2 AKORINTHO 2
2
1No rĩrĩ, nĩ gũtua ndatuire na ngoro yakwa atĩrĩ, atĩ ndingĩcoka kwanyu ndĩ na kĩeha. 2Tondũ ndagĩtuĩka nĩ niĩ ngũmũiguithia kĩeha-rĩ, kaĩ mũndũ ũrĩa ũngĩkĩngenia niĩ arĩ ũrĩkũ, tiga o ũcio ũiguithĩtio kĩeha nĩ niĩ? 3Na ũhoro o ro ũcio noguo ndakĩandĩkire, nĩ getha ndoka-rĩ, ndikae kũiguithio kĩeha nĩ acio njagĩrĩirũo nĩ gũkenio nĩo, nĩ ũndũ nĩndehokaga ũhoro wanyu inyuothe atĩ niĩ ingĩkorũo ngenete-rĩ, o na inyuĩ inyuothe mwaya gũkena. 4Nĩ gũkorũo rĩrĩa ndamwandĩkĩire marũa macio-rĩ, ndamaandĩkire ’thĩnĩkĩte mũno, na ndĩ na ruo ngoro, o ngĩitaga maithori maingĩ; ndiamaandĩkire nĩ getha mũkaiguithio kĩeha, no nĩ getha mũmenye wendani ũrĩa mũnene mũno ndĩmwendete naguo.
5Na rĩrĩ, hangĩkorũo nĩharĩ mũndũ ũiguithanĩtie kĩeha-rĩ, to niĩ aiguithĩtie, no nĩ inyuothe aiguithĩtie kĩeha, kana hihi, (nĩguo ndikae gwĩkĩra ũhoro mũnoro-rĩ) njuge nĩ amwe anyu aiguithĩtie. 6Mũndũ ũcio-rĩ, ũndũ ũrĩa ekĩtwo nĩ andũ arĩa aingĩ anyu nĩũmũiganĩte; 7tondũ ũcio-rĩ, nĩ kaba mũkĩmuohere na mũmũhorerie, nĩ getha ndakae kũmerio nĩ kĩeha gĩkĩrũkĩte. 8Nĩ ũndũ ũcio ndakĩmũthaitha mũmũmenyithie wega ũrĩa mũmwendete. 9Amu-rĩ, gĩtũmi kĩngĩ gĩa kwandĩka marũa macio nĩ atĩ ndĩmũgerie, ’menye kana mũrĩ aathĩku maũndũ-inĩ mothe. 10Mũndũ ũrĩa inyuĩ mũngĩohera ũndũ, o na niĩ nĩndamuohera; amu niĩ hakwa-rĩ, ũndũ ũrĩa njoheire mũndũ, (ingĩgĩtuĩka ndĩ na ũndũ ndĩmuoheire-rĩ), ndĩmuoheire ũndũ ũcio nĩ ũndũ wanyu ndĩ mbere ya Kristo; 11nĩ getha tũtikahĩtwo nĩ Shaitani, one ũndũ wa gũtũhoota naguo; amu maũndũ marĩa athugundaga tũtirigagwo nĩmo.
12 #
Atũm 20.1. Na rĩrĩ, rĩrĩa ndakinyire Teroa kũhunjia Ũhoro-ũrĩa-Mwega wa Kristo, o na ndakorire nĩ ta mũrango ’hingũrĩirũo ngatungatĩre Mwathani kuo, 13ndiigana kũigua ta ndĩ mwaũre mũrigo ngoro-inĩ yakwa, nĩ ũndũ wa kwaga gũkora Tito, mũrũ wa Ithe witũ; ngĩgĩtiga ndoigĩra andũ akuo ũhoro, ngĩcoka ngĩthiĩ na mbere ngĩkinya Makedonia. 14No rĩrĩ, Ngai arogathwo, o we ũtũtwaraga hingo ciothe tũcanjamũkĩte nĩ gũtorania nĩ ũndũ wa Kristo, agĩtũmaga ũmenyi wa kũmenya ũhoro wake ũhunjanĩrio nĩ ũndũ wa wĩra witũ, ta arĩ mũtararĩko ũkũhunja kũndũ guothe. 15Nĩ gũkorũo tũhaana ta mũtararĩko mwega wa Kristo ũkinyaga kwĩ Ngai, tũkahaana ũguo harĩ andũ arĩa marahonokio, o na harĩ arĩa mekũũra. 16Kũrĩ acio mekũũra-rĩ, nĩ mũnungo uumĩte gwĩ gĩkuũ wa kũrehe ũhoro wa gĩkuũ, na kũrĩ acio marahonokio-rĩ, nĩ mũtararĩko uumĩte kwĩ muoyo wa kũrehe ũhoro wa muoyo. Nake nũ ũrĩ mũiganu wa kũhota gwĩka maũndũ macio? 17Amu ithuĩ-rĩ, tũtihaana ta andũ arĩa aingĩ matukanagia uuge wa Ngai na ũhoro ũtarĩ waguo, no rĩrĩ, tũũheanaga na mũheanĩre ũtarĩ wa ũhinga, ta tũtũmĩtwo nĩ Ngai, tũkaaragia twĩ thĩinĩ wa Kristo o tũkĩonagwo nĩ Ngai.
Currently Selected:
2 AKORINTHO 2: OGKBIBLE
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
