มาระโก 1
1
เลือง ยอน นเจ็น ปึง พซาซน
มัดทิว 3:1-12, ลูกา 3:1-9, 3:15-17, ยอน 1:19-28
1เลือง คาว เลาะ คาว แลม คอง เยซู คริด ควัน เอาซาง เกา เลือง ก็ ฮุนเน ดาย 2เกาตีนา เอาซาง ระ ลาม คอง ออ เคียน ระ อน ตัก นังซือ เอาซาง เอาซาง เพีย ไล ควัน ออ ตัก เยซู คือเน “บัดนะ เอิญ ระ ลาม คอง เอิญ โตะ วาล มัห เอิญ ก็ ระ ลาม ออ เพีย จ็อก เคิบ พซาซน เตียม ใจ อัห วาล ระ อัห ปัง แญง มัห เลาะๆ”#ค 2 “มัห” เป็น เยซู เลือง เน เป็น เอาซาง จ็อก เคิบ เยซู ลาม นัน อัง 3อิซยา ก็ เค็ย “ต็อง มี ครำ มี ล็อง จ็อก อุ เคิบ พซาซน ตัก ตี แลง คือเน ‘แป ต็อง เพีย เตียม ใจ ออ วาล ปัง แญง งกีจ็อง เลาะๆ ดาย’” นำ อัง มาลาคี 3:1, อิซยา 40:3
4เลือง เน ก็ กิว เกิด เล็ห ซีเละ มอก ลาม เพีย ไล นัน ยอน ตี จุบ อัห ตัก นอก นัน นำ ก็ โตะ ตัก ตี แลง ซีเละ มอก ลาม เอาซาง เพีย ไล อน นัน นำ ก็ นเจ็น พซาซน เคิง นัน ระ อัห เอิด ใจ แมะ ลด แอง พิที จุบ นอก เอาซาง ก็ ญ็อก แอ็ม ตี ลุห อัห
5ทาเน ก็ มี ครำ จาด ดก โตะ เจ็น จังวัด ยูเดีย เคิบ เมือง เยรูซาเล็ม อัห โตะ และ ยอน เป็น ปึง อัห ก็ ญอม ไล อน ตี ลุห คอง ออ ยอน ก็ ลด จุบ อัห ตัก นอก จอแดน นัน
6ยอน เน นำ จึห โกบ นโซก อูด ทาล เครด นำ ก็ เป็น ซวัห ซัด ซะ ป็อง คอง นำ ก็ เป็น งเค็ญ เคิบ ซิว มบวด 7ยอน ก็ ไล อัห คือเน “มี ครำ มี ล็อง โตะ แทะ เอิญ บัดนะ นำ ก็ แกะ กวา เอิญ วัล เอิญ ไอ มี วาดซนา โมด นัง ออ อีด ทาล แค็บ นำ เตาะ” ยอน อัง 8“เอิญ จุบ แป ตัก นอก ลือๆ แต ล็อง นะ นำ จุบ แป ตัก ซีมาล เอาซาง ฮัก”#ค 8 จุบ ตัก ซีมาล เอาซาง ซีแล็ม เค็ย ซีมาล เอาซาง โตะ อุ ใน นัง ครำ ตี เจือ เอาซาง ดอม ตัวแทน เยซู 2:1-4 ยอน อัง
เยซู จุบ ตัก นอก
มัดทิว 3:13-17, ลูกา 3:21-22
9ญาม นัน เยซู ก็ เริล เจ็น งวัล นาซาเร็ด จังวัด กาลิลี นำ โตะ และ ยอน จุบ ออ ตัก นอก จอแดน นัน 10ท็อบ เยซู ทอก เจ็น นอก วาง ก็ พลาง ซิห นำ ลด เม็จ ซีมาล เอาซาง จูล โตะ อุ เคิบ ออ มอก เซ็ม งกรุก 11แลว ก็ มี แญง จ็อก เจ็น วาง ทึห คือเน “มัห เป็น ควัน ตี เอา รัก ดก ทีซุด เอา ปอใจ อัง มัห ซีเละ ดาย ควัน” แญง นัน อัง
ซาตาน จุ เยซู
มัดทิว 4:1-11, ลูกา 4:1-13
12ทาเน ซีมาล เอาซาง ก็ ลด ไล เยซู เริล ตัก ตี แลง 13นำ อุ ตัก นัน ซีซิบ งิ แลว ปรอง คึด ก็ โตะ จุ ซุย นำ นำ ก็ อุ เคิบ ปึง ซัด นโจ ปึง เทวาดา ก็ โตะ จวย รักซา ดอม นำ
เยซู มพอล ครำ โละ คา ซี ล็อง
มัดทิว 4:12-22, ลูกา 4:14-15
14แทะ นัน วัล ก็ มี ครำ โตะ เญ็บ ยอน เติล ระ ตัก ลุก เจ็นนัน เยซู ก็ เริล ตัก จังวัด กาลิลี นำ เริล เลามุน เลือง คาว เลาะ คาว แลม คอง เอาซาง อน อัห ปัง 15นำ ไล อัห คือเน “เอาซาง บัก และ ระ พะเจายูฮัว ออ โตะ ปกคอง แป แลว ดาย ครอ ระ แป เอิด ใจ แมะ เจือ ปัง คาว เลาะ คาว แลม เน ดาย” นำ อัง 16เจ็นนัน เยซู ก็ นจาง เริล ตาม เปล นอก ทะเล กาลิลี นำ เม็จ ครำ เปียะ ล็อง ตัก นัน ปาม มี อาซีบ โละ คา นไจ ซือ ตัก ซีโมน ควน นำ ซือ ตัก อันดรู ปาม กำลัง ลาก อวน#ค 16 “อวน” แอ และ คา ตัก นอก แย็ด แอ ซิห มอง อัห และ คา ตัก นอก ทะเล อัห ต็อง ซิห อวน แต อวน จ็อง ซีเละ ต็อง มี เฮือ ลาก อุ ตัก นอก ทะเล นัน 17ทาเน เยซู ก็ มพอล ปาม คือเน “ปา เริล เคิบ เอิญ ดาย เอิญ ระ ปา และ ครำ ฮัก ไอ แมน และ คา เตาะ” นำ อัง 18ปาม ก็ มเพิล พระ เนิ๊ก ลด เริล เคิบ เยซู 19เยซู นจาง เริล ซม มี ติด วัล นำ ก็ เม็จ อัหคล็อง เปียะ ล็อง วัล ปาม เป็น ควน เคิบ นไจ ซือ ตัก ยากอบ มี ล็อง ซือ ยอน มี ล็อง ปาม เป็น ควัน เซเบดี ปาม กำลัง ปลอด อวน อุ ตัก เฮือ นัน 20เยซู ก็ ลด มพอล ปาม เริล เคิบ ออ ปาม ก็ ลด พระ อวน พระ เอา พระ ลูกนอง ตี อุ ตัก เฮือ นัน ปาม ลด เริล เคิบ เยซู
เยซู จวย ครำ ปรอง กุด
ลูกา 4:31-37
21ทาเน เยซู เคิบ ลูกนอง ซี ล็อง นัน ก็ เริล ตัก งวัล คาเปอนาอุม เล็ห วัน เซา#ค 21 วัน เซา เป็น งิ ที 7 ซำรับ อัห เล็ห งิ ที 7 นัน ตัก อิง เอาซาง ก็ มบราง ครำ ยิว แองกาน อัห ต็อง มโบละ มี งิ แต ซะไม เยซู นัน ครำ ยิว เพิม กด ดก มบลึ ไล อัห กำ ตัก วัน เซา นัน ดก ลบ อัห เทียง เยซู เลือง นำ จวย อัหซอ ตัก งิ มโบละ นัน (ดอม อิซราเอล ญาย 20:8-11) ตัก เป็น งิ มโบละ ครำ ยิว นัน เยซู ก็ กุด นเจ็น อัห ตัก ฮ็อง พซุม 22แลว อัห ปัง นำ นเจ็น ออ แลว อัห ก็ ญ็อก งึด อัง แญง นำ เพาะวา นำ นเจ็น อัห ไอ มี เมือน ปึง อาจาน ครำ ยิว ซัง นำ นเจ็น อัห มอก ครำ มี ซิด มี อำนาด คอง ออ ฮัก 23ญาม นัน ก็ พวม มี ครำ ปรอง กุด มี ล็อง โตะ ตัก ฮ็อง พซุม ครำ ยิว นัน 24ล็อง ตี ปรอง กุด นัน ก็ นซาก งกรอ แร็งๆ คือเน “เยซู ครำ นาซาเร็ด เฮย มัห โตะ ญุง เคิบ อิห อังวะ เน มัห โตะ ทำลาย อิห ก้า อิห เม็จจึด แลว มัห เป็น ครำ ซักซิด คอง เอาซาง ฮัก” เย็ห อัง 25เยซู ก็ แร็ด จ็อก ซิห เย็ห “เค็ด อุ มัห ทอก ปัด แอ็ม เจ็น ล็อง เน” เยซู อัง
26ปรอง นัน ก็ แอง ระ ล็อง นัน เพลิด อุ แด็ดๆๆ เย็ห ก็ นซาก แร็งๆ ลด ทอก ปัด แอ็ม เจ็น ล็อง นัน 27ครำ ตี เม็จ อัห ก็ ญ็อก งึด อัง เยซู มด อัห ก็ ซ็วน นอย ฮุนเน “เป็น แญง แมะ ซีวะ จังนะ บ็อห นำ มี ริด มี อำนาด ซีเละ นำ ไล ปรอง ปัด เย็ห ก็ ปัง แญง นำ” อัห อัง 28ครำ ทัว จังวัด กาลิลี นัน อัห ก็ ลด เม็จ คาว เลือง เยซู มด
เยซู รักซา ครำ โซะ ดก ล็อง
มัดทิว 8:14-17, ลูกา 4:38-41
29เจ็นนัน อัห ก็ ทอก เจ็น ฮ็อง พซุม อัห ลด เริล ตัก เจิง ซีโมน เคิบ อันดรู ยอน เคิบ ยากอบ ก็ เริล เลิม 30เมเทา ซีโมน ก็ ไอ มี เลาะใจ นำ อวย อุ เป็น คัด นำ อัห ก็ ลด ไล เยซู เค็ย เมเทา ซีโมน โซะ 31เยซู ก็ โตะ ทาก ที นำ จวย นำ ร็อห นำ ก็ ลด งาล โซะ ลด แอง ซะ ป็อง เลียง อัห วัล 32เจ็นนัน ก็ แจ็ล เทิ๊บ งิ แลว ปึง ครำ งวัล นัน ก็ ซับ ครำ โซะ ครำ ปรอง กุด โตะ และ เยซู ทึดๆ 33ครำ ใน งวัล นัน อัห โตะ ตัก เด็นเตะ เจิง ซีโมน เป็น ปึง 34เยซู ก็ จวย รักซา ครำ ตัก โซะ ซะ เน ซะ นัน ดก มบลึ ระ อัห งาล เลาะ เล็ห วัล นำ ก็ มบรึห ปรอง ทอก เจ็น อัห ดก ล็อง ปึง ปรอง นัน เย็ห เม็จจึด แลว เค็ย เยซู เป็น ซีเอ แต เยซู ก็ มบราง เย็ห ไอ มี ระ เย็ห จ็อก เย็ห ก็ เค็ด อุ
เยซู นเจ็น อัห ตัก จังวัด กาลิลี
ลูกา 4:42-44
35ทาเน ตุด ตัก งกร็อห วาล ไอ ตัน คล็อย ซะ นัน เยซู ก็ เริล ซะร็อห ฮัก มี ล็อง เดียว นำ เริล ตัก ตี ลงๆ ซะ ตี ไอ มี ครำ นำ ก็ ครอ วอน เคิบ เอาซาง เคิง นัน 36ทาเน ปึง ซีโมน เคิบ อัห ตัก อุ เลิม นัน ก็ กวา โละ และ เยซู 37อัห เม็จ นำ แลว อัห ก็ ไล นำ คือเน “อิห จู ล็อง โละ และ มัห ดาย” อัห อัง 38เยซู ก็ ไล อัห คือเน “แอ เริล ตี ซอ วัล นอ แอ เริล งวัล ตี อุ ติๆ พาเน เพาะวา เอิญ โตะ ตัก โลก แพนซิก เน ก็ เพือ โตะ นเจ็น พซาซน ดาย” นำ อัง 39เจ็นนัน วัล นำ ก็ เริล งวัล ซอ ทัว จังวัด กาลิลี นัน นำ ก็ นเจ็น อัห ตาม ฮ็อง พซุม ยิว นัน นำ ลด มบรึห ปรอง ทอก เจ็น อัห ดก ล็อง วัล
เยซู จวย ครำ คีเฮือน
มัดทิว 8:1-4, ลูกา 5:12-16
40ทาเน ก็ มี ครำ เป็น คีเฮือน มี ล็อง โตะ และ เยซู นำ ก็ คุกโคล ครอ วอน เยซู คือเน “อาจาน ครอ เคิบ มัห จวย เอิญ แด ดาย กัน มัห ซีรอก จวย เอิญ มัห ก็ แอง ระ เอิญ งาล โซะ กุญ มด” นำ อัง 41เยซู ก็ ที ดอม นำ ซีตึ อัง นำ เยซู ก็ นจืน ที คอบ นำ เยซู ลด จ็อก คือเน “เอิญ เลาะใจ จวย มัห ดาย มัห งาล โซะ นทึห เตาะ” เยซู อัง 42เอา นัน ก็ ลด งาล โซะ มด ตึง นัง 43วาล ไอ ตัน เอา นัน เริล เยซู ก็ มบก ไล นำ คือเน 44“มัห อำ เลามุน เลือง เน อน ซีเอ ปัง ดาย แต มัห เริล มแบละ นัง ออ อน ตัก ปึง มอ เอาซาง ดอม วาล เจ็นนัน มัห ก็ ต็อง ซับ ซะ ทวาย อน ตัก เอาซาง แอง ฮุน โมเซด ไล อน ดาย มัห แอง ฮุนเน ก็ ระ อัห เม็จจึด เค็ย มัห เลาะ เล็ห แลว” เยซู อัง เยซู ก็ ลด ไล นำ เริล ออ 45แต ปน เอา นัน ทอก เริล ออ แลว นำ ก็ กวา โละ เลามุน อน อัห ปัง เลอะ ค็อย งวัล มด เจ็นนัน เยซู กุด เมือง นเดย ระ อัห เม็จ นัง ออ ก็ ไอ มี กุญ เตาะ นำ ลด อุ ตัก ซะร็อห ฮัก แต ก็ มี ครำ งวัล ซอ ดก งวัล โตะ และ นำ
Currently Selected:
มาระโก 1: Prai
Highlight
Share
Copy
Want to have your highlights saved across all your devices? Sign up or sign in
Global Partners
