2 TIMOTHEO 1
1
1NIĨ Paulo, mũtũmwo wa Kristo Jesu nĩ ũndũ wa ũrĩa Ngai endete, kũringana na kĩĩranĩro kĩrĩa eranĩire kĩa muoyo ũrĩa wĩ thĩinĩ wa Kristo Jesu, 2#Atũm 16.1.nĩ niĩ ndakwandĩkĩra marũa maya, wee Timotheo mwana wakwa ũrĩa nyendete mũno. Ũrogĩa na Wega na kũiguĩrũo tha o na thayũ, ciumĩte kwĩ Ngai Ithe witũ, o na Kristo Jesu Mwathani witũ.
3Nĩnjokagĩria Ngai ngatho, o we ũrĩa ndungatagĩra ndĩ na thamiri ĩtarĩ na mĩĩcuko, o ta ũrĩa maithe maitũ nao maamũtungatagĩra, ngĩkũririkanaga mahoya-inĩ makwa itegũtigithĩria; ngagĩtũũra ũtukũ na mũthenya 4ndĩĩriragĩria tuonane nawe, ngĩririkanaga maithori maku, nĩ getha gĩkeno gĩakwa kĩiganĩre. 5#Atũm 16.1.Nĩ kũririkanio ndirikanĩtio ũrĩa ũikaire wĩtĩkĩtie ũtarĩ na ũhinga, o ta ũrĩa ũcũguo Loisi aambire gwĩtĩkia, o na nyũkwa Eunike; o na ngamenya wega atĩ ũguo o nawe ũikaraga wĩtĩkĩtie. 6Tondũ ũcio nĩngũkũririkania atĩ ũhuhagĩrĩrie kĩheo kĩrĩa ũheetwo nĩ Ngai kiumanĩte na Wega wake, o kĩu wagĩire nakĩo na ũndũ wa ũrĩa ndakũigĩrĩire moko. 7Amu-rĩ, Ngai ndaigana gũtũhe roho wa gũtũma tũiguage guoya, no makĩria nĩ wa gũtwĩkĩra hinya na wendani na ũũgĩ wa ngoro.
8Hakĩrĩ ũguo-rĩ, ndũkanaconoke ũkiumbura ũhoro wa Mwathani witũ kana ũconoke nĩ ũndũ wakwa niĩ njohetwo nĩ ũndũ wake; no rĩrĩ, ĩtĩkĩra kũnyariranĩrio na niĩ nĩ ũndũ wa Ũhoro-ũrĩa-Mwega, kũringana na ũrĩa ũheagwo hinya nĩ Ngai. 9Nĩwe watũhonokirie, na agĩtwĩta na gwĩtana kũrĩa gũtheru etanaga nakuo; ti tondũ wa ciĩko ciitũ iria twĩkaga, no tondũ wa ũrĩa aatanyĩte gwĩka we mwene, na tondũ wa Wega wake ũrĩa aatũheire thĩinĩ wa Kristo Jesu mbere ya mĩndĩ na mĩndĩ; 10naguo rĩu nĩũguũranĩirio nĩ ũndũ wa ũrĩa Mũhonokia witũ Kristo Jesu okire akĩoneka, o we waninire gĩkuũ, agĩgĩtũma muoyo o na ũhoro wa kwaga kũbutha cianĩkwo ũtheri-inĩ na ũndũ wa Ũhoro-ũrĩa-Mwega, 11#1 Tim 2.7.o ũcio niĩ ndatuirũo mũhunjia na mũtũmwo o na mũrutani waguo. 12Nĩkĩo ndũire nyamarĩkĩte ũguo: ĩndĩ ndingĩconoka; nĩ ũndũ-rĩ, Ũrĩa njĩtĩkĩtie nĩndĩmũũĩ, na ngamenya wega atĩ nĩwe ũngĩhota kũmenyerera wega ũndũ ũrĩa ndahithirie kũrĩ we, kinya o rĩrĩa Mũthenya ũcio ũgakinya. 13Rũmagia wega mohoro marĩa maagĩrĩru monanĩrĩirio o mbere, o marĩa waiguire na niĩ, wĩ na wĩtĩkio na wendani, o iria irĩ thĩinĩ wa Kristo Jesu. 14Menyagĩrĩra wega ũndũ ũrĩa mwega waigirũo kũrĩ wee ũũramatage, ũgĩteithagio nĩ Roho Mũtheru ũrĩa ũtũũraga thĩinĩ witũ.
15Rĩu-rĩ, nĩũũĩ ũndũ ũyũ, atĩ andũ arĩa othe marĩ Asia nĩmaandiganĩirie; nao amwe nĩ aa Fugelo na Herimogene. 16Mwathani aroiguĩra andũ a nyũmba ya Onesiforo tha; nĩ ũndũ aana’nyamarũra kaingĩ. Ningĩ ndaaconokaga nĩ ũndũ wa ũrĩa ndarĩ muohe na mũnyororo; 17no rĩrĩa okĩte Roma, nĩaanduĩririe na kĩyo o nginya akĩnyona. 18(Mwathani aroetĩkĩra akaiguĩrũo tha nĩ Mwathani o Mũthenya ũcio wakinya). Na rĩrĩ, nĩũũĩ wega mũno ũrĩa maũndũ maingĩhĩte marĩa aandungatagĩra namo kũrĩa Efeso.
Currently Selected:
2 TIMOTHEO 1: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
