ niĩ nĩ niĩ Jehova, hĩndĩ ĩrĩa ngakorũo ’hinganĩirie matuĩro ma cira o kũu thĩinĩ warĩo, na nduwo mũtheru thĩinĩ warĩo. 23Amu nĩngatwarithia mũthiro o kũu thĩinĩ warĩo, na ndũme gũitithanio thakame kũu njĩra-inĩ ciarĩo; ningĩ andũ arĩa magurarĩtio magũe o kũu thĩinĩ warĩo moragĩtwo, macomoreirũo hiũ cia njora na ndwere ciothe; nao nĩmakamenya atĩ niĩ nĩ niĩ Jehova. 24Na rĩrĩ, hatigacoka kuoneka mahiũ ma nyeki-inĩ ma gũtheca nyũmba ya Isiraeli, o na kana mũigua wa kũmĩiguithia ruo, thĩinĩ wa andũ othe arĩa mamĩrigicĩirie na ndwere ciothe, o acio mamĩmenete; nao nĩmakamenya atĩ niĩ nĩ niĩ Mwathani Jehova.

25Mwathani Jehova oigĩte ũũ: Hĩndĩ ĩrĩa ngakorũo njokanĩrĩirie nyũmba ya Isiraeli ndĩmĩrutĩte thĩinĩ wa andũ arĩa yaharaganĩirio kũrĩ o, na ngorũo ndũmĩte rĩĩtwa rĩakwa rĩamũrũo thĩinĩ wao, ndũrĩrĩ iria ingĩ ikĩĩonagĩra-rĩ, hĩndĩ ĩo andũ a nyũmba ĩo nĩmagatũũra bũrũri wao kĩũmbe ũrĩa ndaheire ndungata yakwa Jakubu. 26Nao nĩmagatũũra guo megangarĩte; ĩĩ, ti-itherũ nĩmagaaka nyũmba, na mahande mĩgũnda ya mĩthabibu; nao nĩmagatũũra megangarĩte hĩndĩ ĩrĩa ngakorũo hinganĩirie matuĩro ma cira harĩ andũ arĩa maamamenagĩrĩria mamarigicĩirie na ndwere ciothe; nao mamenye atĩ niĩ nĩ niĩ Jehova Ngai wao.

Currently Selected:

EZEKIELI 28: OGKBIBLE

Highlight

Copy

Compare