AMOSI 1

1 # 2 Ath 15.1-7; 2 Maũ 26.1-23; 2 Ath 14.23-29. MAYA nĩmo mohoro ma Amosi, nĩwe ũmwe wa arĩithi a ng’ondu arĩa maatũire Tekoa; nĩ marĩa onire na woni, marĩa makoniĩ Isiraeli, matukũ-inĩ ma Uzia, mũthamaki wa Juda, na matukũ-inĩ ma Jeroboamu wa Joashu, mũthamaki wa Isiraeli; na nĩ mĩaka ĩĩrĩ mbere ya thĩ ĩtaanathingitha.

2 # Joel 3.16. Agĩkiuga atĩrĩ, Jehova-rĩ, nĩ gũthunguruma agathunguruma arĩ Zayuni, atumũke mũgambo arĩ Jerusalemu, naguo ũrĩithio wa arĩithi nĩ gũcakaya ũgagĩcakaya, na kĩrĩma gĩa Karimeli kĩũme igũrũ.

3 # Isa 17.1-3; Jer 49.23-27; Zek 9.1. Jehova ekuuga ũũ: Tondũ wa mehia matatũ ma Dameski-rĩ, ĩĩ-ni, o na kũmakĩria nginya mana-rĩ, ndingĩhũndũra kũherithio gwakuo; nĩ ũndũ mahũrĩte Gileadi ta ngano na igera iria cia kũmĩrigitha: 4no rĩrĩ, nĩngahurĩria mbarĩ ya Hazaeli mwaki, naguo ũrambie nyũmba cia ũnene iria cia Beni-hadadi. 5Ningĩ nyunange mũgĩĩko wa kĩhingo gĩa kũu Dameski, na ’ng’ũrie ũrĩa ũtũire gĩtuamba kĩa Aveni, nake ũrĩa ũnyitĩte mũthĩgi wa ũthamaki ndĩmũng’ũrie oime Bethi-Edeni: nao andũ a kũu Suriata gũtahwo magatahwo mathamĩrio Kiri; ũguo nĩguo Jehova ekuuga.

6 # Isa 14.29-31; Jer 47.1-7; Ezek 25.15-17; Joel 3.4-8; Zef 2.4-7; Zek 9.5-7. Ningĩ Jehova ekuuga ũũ: Tondũ wa mehia matatũ ma Gaza-rĩ, ĩĩ-ni, o na kũmakĩria nginya mana-rĩ, ndingĩhũndũra kũherithio gwakuo; nĩ ũndũ maanataha kĩrĩndĩ kĩrĩ o gĩothe magakĩhirĩra Edomu: 7no rĩrĩ, nĩngahurĩria rũirigo rũu rũa Gaza mwaki, naguo ũrambie nyũmba cia ũnene iria irĩ kuo: 8na ’ng’ũrie ũrĩa ũtũire Ashidodi, nake ũrĩa ũnyitĩte mũthĩgi wa ũthamaki ndĩmũng’ũrie oime Ashekiloni; na njoke ’hũndũrĩre Ekironi guoko gwakwa, nao Afilisiti arĩa magakorũo matigaire no makamitĩka; ũguo nĩguo Mwathani Jehova ekuuga.

9 # Isa 23.1-18; Ezek 26.1—28.19; Joel 3.4-8; Zek 9.1-4; Mat 11.21,22; Luk 10.13,14. Ningĩ Jehova ekuuga ũũ: Tondũ wa mehia matatũ ma Turo-rĩ, ĩĩ-ni, o na kũmakĩria nginya mana-rĩ, ndingĩhũndũra kũherithio gwakuo; nĩ ũndũ maanahirĩra Edomu kĩrĩndĩ kĩrĩ o gĩothe gĩĩ gĩtahe na matiririkane kĩrĩkanĩro kĩa ũrĩa maaciaraine magatuĩka a ithe ũmwe: 10no rĩrĩ, nĩngahurĩria rũirigo rũu rũa Turo mwaki, naguo ũrambie nyũmba cia ũnene iria irĩ kuo.

11 # Isa 34.5-17; 63.1-6; Jer 49.7-22; Ezek 25.12-14; 35.1-15; Obad 1.1-14; Mal 1.2-5. Ningĩ Jehova ekuuga ũũ: Tondũ wa mehia matatũ ma Edomu-rĩ, ĩĩ-ni, o na kũmakĩria nginya mana-rĩ, ndingĩhũndũra kũherithio gwakuo; nĩ ũndũ we nĩaathingatanire na mũrũ wa nyina na njomo, akemira tha ciothe, na marakara make magatamburanaga mategũtigithĩria, na agatũũra atũkũyanĩte matukũ mothe: 12no rĩrĩ, nĩngahurĩria Temani mwaki, naguo ũrambie nyũmba cia ũnene iria irĩ Bozara.

13 # Jer 49.1-6; Ezek 21.28-32; 25.1-7; Zef 2.8-11. Ningĩ Jehova ekuuga ũũ: Tondũ wa mehia matatũ ma ciana cia Amoni-rĩ, ĩĩ-ni, o na kũmakĩria nginya mana-rĩ, ndingĩhũndũra kũherithio gwakuo; nĩ ũndũ nĩmaatarũrire atumia a Gileadi me mahu, nĩ getha meyaraaramirie ndere cia kwao: 14no rĩrĩ, nĩngaakĩrĩria rũirigo rũa Raba mwaki, naguo ũrambie nyũmba cia ũnene iria irĩ kuo, na gũkorũo kũrĩ mũgũũthũkanĩro wa mũthenya wa mbaara, o na kĩhuhũkanio, mũthenya ũcio wa rũhuho ta rũa ngoma-cia-aka: 15na mũthamaki wao nĩ gũtahwo agatahwo, we mwene o hamwe na anene ake; ũguo nĩguo Jehova ekuuga.

Currently Selected:

AMOSI 1: OGKBIBLE

Highlight

Copy

Compare