EZEKIELI 23

1Ningĩ ndũmĩrĩri ya Jehova ĩkĩnginyĩrĩra o rĩngĩ, ngĩĩrũo atĩrĩ, 2Mũrũ wa mũndũ, kwĩ hĩndĩ kwarĩ andũ-a-nja erĩ, airĩtu a nyina ũmwe; 3nao makĩhũrĩra maraya Misiri; nao maahũrire maraya rĩrĩa maarĩ ethĩ; nakuo nĩkuo maahihinyĩirũo nyondo ciao, na kũu nĩkuo nyondo ciao ciatandukĩirũo, magĩthirũo nĩ ũirĩtu wao. 4Nao ũrĩa mũkũrũ etagwo Ohola, na mwarĩ wa nyina agetwo Oholiba; nao magĩgĩtuĩka akwa, magĩciara aanake na airĩtu. Naho ha ũhoro wa marĩĩtwa macio mao-rĩ, Samaria nĩrĩo Ohola, o narĩo Jerusalemu nĩrĩo Oholiba. 5Nake Ohola aahũrire maraya hĩndĩ ĩrĩa aatuĩkĩte wakwa; nake agĩkĩgucĩrĩrio nĩ ũnyanya wa andũ arĩa mendaine nao, nao nĩ Aashuri, o acio maahakaine bũrũri nao, 6nao maarĩ abarũthi na aathani arĩa mehumbaga nguo cia rangi wa bururu, nao othe maarĩ aanake ciĩrorerũa, arĩa mathiaga mahaicĩte mbarathi. 7Nake akĩmagwatia mĩĩto ya ũmaraya ũcio wake, nao othe maarĩ o andũ arĩa athure a Ashuri; ningĩ mũndũ o wothe ũrĩa eyendeire agĩĩkĩria harĩ we, na agĩcoka gwĩthũkia na mĩhianano yao yothe ya kũhoyũo. 8Nake ndaatiganire na ũmaraya ũcio wake gwata o matukũ marĩa aarĩ Misiri; nĩ ũndũ nĩo maakomaga nake gwata o hĩndĩ ĩrĩa aarĩ mwĩthĩ, na nĩo maamũtandukire nyondo makĩmũninĩra ũirĩtu wake, na magĩkĩrĩrĩria kũhũra maraya nake. 9Tondũ ũcio ngĩkĩmũrekereria ngĩmũneana moko-inĩ ma anyanya acio ake, o moko-inĩ ma Aashuri, acio eyendeire. 10Nao acio makĩmũguũria nguo agĩtigwo njaga; ningĩ magĩtaha aanake ake o na airĩtu, na magĩcoka makĩmũũraga na rũhiũ rũa njora. Naguo ũhoro wake ũgĩcoka ũgĩtuĩka wa kwario na thimo nĩ andũ-a-nja arĩa angĩ, nĩ ũndũ wa ũrĩa aaherithirio. 11Nake mwarĩ wa nyina Oholiba akĩĩonera ũndũ ũcio, no rĩrĩ, nĩwe wehire na kwenda ũnyanya kũmũkĩra, na akahũra maraya gũkĩra ũrĩa mwarĩ wa nyina aahũraga. 12Agĩkĩgucĩrĩrio nĩ ũnyanya wa Aashuri arĩa maarĩ abarũthi na aathani, o acio maahakaine bũrũri nao, nao othe nĩ aanake ciĩrorerũa arĩa mehumbaga nguo irĩ rĩrĩ, na magathiaga mahaicĩte mbarathi. 13Niĩ na niĩ ngĩkĩona atĩ nĩ mũthũkie, na atĩ o erĩ maathiĩte o njĩra ĩmwe. 14Nake agĩkĩingĩhia ũmaraya wake mũno, nĩ ũndũ wa kuona mũhianĩre wa arũme ũkururĩtwo rũthingo-inĩ, nayo nĩyo mĩhianĩre ya Akalidei mĩkurure ĩkahakwo rangi mũtune mũno; 15nake agĩkĩona ũrĩa mohetwo na mĩĩhotoro njohero-inĩ ciao, o na magekĩra iremba cia rangi wa mĩthemba mĩingĩ mĩtwe yao, nao othe makĩonwo-rĩ, makonagwo ta marĩ a kĩruka kĩa anene, o ta ũrĩa mũhianĩre wa Ababuloni arĩa maaciarĩirũo bũrũri wa Kalidei ũtariĩ. 16Nake aamona akĩũmbwo nĩo, akĩmarekeria andũ o kũu Kalidei. 17Nao Ababuloni magĩgĩthiĩ kũrĩ we o kũu kĩrĩrĩ-inĩ kĩa ũnyanya wao thĩinĩ, makĩmũthũkia nĩ ũndũ wa kũhũra maraya nake, nake agĩkĩgwatio thahu nĩo, nayo ngoro yake ĩgĩitĩka kũmanyira. 18Ũguo nĩguo aaguũranĩirie ũhoro wa ũmaraya wake, na akĩguũria nguo ciake atigwo njaga nayo ngoro yakwa ĩgĩitĩka kũnyirio nĩwe, o ta ũrĩa ndanyiririo nĩ mwarĩ wa nyina. 19No rĩrĩ, nĩ gũkĩrĩrĩria aakĩrĩrĩirie kũingĩhia ũmaraya ũcio wake, aririkaine matukũ marĩa aarĩ mwĩthĩ, rĩrĩa aahũraga ũmaraya bũrũri wa Misiri. 20Nake agĩkĩũmbwo nĩ anyanya ake, nao nĩo maiyũrĩtwo nĩ thuti ta marĩ ndigiri, na makoimwo nĩ hinya ta wa mbarathi. 21Tondũ wa gwĩka ũguo, ũgĩkĩririkana waganu waku wa hĩndĩ ĩrĩa warĩ mwĩthĩ, rĩrĩa watandukirũo nyondo ciaku cia ũirĩtu nĩ Amisiri.

22Tondũ ũcio-rĩ, wee Oholiba, Mwathani Jehova oigĩte ũũ: Atĩrĩrĩ, nĩ kwarahũra ngaarahũra anyanya aku magũũkĩrĩre, o acio ngoro yaku ĩmanyirĩte, na nĩngatũma moke magũũkĩrĩre makuumĩte na ndwere ciothe. 23Nao nĩo Ababuloni o na Akalidei othe, na andũ a Pekodi na Shoa na Koa, o na Aashuri othe me hamwe nao acio nĩo aanake ciĩrorerũa, arĩa matuĩtwo abarũthi, nao othe nĩ aathani na anene, o na andũ marĩ ĩgweta, nao othe mahaicaga mbarathi. 24Nao magoka magũũkĩrĩre me na indo cia mbaara, na ngari cia ita, na makari, o na kĩrĩndĩ kĩingĩ kĩũnganĩte; nao magethaba magũũkĩrĩre me na ndari na ngo, o na itukũ, makũrigicĩrie na mĩena yothe; na niĩ nĩngamarekereria makũhingĩrie ituĩro rĩa cira waku, nao magũcirithie na magũtuĩre cira o ta ũrĩa matuanagĩra. 25Na niĩ nĩngerutanĩria ngũhũre, nao andũ acio magwĩke maũndũ marĩ athũgũtu; nao magũtinie iniũrũ o na matũ, o nao andũ anyu arĩa magatigara magũe thĩ matemengetwo na rũhiũ rũa njora; andũ acio nĩ gũtaha magataha aanake aku na airĩtu, namo matigari maku mothe maninwo na mwaki. 26Nĩ gũcuma magagũcuma nguo ciaku ũtigwo ũtheri, na mathiĩ na mathaga maku marĩa me goro. 27Ũguo nĩguo ngatũma ũthirũo nĩ ũhoro waku wa wagathoni, o naguo ũmaraya waku ũrĩa warutire bũrũri wa Misiri; nĩ getha ndũkanacoke kũmatiirĩra maitho, o na kana ũcoke kũririkana Misiri o na rĩ.

28Nĩ gũkorũo Mwathani Jehova oigĩte ũũ: Atĩrĩ, ngakũrekereria ngũneane moko-inĩ ma andũ arĩa ũthũire, o moko-inĩ ma andũ arĩa ngoro yaku ĩnyirĩte; 29nao nĩmagagwĩka maũndũ na rũmena, na magũtunye indo ciaku ciothe iria ũnogagĩra, na magũtige njaga ũrĩ ũtheri; o nayo njaga yaku ĩrĩa ĩkonainie na ũhũri maraya nĩĩkaguũrio, o naguo ũhoro waku wa waga-thoni na ũmaraya ũmenyeke. 30Maũndũ macio nĩmo ũgekwo, nĩ ũndũ nĩũhũrĩte maraya na ndũrĩrĩ iria itetĩkĩtie, na ũgethũkia na mĩhianano yacio ya kũhoyũo. 31Wee ũrũmĩrĩire mĩthiĩre ya mwarĩ wa nyũkwa, na tondũ ũcio gĩkombe gĩake nĩwe nganengera ũkĩnyite na guoko gwaku. 32Mwathani Jehova oigĩte ũũ: Gĩkombe kĩa mwarĩ wa nyũkwa nĩkĩo ũkanyuĩra, nakĩo nĩ kĩriku mũno, na gĩkaarama; wee nĩ gũthekererũo ũgathekererũo na ũmenererio, tondũ gĩkombe kĩu nĩ kĩiyũru mũno. 33Wee-rĩ, nĩ kũiyũrũo ũkaiyũrũo nĩ ũrĩu o na kĩeha, tondũ gĩkombe kĩu kĩiyũrĩte kĩmako na mwanangĩko, o kĩu kĩa mwarĩ wa nyũkwa ũcio wĩtagwo Samaria. 34Wee-rĩ, nĩ kũnyua ũgakĩnyuira, o na ũkĩinĩkĩrĩre, o na ũcũne icere ciakĩo; ningĩ ũcoke kwĩhara nyondo, nĩ ũndũ niĩ nĩ niĩ njarĩtie ũhoro ũcio; ũguo nĩguo Mwathani Jehova oigĩte. 35Tondũ ũcio Mwathani Jehova oigĩte ũũ: Kuona atĩ nĩũriganĩirũo nĩ niĩ, ũkanjikia na thutha waku-rĩ, tondũ ũcio o nawe no mũhaka ũcokererũo nĩ ũhoro waku wa waga-thoni o na ũmaraya waku.

36O na ningĩ Jehova akĩnjĩra atĩrĩ, Mũrũ wa mũndũ, githĩ tiwe ũgũcirithia Ohola na Oholiba? Ta kĩmoimbũrĩre maũndũ marĩa maaneka ma thahu. 37Nĩ ũndũ-rĩ, gũtharia nĩmatharĩtie, namo moko mao makaiyũrũo nĩ thakame; mĩhianano yao ya kũhoyũo-rĩ, nĩyo matharĩtie nayo, o na ningĩ aanake ao, o acio maanjiarĩire, makamarutĩra yo nĩ kũmahĩtũkithia mwaki-inĩ, nĩ getha maninwo nĩ mwaki ũcio, mathire. 38O na ningĩ ũndũ ũrĩa manjĩkĩte nĩ ũyũ, atĩ handũ hakwa harĩa haamũre nĩmaahathũkirie mũthenya o ro ũcio, o na magĩthahia thabatũ ciakwa. 39Nĩ ũndũ-rĩ, hĩndĩ ĩrĩa maakorirũo moragĩire ciana ciao mĩhianano ya kũhoyũo, mũthenya o ro ũcio-rĩ, noguo maacokire gũthiĩ gũthũkia handũ hakwa harĩa haamũre. Hĩ! Maũndũ macio-rĩ, maamekire marĩ o kũu nyũmba yakwa thĩinĩ. 40O na ningĩ atĩrĩ, mwarekanirie mũgĩĩta andũ moime kũndũ kũraya; magakĩrekerio mũndũ, na rĩu nĩ oku; acio nĩo wethambĩire, na ũkĩĩhaka gĩthongo maitho, na ũkĩĩgemia na mathaga; 41ũgĩcoka ũgĩikarĩra urĩrĩ warĩtwo na ũkagemio mũno, na ũkĩiga metha mbere yaguo ĩrĩ thondeke, ningĩ igũrũ rĩayo ũkaigĩrĩra ũbumba wakwa o na maguta makwa. 42Nakuo kũu gwake gũkĩiguwo mũgambo ta wa kĩrĩndĩ kĩingĩ gĩikaranĩtie nake kĩgaacĩire, o na ningĩ hamwe na kĩrĩndĩ kĩu, hakĩrehwo harĩ wee andũ a mĩthemba mĩingĩ matarĩ igweta, marehanĩte na arĩu moimĩte werũ-inĩ; nao makĩmekĩra ituro cia moko o erĩ, o na makĩmekĩra tanji thaka mũno mĩtwe. 43Hĩndĩ ĩo niĩ na niĩ ngiuga atĩrĩ, Rĩu ũcio ũtũire atharanagia hĩndĩ ndaya nĩwe mekũhũra maraya nake, o nake akahũra nao. 44Nao magĩtonya harĩ we, o ta ũrĩa gũtonyagwo kwĩ mũmaraya; ũguo nĩguo maatonyereire aka acio aaga-thoni, nao nĩo Ohola na Oholiba. 45Nao andũ arĩa athingu nĩmakamacirithia cira wa atharania, na mamacirithie cira ta wa aka arĩa maitithagia thakame; nĩ gũkorũo nĩ atharia, na moko mao makaiyũrũo nĩ thakame. 46Amu Mwathani Jehova oigĩte ũũ: Ngamarehithĩrie ũũngano wa andũ ũmokĩrĩre, na nĩngamarekereria harĩ o mahũgio ũũ na ũũ, na matunyũo indo ciao. 47Nao andũ acio mamonganĩire nĩmakamahũra na mahiga nyuguto, na mamorage na hĩu ciao cia njora; na morage aanake ao, na airĩtu ao, o nacio nyũmba ciao macimundie mwaki. 48Ũguo nĩguo nganinithia waga-thoni wehere bũrũri ũcio, nĩ getha andũ-a-nja othe marutwo atĩ matikanacoke gwĩka maũndũ manene ma waga-thoni ta macio mũtũire mwĩkaga. 49Nao nĩmagatũma mũcokererũo nĩ maũndũ macio manyu ma waga-thoni, namo mehia manyu ma ũrĩa mũhoyaga mĩhianano ya kũhoyũo, nĩ inyuĩ mũkarigia namo; na nĩmũkamenya atĩ niĩ nĩ niĩ Mwathani Jehova.

Currently Selected:

EZEKIELI 23: OGKBIBLE

Highlight

Copy

Compare