มัดทิว 17
17
นัง เยซู เปียน
มาระโก 9:2-13, ลูกา 9:28-36
1ฮก งิ เจ็นนัน วัล เยซู ก็ ก็อห ญวัง ทึห นำ เอิด เปโตร นำ เอิด ยากอบ เคิบ ยอน ตัก เป็น ควน เคิบ นไจ นัน เริล เลิม อัห อุ ตัก ญวัง นัน จุม อัห ซี ล็อง ฮัก 2เล็ห ทึห แลว ลูกนอง เยซู แพะ ล็อง นัน อัห ก็ ดอม เยซู อุ นัน ทาเน นัง เยซู ก็ เปียน มัด นำ ก็ ทาง มอก งิ คัว นำ ก็ พัห ซัล 3เจ็นนัน อัห ก็ เม็จ พด โตะ โมเซด เคิบ เอลียา#ค 3 โมเซด เคิบ เอลียา เน ปาม เป็น ครำ ตี ซับ แญง เอาซาง อน ตัก ครำ อิซราเอล ตี ปาม โตะ จ็อก เคิบ เยซู นัน ก็ มอก แญง เอาซาง รับรอง เยซู แลว โตะ จ็อก อุ เคิบ เยซู นัน 4เปโตร ก็ ซ็วน เยซู คือเน “นาย เฮย แอ อุ เน ก็ เลาะ นอ กัน มัห ซีรอก ระ เอิญ แอง ตุบ อน แป เอิญ ก็ แอง อน แป ดาย แอง อน มัห มี ลัง โมเซด มี ลัง เอลียา มี ลัง นอ” เปโตร อัง
5ญาม เปโตร ควะ จ็อก อุ เคิบ เยซู นัน ก็ พด เล็ห บด บด นะ ปุก ระ อัห บด นะ ทาง ซีเละ เจ็นนะ ก็ มี แญง จ็อก ตัก บด นัน ฮุนเน “เน เป็น ควัน เอิญ ตี เอิญ รัก ดก ทีซุด ดาย เอิญ ปอใจ อัง นำ ซีเละ แป ต็อง ปัง แญง นำ เลาะๆ ดาย” แญง นะ อัง#เกาตีนา 22:2, เพลง เอาซาง 2:7, อิซยา 42:1, มัดทิว 3:17, 12:18, มาระโก 1:11, ลูกา 3:22, กด ลบ ซอง 18:15, 2 เปโตร 1:17-18
6ญาม แป เปโตร เม็จ แญง นะ จ็อก คือนัน อัห ก็ แร็ง นเจิก อัห ก็ ซีเลิบ มัด เพิล พระ อวย อุ ตัก ซิก 7เจ็นนัน เยซู ก็ โตะ ทุๆ อัห นำ ไล อัห ร็อห “ร็อห เนอ อำ นเจิก เตาะ” นำ อัง 8อัห ก็ ดอม โตน ดอม แต็ห เม็จ เยซู มี ล็อง เดียว ฮัก ไอ มี เม็จ โมเซด เคิบ เอลียา เตาะ
9เจ็นนัน อัห ก็ จูล เจ็น ญวัง ญาม อัห กำลัง นจาง จูล นัน เยซู ก็ ไล อัห คือเน “ซะ ตี แป เม็จ เน อำ แป ไล ซีเอ ดาย เพาะวา เอิญ เปิล ลบ วัล รีด เล็ห วัล ซัง แป กอย ไล อัห ดาย” เยซู อัง
10เจ็นนัน ปึง ลูกนอง นัน ก็ ซ็วน เยซู คือเน “ปึง อาจาน ตี ไล กด เอาซาง อน ตัก แอ นัน อัห เค็ย เอลียา ต็อง โตะ วาล ซัง โตะ ล็อง นัน ตี ปกคอง แอ ซีวะ อัห เค็ย เอลียา ต็อง โตะ วาล นำ” อัห ซ็วน เยซู จังนะ 11เยซู ก็ ไล อัห คือเน “เอลียา โตะ วาล ซีเละ เอลียา ต็อง โตะ เตียม จู มบลึ วาล ระ เลาะ เล็ห มอก เครม ซัง โตะ ล็อง นัน ตี ปกคอง แป ตี อาจาน ไล แป นัน ก็ แคระ แลว ดาย 12เอิญ ไล แป นังเลาะ นะ เอลียา โตะ แลว แต ปึง ซะ แกะ ไอ มี เม็จจึด เค็ย นำ เป็น เอลียา อัห ก็ วาง แอง ไอ มี เลาะ ซิห นำ ตาม ใจ ออ แลว บัดนะ อัห ก็ แอง ไอ มี เลาะ ซิห เอิญ ตี เอาซาง ระ เกิด เป็น ครำ เน เมือนนอย” เยซู ไล ลูกนอง ออ จังนะ 13เจ็นนัน ปึง ลูกนอง เยซู อัห ก็ เคาใจ เค็ย เยซู ซักพืน เลือง ยอน ตี จุบ อัห ตัก นอก นัน มาลาคี 4:5, มัดทิว 11:14
เยซู จวย ควัน บาว ปรอง กุด
มาระโก 9:14-29, ลูกา 9:37-43
14แลว เยซู เคิบ ลูกนอง จูล เจ็น ญวัง นัน แลว เยซู ก็ โตะ และ ปึง พซาซน ตี เพา นำ อุ ตัก เจ็ง ญวัง นัน ทาเน ก็ มี อัหคล็อง มี ล็อง เล็ง โตะ กราบ ไว เยซู 15นำ ไล เยซู คือเน “อาจาน ครอ ตึ อัง ควัน เอิญ ดาย นำ เป็น บัด เป็น เฮิ๊ด#ค 15 เป็น เพิล แร็ง เป็น ซีเละ นำ คลิห ตัก โอด ดก ลบ นำ คลิห ตัก นอก ดก ลบ แลว 16เอิญ ซับ นำ ตัก ลูกนอง มัห ระ อัห จวย รักซา นำ แต ปึง ลูกนอง มัห จวย ไอ มี กุญ” เอา ล็อง นะ อัง
17เยซู ก็ ซวัล ฮุนเน “ฮีเอิห แป เน ลืน ซีเละ นอ ซีวะ ไอ มี เจือ เอาซาง บ็อห นอ เอิญ ต็อง อด อุ เคิบ แป อิง ปานเดย บ็อห ซัง แป เจือ เอาซาง ซัง แป เคาใจ แร็ง เอาซาง มัห ซับ ควัน ออ โตะ แต็ห เน ดาย” เยซู อัง 18เจ็นนัน อัห ก็ ซับ ควัน บาว ล็อง นะ ตัก เยซู เยซู ก็ มบรึห ปรอง ทอก เจ็น ล็อง นะ แลว เย็ห ทอก ปัด ออ แลว ควัน บาว ล็อง นะ ก็ ลด เลาะ เล็ห
19แลว ปน เยซู เจ็น ครำ ดก นัน แลว ปึง ลูกนอง เยซู อัห ก็ ซ็วน เยซู จุม อัห ฮัก “เอ อาจาน ซีวะ อิห มบรึห ปรอง นัน ไอ มี กุญ บ็อห” อัห อัง
20เยซู ก็ ไล อัห คือเน “ก็ เป็น ตัก แป ไอ มี ปอ เจือ เอาซาง เอิญ ไล แป นังเลาะ นะ กัน แป เจือ เอาซาง ตีดต็อง มอก พรัน มบัห โคระ มี แก็น เดียว นัน กัน แป เจือ เอาซาง ตีดต็อง มอก นัน แป ไล ญวัง เน ญาย เริล ตี ซอ เย็ห ก็ ปัง แญง แป มด ดาย กัน แป เจือ แป แอง ซีวะ ก็ กุญ มด”#ค 20 นังซือ เครม แกด เล็ม อัห ก็ ซิห ค 21 อัห เค็ย “ปรอง แบบ เน แป ต็อง อด จะ ครอ วอน เอาซาง ติกๆ ซัง เย็ห ทอก แอ็ม” ดอม มาระโก 9:29 เยซู อัง#มัดทิว 21:21, มาระโก 11:23, 1 โคริน 13:2
เยซู ไล อัห เค็ย นำ ต็อง เปิล
มาระโก 9:30-32, ลูกา 9:43-45
22เจ็นนัน เยซู เคิบ ปึง ลูกนอง ก็ โตะ ซุม นอย อุ มี ตี นะ ตัก จังวัด กาลิลี นัน เยซู ก็ ไล อัห คือเน “เอิญ เน ตี เอาซาง ระ เกิด เป็น ครำ เอิญ ต็อง โซะ ต็อง เปิล ดาย อัห ต็อง มอบ เอิญ อน ตัก อัหซอ มเบิล แอ็ม 23แต เปิล แพะ งิ แลว เอาซาง ก็ ระ เอิญ รีด เล็ห วัล” เยซู อัง ปึง ลูกนอง เม็จ เยซู ไล อัห จังนะ อัห ก็ ตุกใจ เซียใจ ซีเละ ไอ มี เลาะใจ ปัง เตาะ
เลือง ต็อห พาซี วิฮาน เอาซาง
24เจ็นนัน เยซู เคิบ ลูกนอง ออ ก็ เริล งวัล คาเปอนาอุม เล็ห ตัก งวัล คาเปอนาอุม แลว ก็ มี ครำ โตะ เก็บ พาซี ซำรับ พัดทะนา วิฮาน#ค 24 “พาซี วิฮาน” ครำ ยิว จู ล็อง ต็อง ต็อห พาซี มี วาง นเดย มี ลบ มี ล็อง นเดย อัห ต็อง ต็อห เปียะ เลียน เปียะ เลียน นัน มอก ญิม จาง เปียะ งิ อัห โตะ ซ็วน เปโตร ฮุนเน “อาจาน แป นำ ต็อห พาซี ซำรับ พัดทะนา วิฮาน อัน” อัห อัง อิซราเอล ญาย 30:13, 38:26
25“นำ ต็อห กา” เปโตร อัง เจ็นนัน เปโตร ก็ กุด ควังใน เจิง และ ไล เยซู แต นำ ไอ มี ตัน ไล เยซู เค็ย อัห ซ็วน ออ เยซู ก็ ซ็วน นำ วาล คือเน “ซีโมน มัห กึด จังนัก บ็อห จู ปะเทด ทัว โลก เน ปึง พะเจายูฮัว อัห เก็บ พาซี ตัก อีเอ บ็อห ไล ดก อัห เก็บ ตัก ควัน นำ ลู อัห เก็บ ตัก ครำ ซอ” เยซู ซ็วน นำ จังเน 26เปโตร ก็ ซวัล นำ คือเน “ไล ดก อัห เก็บ ตัก ครำ ซอ ครำ ซอ ต็อง ต็อห พาซี อน พะเจายูฮัว ไอ มี อัห เก็บ ตัก ควัน พะเจายูฮัว เตาะ” เปโตร อัง เยซู ก็ ซวัล เปโตร “กัน จังนะ ควัน พะเจายูฮัว ก็ ไอ มี จำเป็น ต็อห พาซี เตาะ นอ 27ทาเน แอ ตี เป็น ครำ คอง เอาซาง แอ ก็ ไอ มี จำเป็น ต็อห เงิน วิฮาน เอาซาง เตาะ นอ แต แอ ไอ มี ซีรอก มี เลือง เคิบ อัห นอ แอ อน อัห ก็ เลาะ เปโตร มัห เริล ซิห เบ็ด ดาย มัห เริล ซิห เบ็ด ตัก นอก มัห กุญ คา มี นัง มัห วัห งกาบ คา นัน มัห ก็ เม็จ เงิน อุ นัน มี เลียน มัห เอิด เงิน นัน ต็อห อน ตัก อัห ซำรับ อา เปียะ ล็อง นอ” เยซู อัง
Currently Selected:
มัดทิว 17: Prai
Highlight
Share
Copy
Want to have your highlights saved across all your devices? Sign up or sign in
Global Partners
