EZEKIELI 13

1Na rĩrĩ, ndũmĩrĩri ya Jehova ĩkĩnginyĩrĩra, ngĩĩrũo atĩrĩ, 2Mũrũ wa mũndũ, ratha mohoro ma kũrũithia anabii a Isiraeli arĩa marathaga mohoro, wĩre acio marathaga mohoro ma ngoro ciao o ene atĩrĩ, Ta iguai ndũmĩrĩri ya Jehova; 3Mwathani Jehova oigĩte ũũ: Hĩ! Kaĩ anabii acio akĩgu marĩ na haaro-ĩ, o acio marũmagĩrĩra maũndũ ma maroho mao o ene, na matirĩ ũndũ o na ũrĩkũ maguũrĩirio! 4Atĩrĩrĩ, wee Isiraeli, anabii aku maratariĩ o ta mbwe cia werũ-inĩ. 5Mũtiambatĩte mũgathinge mĩanya ĩrĩa mĩtharũku ya rũthingo, o na kana mũthondekere andũ a nyũmba ya Isiraeli rũirigo, nĩguo makarũgama ita-inĩ rĩrĩa mũthenya wa Jehova ũgakinya. 6Andũ acio nĩ cioneki cia tũhũ monete, o na ũragũri wa maheni, o acio moigaga atĩrĩ, Jehova oigĩte ũna na ũna, na Jehova tiwe ũmareketie; nao magagĩtũma andũ mehoke atĩ ũhoro ũcio wao nĩũkũhingio. 7Githĩ ti kĩoneki gĩa tũhũ muonete? Ningĩ-rĩ, githĩ ti ũragũri wa maheni mũragũranĩire, kuona atĩ muugaga, Jehova oigĩte ũna na ũna, no ndirĩ ũndũ o na ũmwe njugĩte?

8Tondũ ũcio Mwathani Jehova oigĩte ũũ: Tondũ nĩ kwaria mwarĩtie ũhoro wa tũhũ, na mũkeyonera cioneki cia maheni-rĩ, atĩrĩrĩ, tondũ wa ũhoro ũcio ndĩ wa kũhũrana na inyuĩ; ũguo nĩguo Mwathani Jehova oigĩte. 9Nakuo guoko gwakwa nĩgũgũũkĩrĩra anabii arĩa monaga maũndũ ma tũhũ, o arĩa maragũranagĩra mohoro ma maheni; acio matigatuĩka a kĩama-inĩ kĩa andũ akwa, kana maandĩkwo ibuku-inĩ rĩa marĩĩtwa ma andũ a nyũmba ya Isiraeli, o na kana matonye bũrũri wa Isiraeli; na inyuĩ nĩmũkamenya atĩ niĩ nĩ niĩ Mwathani Jehova. 10#Jer 6.14; 8.11.Nĩ ũndũ-rĩ, ti-itherũ tondũ nĩmahenereirie andũ akwa, makĩmeraga atĩ gwĩ thayũ rĩrĩa gũtarĩ thayũ; na hĩndĩ ĩrĩa mũndũ egwaka rũthingo, atĩrĩrĩ, nĩ mũũnyũ ũtoirugĩtwo wega macokaga kũrũtenderia naguo. 11Acio marũtenderagia na mũũnyũ ũtoirugĩtwo wega mere atĩrĩ, atĩ nĩ kũgũa rũkagũa; nĩgũkagĩa mbura ya kĩboboto; ningĩ inyuĩ na inyuĩ, mbembe ici nene cia mbura, nĩmũkarũgũĩra; nakĩo kĩhuhũkanio kĩnene kĩa rũhuho kĩrũatũrange. 12Na rĩrĩ, hĩndĩ ĩrĩa rũthingo rũu rũkagũa-rĩ, githĩ mũtigakĩũrio ũũ: Kĩguni kĩa wĩra ũrĩa mwarutire wa gũtenderia rũthingo-rĩ, kĩrĩ ha? 13Tondũ ũcio Mwathani Jehova oigĩte ũũ: Ti-itherũ nĩ gwatũra ngarũatũranga na kĩhuhũkanio kĩa rũhuho nĩ ũndũ wa mathũgũta makwa; na nĩgũkagĩa mbura ya kĩboboto nĩ ũndũ wa marakara makwa, o na mbura nene ya mbembe ĩrũnine biũ, nĩ ũndũ wa mathũgũta makwa. 14Ũguo nĩguo ngagũithia rũthingo rũu mũtenderetie na mũũnyũ ũtoirugĩtwo wega, ndĩrũmomorere thĩ tĩri-inĩ, o nginya gĩtina kĩaruo kĩguũke. Rũthingo nĩrũkagũa, na inyuĩ arĩa mwĩ kũu thĩinĩ waruo mũninwo; na nĩmũkamenya atĩ niĩ nĩ niĩ Jehova. 15Ũguo nĩguo ngahingĩria rũthingo rũu mathũgũta makwa, ruo rũene o na andũ arĩa maarũtenderirie na mũũnyũ ũtoirugĩtwo wega; njoke ndĩmwĩre atĩrĩ, Rũthingo rũu rũtitũire, o na kana andũ arĩa maarũtenderirie; 16naguo ũguo nĩ ta kuuga anabii a Isiraeli arĩa marathaga ũhoro ũkoniĩ Jerusalemu, o arĩa monaga cioneki cia atĩ nĩrĩkũgia na thayũ, rĩrĩa gũtarĩ thayũ o na hanini. Ũguo nĩguo Mwathani Jehova oigĩte.

17Wee nawe, mũrũ wa mũndũ, hũgũkĩra airĩtu a andũ anyu, arĩa marathaga maũndũ marĩa moimĩte ngoro-inĩ ciao; ratha mohoro ma kũmarũithia, 18ũmere atĩrĩ, Mwathani Jehova oigĩte ũũ: Hĩ! Kaĩ aka arĩa matumagĩrĩra ithitũ nyunĩro-inĩ cia moko marĩ na haaro-ĩ! O acio mathondekagĩra andũ a mĩthemba yothe nguo cia kwĩhumba mwĩrĩ wothe kuuma o mũtwe, arĩa araya na arĩa akuhĩ, nĩguo mamatege maroho! Anga nĩ kũguĩma mũguĩmaga maroho ma andũ akwa, nĩguo mũhonokie maroho manyu inyuene, mũmatũũrie muoyo? 19Na nĩmũnjambĩtie kũrĩ andũ akwa, mũheetwo nduhi cia cairi ya kaihũri, na cia cienyũ cia mũgate, na mũkoragithia andũ arĩa mataagĩrĩirũo nĩ kũũragwo, na mũkahonokia andũ arĩa mataagĩrĩirũo nĩ gũtũũra muoyo; mũgeka ũguo nĩ kũhenia andũ akwa arĩa maiguaga ũhoro wanyu wa maheni. 20Tondũ ũcio Mwathani Jehova oigĩte ũũ: Atĩrĩrĩ, ndĩ wa kũhũrana na inyuĩ nĩ ũndũ wa ithitũ icio cianyu, icio mũtegaga maroho ma andũ nacio ta marĩ nyoni, na nĩngamahuria ndĩmarute moko-inĩ manyu; namo maroho macio ndĩmahonokie, o maroho macio mũtegaga ta marĩ nyoni. 21O nacio nguo icio cianyu nĩngacitembũranga ’honokie andũ akwa ndĩmarute moko-inĩ manyu, nao matigacoka kũnyitĩka na moko manyu rĩngĩ, o na kana mũmaguĩmage; na nĩmũkamenya atĩ niĩ nĩ niĩ Jehova. 22Nĩ gũkorũo tondũ wa maheni manyu nĩmũiguithĩtie ngoro cia andũ arĩa athingu ũũru, o arĩa itaiguithĩtie ũũru; namo moko ma andũ arĩa aaganu mũgakĩria kũmekĩra hinya, nĩ getha matikagarũrũke matigane na mĩthiĩre yao ya waganu, nĩguo mahonokio matũũre muoyo. 23Tondũ ũcio mũtigacoka kuona cioneki icio cia tũhũ o na atĩa, o na kana mũragũre mohoro macio maragũragio; nao andũ akwa nĩ kũhonokia ngamahonokia, ndĩmarute moko-inĩ manyu; na nĩmũkamenya atĩ niĩ nĩ niĩ Jehova.

Currently Selected:

EZEKIELI 13: OGKBIBLE

Highlight

Copy

Compare