ATŨMWO 21

1NA rĩrĩ, twarĩkia gwĩtigithũkania nao tũtekwenda, na kũhaica marikabu, tũgĩthiĩ tũrũngĩrĩirie tũgĩkinya Koosi, naguo mũthenya ũyũ ũngĩ tũkĩroka gũkinya Rodo, na twoima hau tũgĩkinya Patara. 2Na twona marikabu yendaga gũthiĩ Foinike, tũkĩmĩhaica tũgĩthiĩ nayo. 3Na rĩrĩa twaitĩkire kuona gĩthama gĩa Kuporo, tũgĩgĩtiga na mwena wa ũmotho, tũgĩthiĩ Suriata, tũkiumĩra marikabu Turo: tondũ nĩkuo marikabu ĩo yendaga kũrutĩrũo mĩrigo. 4Na twarĩkia gwĩtuĩrĩria arutwo tũkĩmona, tũgĩikara kuo mĩthenya mũgwanja. Nao arutwo acio, mataarĩtwo nĩ Roho, makĩĩra Paulo atĩ ndagathiĩ mbere akinye Jerusalemu. 5Na twagĩkorũo tũninĩte matukũ macio, tũkiumagara tũgĩthiĩ. Nao othe, marĩ hamwe na atumia ao o na ciana ciao, magĩtuumagaria magĩtũkinyia mbarĩ ĩrĩa ĩngĩ ya rũirigo rũa itũũra: na twarĩkia gũturia ndu hũgũrũrũ-inĩ cia iria rĩrĩa inene, tũgĩitĩka kũhoya: 6tũgĩcoka tũkiuganĩra ũhoro nao, tũgĩkĩhaica marikabu, nao makĩinũka.

7Na twarĩkia rũgendo rũa kuuma Turo, tũgĩkinya Petolemai, tũkĩgeithia ariũ a Ithe witũ arĩa maarĩ kuo, tũgĩikara nao mũthenya ũmwe. 8#Atũm 6.5; 8.5.Na mũthenya ũyũ ũngĩ tũkĩroka gũthiĩ, tũgĩkinya Kaisarea; tũgĩtonya nyũmba ya Filipu ũrĩa mũhunjia, nĩwe ũmwe wa andũ arĩa mũgwanja, tũgĩikara nake.

9Rĩu-rĩ, mũndũ ũcio aarĩ na ciana inya cia airĩtu arĩa maarathaga mohoro. 10#Atũm 11.28.Na twakorũo tũikarĩte matukũ maingĩ kuo, hagĩuka mũnabii wetagwo Agabo, oimĩte Judea. 11Na rĩrĩa aakinyire harĩ ithuĩ, akĩoya mũcibi wa Paulo akĩĩoha moko na magũrũ naguo, akiuga ũũ, Roho Mũtheru ekuuga atĩrĩ, Ũguo noguo Ayahudi makoha mũndũ ũrĩa mwene mũcibi ũyũ kũrĩa Jerusalemu, na mamũneane kũrĩ andũ a Ndũrĩrĩ. 12Na rĩrĩa twaiguire ciugo icio, ithuĩ o na andũ arĩa maatũũraga kuo tũkĩmũthaitha ndakae kwambata Jerusalemu. 13Hĩndĩ ĩo Paulo agĩcokia ũhoro atĩrĩ, Mũgwĩka atĩa, kũrĩra ũguo na kũnjagia hinya ngoro? Tondũ nĩndĩĩhaarĩrĩirie kuohwo, na to kuohwo gwiki, no makĩria o na kũũragwo njũragĩrũo kũu Jerusalemu nĩ ũndũ wa rĩĩtwa rĩa Mwathani Jesu. 14Na rĩrĩa aaregire gũtaarũo, tũgĩtiga tũkiuga atĩrĩ, Kũroekwo o ũrĩa Mwathani angĩenda.

15Na thutha wa matukũ macio tũkĩoha mĩrigo iitũ, tũkĩambata Jerusalemu. 16Na tũgĩtwarana na arutwo amwe a Kaisarea, nao magĩthiĩ na mũndũ wetagwo Mũnasoni wa kũrĩa Kuporo, ũrĩa watũire arĩ mũrutwo hingo ndaya, na nĩwe kwarĩkanĩirũo nake atĩ tũgaikara gwake.

17Na rĩrĩa twakinyire Jerusalemu, ariũ a Ithe witũ nĩmaatũkũngũĩire na gĩkeno. 18Na mũthenya ũyũ ũngĩ Paulo agĩtwarana na ithuĩ tũkĩroka kwa Jakubu; nao athuri othe maarĩ ho. 19Na aarĩkia kũmageithia, akĩheana ũhoro, athingatanĩtie wega, wa ũrĩa Ngai ekire andũ arĩa a Ndũrĩrĩ na ũndũ wa ũtungatĩri ũrĩa aamatungatĩire. 20Nao maaigua ũhoro ũcio makĩgooca Ngai, magĩcoka makĩmwĩra ũũ: Mũrũ wa Ithe witũ, ndũgũkĩona atĩ nĩkũrĩ Ayahudi ngiri nyingĩ metĩkĩtie? Nao othe marĩ na kĩyo gĩa kũhingia watho. 21Naho ha ũhoro waku-rĩ, nĩmerĩtwo atĩ nĩũrutaga: Ayahudi othe arĩa matũire Ndũrĩrĩ-inĩ atĩ matigane na kĩrĩra kĩa Musa, ũkĩmeraga atĩ matikae kũruithia twana twao, o na kana marũmagie mĩtugo ĩrĩa ya ndũire. 22Tondũ ũcio-rĩ, gũgũgĩtuĩka atĩa? Matirĩ hingo matarĩigua atĩ nĩũũkĩte. 23#Ndar 6.13-21.Nĩ ũndũ ũcio ĩka o ta ũrĩa tũgũkwĩra. Tũrĩ na andũ ana haha mehĩtĩte mwĩhĩtwa. 24Twarana nao, ũgetherie hamwe nao, na ũtuĩke wa kũmarutĩra mbia nĩ getha mahote kwenjwo mĩtwe yao: ũguo nĩguo andũ othe marĩhota kũmenya atĩ maũndũ marĩa maiguĩte ũhoro-inĩ waku ti ma ma: no atĩ nĩũthiaga na mĩthiĩre mĩega, ũkĩhingagia watho. 25#Atũm 15.29.No ha ũhoro wa andũ a Ndũrĩrĩ arĩa metĩkĩtie, nĩtwamaandĩkĩire marũa ma kũmamenyithia ituĩro riitũ, atĩ mathemage indo ciothe iria ithĩnjĩirũo mĩhianano, na thakame, na nyama cia nyamũ iria ciitĩtwo, o na ũmaraya. 26Hĩndĩ ĩo Paulo agĩtwarana na andũ acio, naguo mũthenya ũyũ ũngĩ akĩroka gwĩtheria hamwe nao, agĩtonya hekarũ akĩheana ũhoro wa rĩrĩa matukũ mao ma gũtherio makahinga, nĩrĩo ihinda rĩrĩa ihaki rĩkarutwo nĩ ũndũ wao mũndũ o mũndũ.

27Namo matukũ macio mũgwanja maakuhĩhĩria gũthira-rĩ, Ayahudi arĩa moimĩte Asia mona Paulo hekarũ-inĩ, magĩthogotha kĩrĩndĩ gĩothe, makĩmũnyita, 28makĩanĩrĩra makiugaga atĩrĩ, Andũ a Isiraeli, tũteithiei! Mũndũ ũyũ nĩwe ũrutaga andũ othe, kũndũ guothe, maũndũ ma gũcambia andũ aitũ, o na watho, o na handũ haha: o na ningĩ nĩ kũrehe ararehire Ayunani hekarũ thĩinĩ, aragĩĩkĩra handũ haha hatheru thahu. 29#Atũm 20.4.Tondũ kabere nĩmaramuonete itũũra-inĩ me hamwe na Terofimo mũndũ wa Efeso, na nĩwe megereirie atĩ Paulo nĩaramũtonyirie hekarũ thĩinĩ. 30Na kũu guothe itũũra-inĩ gũkĩgĩa ironjo, na andũ a kĩrĩndĩ makĩrũrũngana mahiũhĩte: magĩkĩnyita Paulo, makĩmũgucũrũria na hinya makĩmuumia hekarũ-inĩ: na kahinda o kau mĩrango ĩkĩhingwo. 31Na rĩrĩa mendaga kũmũũraga, ũhoro ũgĩkinyĩra mũnene ũrĩa wa mbũtũ ya athigari atĩ Jerusalemu guothe kwĩ na ngũĩ nene. 32Na o rĩmwe agĩgĩĩta athigari o na anene ao, magĩikũrũka harĩ kĩrĩndĩ mateng’erete. Nao andũ, rĩrĩa monire mũnene ũcio wa mbũtũ hamwe na athigari, magĩtiga kũhũra Paulo. 33Hĩndĩ ĩo mũnene ũcio agĩkuhĩhĩria Paulo akĩmũnyita, agĩathana atĩ ohwo na mĩnyororo ĩĩrĩ; agĩcoka akĩũrania, Nũ ũyũ, ningĩ ekĩte atĩa? 34Nakĩo kĩrĩndĩ no kĩaanagĩrĩra, amwe makoiga ũũ, na angĩ ũũ: nake aaremwo nĩ kũmenya ũhoro ũcio wega nĩ ũndũ wa ngũĩ ĩo, agĩathana atĩ atwarũo nyũmba ya athigari thĩinĩ. 35Na gũgĩtuĩka atĩrĩ, rĩrĩa aakinyire handũ harĩa haahaicagĩrũo, agĩkuuwo ndayaya nĩ athigari nĩ ũndũ wa wĩĩ wa kĩrĩndĩ; 36tondũ andũ acio aingĩ maarũrũnganĩte nĩ kũmuuma maamuumĩte thutha, makaanagĩrĩra makiugaga atĩrĩ, Mũndũ ũyũ nĩeherio!

37Na rĩrĩa Paulo aatigairie hanini atonyio nyũmba ĩo ya athigari, akĩũria mũnene ũcio wa athigari atĩrĩ, Nĩũkũ’he rũtha ngwĩre ũndũ? Nake akĩmũũria atĩrĩ, Githĩ nĩũũĩ kwaria Kĩyunani? 38Tiwe Mũmisiri ũrĩa warutithirie mbaara gatene, ũgĩtongoria andũ ngiri inya maarĩ oragani ũgĩthiĩ nao werũ-inĩ? 39Nowe Paulo akiuga atĩrĩ, Niĩ ndĩ Mũyahudi wa Tariso, itũũra rĩa bũrũri wa Kilikia, na itũũra rĩu ndaciarĩirũo rĩtiagĩte igweta: ndagũthaitha ũ’he rũtha njarĩrie kĩrĩndĩ. 40Nake Paulo, rĩrĩa aaheirũo rũtha nĩwe, agĩkiria andũ na guoko, arũgamĩte o hau haahaicagĩrũo. Na rĩrĩa maakorirũo makirĩte ki, agĩitĩka kũmaarĩria na mwarĩrie wa Ahibirania, akĩmera atĩrĩ:

Currently Selected:

ATŨMWO 21: OGKBIBLE

Highlight

Copy