2 AKORINTHO 4
4
1TONDŨ wa ũguo, kuona atĩ tũrĩ na ũtungati ũcio nĩ ũndũ wa ũrĩa twaiguĩrĩirũo tha, nĩkĩo tũtoragwo nĩ hinya ngoro. 2Kũrega nĩtũregete kũgĩa na maũndũ marĩa mũndũ ahithaga nĩ ũndũ wa gũconoka, tũgakĩrega gũthiaga na mĩthiĩre ya wara, kana tũgathombocania uuge wa Ngai na maheni; ĩndĩ nĩ kwĩgathithia twĩgathithagia kũrĩ ngoro ya mũndũ o mũndũ mbere-inĩ ya Ngai, nĩ ũrĩa tũmenyithanagia ũhoro-wa-ma hatarĩ hitho. 3Na rĩrĩ, o na ũhoro witũ ũrĩa tũhunjagia ũngĩkorũo wĩ mũhumbĩre-rĩ, ũhumbĩirũo o andũ arĩa mekũũra, 4nĩo arĩa matetĩkĩtie, arĩa matumumarĩtio meciria mao nĩ ngai ĩrĩa ya gũkũ thĩ, nĩ getha ũtheri wa Ũhoro-ũrĩa-Mwega wa riri wa Kristo, o we ũrĩa ũrĩ mũhianĩre wa Ngai, ndũkae kũmaarĩra. 5Nĩ gũkorũo ti ũhoro witũ ithuene tũhunjagia, no nĩ ũhoro wa Kristo Jesu, atĩ nĩwe Mwathani, na atĩ ithuĩ tũrĩ ngombo cianyu nĩ ũndũ wa Jesu. 6#Kĩam 1.3.Tondũ Ngai, ũrĩa woigire atĩ, Ũtheri nĩware uumĩte nduma-inĩ, nĩwe waarire ngoro-inĩ ciitũ nĩ getha tuonanagie ũtheri wa kũmenyithia andũ riri wa Ngai, o riri ũcio wonekete ũthiũ-inĩ wa Jesu Kristo.
7No rĩrĩ, kĩgĩĩna kĩu kĩĩ bata ũguo-rĩ, tũtũire nakĩo ta arĩ nyũngũ ya rĩũmba tũgĩkuuĩte nayo, nĩ getha kũmenyeke atĩ ũhoti wakĩo ũrĩa mũnene, ũguo ũkĩrĩrĩirie-rĩ, uumaga kũrĩ Ngai, nduumaga kũrĩ ithuĩ. 8Nĩ kũhatĩkwo tũhatĩkagwo na mbarĩ ciothe, no tũtihingĩrĩirio; tũrigagwo nĩ ũrĩa tũgwĩka, no ti nginya tũũme tha; 9tũthingatagwo, no tũtitiganĩirio; kũrũndwo nĩtũrũndagwo na tũtininwo biũ; 10tũtũire hingo ciothe tũtitikaga mĩĩrĩ-inĩ iitũ ũhoro wa kũũragwo kwa Jesu, nĩ getha muoyo wa Jesu o naguo wonekage o mĩĩrĩ-inĩ ĩno iitũ. 11Amu ithuĩ arĩa tũrĩ muoyo-rĩ, tũtũire o tũneanagwo tũkue nĩ ũndũ wa Jesu, nĩ getha muoyo ũcio wa Jesu o naguo wonekage mĩĩrĩ-inĩ ĩno iitũ ĩkuaga. 12Hakĩrĩ ũguo-rĩ, gũgagĩtuĩka atĩ thĩinĩ witũ nĩ gĩkuũ gĩĩkaga maũndũ makĩo, no thĩinĩ wanyu-rĩ, nĩ muoyo. 13#Thab 116.10.No rĩrĩ, tondũ wa ũrĩa tũrĩ na roho wa gwĩtĩkia o ro ũmwe-rĩ, kũringana na ũrĩa haandĩkĩtwo ũũ, No ndetĩkĩtie, na nĩkĩo ndaaririe-rĩ, o na ithuĩ gwĩtĩkia nĩtwĩtĩkagia, naguo ũndũ ũcio nĩguo ũtũmaga twarie, 14O tũkĩmenyaga atĩ we ũrĩa wariũkirie Mwathani Jesu nĩagacoka gũtũriũkia o na ithuĩ hamwe na Jesu, na atũrũgamie mbere yake hamwe na inyuĩ. 15Amu maũndũ macio mothe mekagwo no ũndũ wanyu, nĩ getha Wega wa Ngai, ũkĩingĩhagio nĩ kũheo andũ aingĩ makĩria, ũtũmage ngatho o nacio ciingĩhio makĩria, nĩ getha Ngai agoocagwo.
16Hakĩrĩ ũguo-rĩ, tũtirĩ hingo tũũragwo nĩ hinya ngoro. Ĩndĩ-rĩ, o na gwatuĩka atĩ mũndũ witũ ũrĩa wa na igũrũ athiaga o akĩbuthaga-rĩ, mũndũ ũrĩa ũngĩ wa na thĩinĩ athiaga o akĩerũhagio mũthenya o mũthenya. 17Nĩ gũkorũo maũndũ maya mahũthũ tũthĩnagio namo rĩu, ma kahinda kanini-rĩ, nĩmo matũmaga tũreherũo o makĩria o makĩria riri mũnene mũno ũtarĩ hingo ũgathira. 18Tondũ tũtũũraga tũtacũthagĩrĩria maũndũ marĩa monekaga, tiga marĩa matonekaga; nĩ ũndũ maũndũ marĩa monekaga no ma ihinda, ĩndĩ marĩa matonekaga nĩ ma gũtũũra tene na tene.
Currently Selected:
2 AKORINTHO 4: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
