ตัวแทน 27
27
เปาโล เคิบ เปือน ต็อก เฮือ เริล โรม
1แลว ปึง เจานาย ตกลง ระ อิห ต็อก เฮือ เริล ปะเทด อิดตาลี แลว อัห ก็ มอบ เปาโล เคิบ นักโทด ล็อง ซอ อน ตัก นายรอย มี ล็อง นายรอย ล็อง นะ ซือ ตัก ยูเลียด ยูเลียด เน นำ เป็น ทฮาน กอง พัน พะเจายูฮัว ออกาตัด อัห ก็ มอบ นักโทด อน ตัก นำ ระ นำ คุม นักโทด นัน เริล เมือง โรม 2ทาเน ก็ มี เฮือ มี ลำ โตะ เจ็น เมือง อัดรามิทิยุม อัห กำลัง ซับ เฮือ นัน เริล ตาม เปล นอก ทะเล เฮือ นัน ก็ แวด ดก เมือง ตัก จังวัด เอเซีย อิห ก็ ต็อก เฮือ ลำ นัน เริล ก็ มี ครำ มาซีโดเนีย มี ล็อง นำ โตะ เจ็น เมือง เทซะโลนิกา ซือ นำ ตัก อาริทาคัด นำ ก็ ต็อก เฮือ เลิม เคิบ อิห นัน
3คือ งิ กรัก อิห ก็ แวด ตัก เมือง ไซดอน นายรอย ยูเลียด นัน นำ แอง เลาะ ซิห เปาโล ซีเละ นำ ก็ ระ เปาโล แวด แอว ดอม เปือน ตัก เมือง ไซดอน นัน กุญ ระ เปือน เปาโล กุญ จวย เปาโล วัล 4เจ็นนัน อิห ก็ ต็อก เฮือ เริล เจ็น เมือง ไซดอน ติกๆ ไอ มี จับ ลาย งกริม อิห ก็ ลด มพัล เกาะ ไซปรัด เริล ลัห เพียห นเดิด งกริม 5อิห ก็ คาม นอก จ็อง ตัก อุ ทิง จังวัด ซีลีเซีย เคิบ จังวัด ปำฟีเลีย ลัห เซอะ นัน อิห เริล ติกๆ จำปอ เล็ห ตัก เมือง มีรา ตัก อุ จังวัด ลีเซีย อิห ลด จอด เฮือ มพลิห ตัก นัน
6ทาเน นายรอย ยูเลียด เม็จ เฮือ มี ลำ ตัก เมือง มีรา นัน เฮือ ลำ นัน เล็ห เจ็น เมือง อเล็กซานเดีย บัก และ เริล ปะเทด อิดตาลี นายรอย ยูเลียด ก็ ระ อิห ต็อก เฮือ ลำ นัน เริล 7เฮือ อิห ก็ ซำ เริล จา ซีเละ เป็น ตัก แร็ง งกริม นทูด ไล มัด อิห ต็อก เฮือ เริล ดก งิ ซัง โตะ ตัก เมือง คะนีดัด ไอ มี เลาะ ลาย งกริม วัล อิห ก็ ลด เปียน รวง เริล ลัห นเซอะ ตัก นอก จุ นัน เริล นเซอะ จำปอ เล็ห ตัก เกาะ ครีด ลัห เพียห เซอะ วัล อิห ก็ พาน เมือง ซัลโมเน เริล อิห ซอบ เปล เกาะ ครีด เริล ลัห เพียห นเดิด งกริม นัน 8ทาเน ก็ ญาก เริล ซีเละ อิห ก็ ลด ซอบ เริล ติๆ เคิบ เปล ซิก จำปอ เล็ห ตัก งวัล ทางาม ตัก อุ นดิ เมือง ลาเซีย นัน
9ทาเน อิห ก็ เซีย เวลา ดก งิ แลว กัน อิห เริล ก็ อันตะราย ซีเละ เพาะวา เทซกาน อด จะ ก็ ปน แอ็ม แลว นวจ อัห ต็อก เฮือ ตี ปอดไพ นัน ก็ ปน แอ็ม แลว เปาโล ก็ ลด เพีย ไล อัห ฮุนเน 10“ดอม เนอะ แป เฮย แอ เริล ลบ เน แอ ก็ เซีย ฮาย ดก ซีเละ ดาย ไอ แมน เตา เฮือ เคิบ ซะ คอง แอ เซีย ฮาย เตานะ ดาย แอ ก็ เปิล เมือนนอย ฮุ” นำ อัง 11แต นายรอย ยูเลียด ไอ มี เจือ เปาโล นำ เจือ ครำ คับ เฮือ เคิบ งกี เฮือ ฮัก
12ทาเน อัห ไอ มี ซอบ พัก อุ ตัก ทางาม นัน เตาะ เพาะวา งกก นอก นัน ไอ มี ปอ เลาะ จอด เฮือ ตัก นา เคด ไอ มี นเดิด งกริม ครำ ไล ดก อัห ซีรอก เริล ติกๆ กัน เริล กุญ อัห อง เริล ตัก เมือง ฟีนิก เมือง ฟีนิก เน อุ ตัก เกาะ ครีด นัน แต มี งกก นอก อุ ลัห เซอะ ตัก นัน ก็ เลาะ นเดิด งกริม อัห อง พัก อุ ตัก นัน จำปอ ปน แอ็ม นา เคด
เล็ห งกริม จ็อง เฮือ ก็ แตก
13เจ็นนะ ก็ เล็ห งกริม แย็ดๆ นทูด โตะ เจ็น เซอะ ปึง อัห เยา เลาะ ลาย งกริม ฮุน อัห กะ วาล นัน อัห กึด เค็ย เลาะ เริล อัห ก็ เด็ง เอิด ซะมอ ตี เกาะ ซิก ระ ควังใน เฮือ อัห ก็ คับ เฮือ เริล อัห อง ซับ เฮือ เริล ติๆ เคิบ เกาะ ครีด ลัห เพียห เซอะ นัน 14ทาเน อิห เริล ไอ มี ปอ อิง ก็ พด เล็ห งกริม จ็อง เจ็น งคม#ค 14 อัห มพึ ซือ งกริม นัน ตัก “ยูราควิลโล” ซีแล็ม เค็ย “งกริม เจ็น งคม” งกริม เล็ห เจ็น งคม นัน แร็ง ซีเละ งกริม นัน แร็ง ซีเละ 15งกริม จ็อง นัน ก็ ปึด ปึห เอิด เฮือ เริล อิห ก็ เด็น ซับ เฮือ ตัก เกาะ ก็ ไอ มี แป อัง เตาะ ไอ มี จางรู อิห ซับ เฮือ ตัก งกริม อิห ก็ ลด ระ เฮือ เริล ตาม งกริม ฮัก
16-17ทาเน งกริม ก็ ปึห เอิด เฮือ อิห เริล ติกๆ จำปอ เล็ห ตัก เกาะ คาวดา อิห ก็ พาน เกาะ คาวดา นัน เริล เพียห เซอะ นเดิด งกริม มี ติด เฮือ แย็ด ตี อิห ท็อก ระ ตัก ลอล เฮือ จ็อง นัน อิห ก็ ญ็อก เอิด ท็อก ซิห ตัก เฮือ จ็อง ลัห ทึห ก็ บัก ไอ มี แป อัง ตัก แร็ง ดก งกริม นทูด แลว อิห ญ็อก เอิด เฮือ แย็ด ซิห ตัก เฮือ จ็อง นัน แลว อิห ก็ เอิด ทาล จ็อง มบัล ท็อก เฮือ ลำ จ็อง นัน ระ อน แก็นๆ ทาเน อัห ก็ นเจิก เฮือ นัน แคระ อัง ดอน ซาย เซอทิด อัห ก็ อีด แอ็ม พา ไบ ระ เฮือ นัน จา เริล มี ติด อัห ก็ ระ เฮือ เริล ตาม งกริม นัน ฮัก 18งกริม จ็อง นัน ก็ นทูด เอิด เฮือ เริล ติกๆ คือ งิ กรัก อัห ก็ เอิด ซะ ตี อัห ตาง ตัก เฮือ นัน กวาง แอ็ม ตัก นอก 19อุ เจ็นนัน แพะ งิ วัล อัห ก็ ลบ วัล เอิด เคือง ไจ ใน เฮือ นัน ดก มบลึ กวาง แอ็ม ตัก นอก วัล 20งกริม ก็ ปึห เอิด เฮือ นัน เริล ดก งิ วัล อิห ก็ ไอ มี เม็จ งิ ไอ มี เม็จ ซีเม็ญ เตาะ อิห ก็ แมดใจ นาย แอ็ม ใจ มด อิห กะ เค็ย ไอ มี รีด เตาะ
21ทาเน ครำ ใน เฮือ นัน ก็ ไอ มี กุญ ป็อง จะ ดก งิ แลว เปาโล ก็ ไล อัห คือเน “เอิญ ไล แป งิ นาน แลว นอ อำ งเคาะ เริล เจ็น เกาะ ครีด เอิญ อัง กัน แป ปัง แอ็ม แญง เอิญ งิ นาน ก็ เลาะ ไอ มี ดก ซุด คอง แอ จังเน เตาะ 22แต ไอ มี ปานัก ซัง แป แอง ใจ เลาะๆ ดาย ไอ มี ซีเอ เปิล ซัก มี ล็อง เตาะ แต เฮือ เน ไอ มี ควะ เลือ เตาะ
23แจ็ล เคิน เอาซาง งกีจ็อง ตัก เอิญ ทือ นัน นำ ก็ ไล เทวาดา โตะ และ เอิญ เทวาดา ก็ ติ โตะ ญ็อง อุ เคิบ เอิญ 24เทวาดา ล็อง นัน ก็ ไล เอิญ คือเน ‘เปาโล เฮย อำ นเจิก เตาะ ดาย มัห ก็ กุญ เริล ญ็อง อุ เคิบ มัด พะเจายูฮัว ซีซา นังเลาะ เอาซาง ตึ อัง มัห ซีเละ ดาย ครำ ใน เฮือ ตี อุ เลิม เคิบ มัห เน อัห ก็ ไอ มี เปิล ซัก มี ล็อง เตาะ’ เทวาดา ไล เอิญ คือนะ
25เปาโล ก็ ลบ ไล อัห คือเน วัล แป แอง ใจ เลาะๆ ดาย เอิญ แก็นใจ เจือ เอาซาง ซีเละ เอิญ เจือ เค็ย เลือง เน ก็ กิว เป็น เล็ห มอก เอาซาง ไล อน นัน ซีเละ 26แต เฮือ นัน งกริม ก็ ต็อง ปึห เอิด อี เริล อี ซัก อุ ตัก เกาะ มี ตี เน” เปาโล อัง
27ทาเน ซิบซี แจ็ล แลว เฮือ อิห ก็ ควะ ลอย อุ ตัก ทะเล อาเดีย นัน ตัก เคิง เดิก ปะมาน ฮก ทุม เน ปึง อัห ก็ เยา ติ โตะ ตัก เปล ซิก 28อัห ก็ วัด อ็อญ นอก นัน ควะ จุ ซีซิบ เม็ด เริล วัล ตีดต็อง อัห ก็ วัด อ็อญ วัล ควะ จุ ซามซิบ เม็ด 29ตัก ลอล เฮือ นัน ก็ มี ซะมอ ตี เกาะ ซิก ซี อัน อัห นเจิก เฮือ แคระ อัง เกียง อัห ก็ มพลิห ซะมอ นัน ระ เฮือ จอด อุ นัน วาล อัห ก็ วาง เพา ระ ปัห ซะ เวิดๆ
30ทาเน ปึง ทาย เฮือ ก็ บัก และ ปัด เจ็น เฮือ จ็อง นัน อัห ก็ ลอด อีด แอ็ม เฮือ แย็ด นัน มพลิห ตัก นอก อัห จุ แอง ฮุน อีด ซะมอ ตี เกาะ ซิก ตัก กึ เฮือ จ็อง นัน แต อัห ซีรอก ลอด ปัด 31เปาโล เม็จ อัห แอง คือนัน นำ ก็ ไล นายรอย เคิบ ปึง ทฮาน คือเน “กัน อัห ไอ มี อุ ใน เฮือ เน เลิม แป ก็ ซุด เปิล แอ็ม มด ไอ มี รีด เตาะ ดาย” เปาโล อัง 32ปึง ทฮาน ก็ ลด มเพ็จ กัด แอ็ม ทาล เฮือ แย็ด นัน มบลอย แอ็ม ตัก นอก ทะเล นเซ็บ
33เจ็นนัน ก็ บัก และ ปัห ซะ แลว เปาโล ก็ มพอล อัห ป็อง จะ นำ ก็ ไล อัห คือเน “ซิบซี งิ ตึง งิ นะ ดาย ไอ มี แป กุญ ป็อง ซีวะ ซัก มี ติด แร็ง ซีดุง แซ็ง แป วาง เพา ระ งกริม งาล นัน ลด ไอ มี กุญ ป็อง ซีวะ นอ 34มานะ เน เอิญ ครอ ระ แป ป็อง คนมปัง แด ซัง มี แร็ง ซัง รีด แอ ดาย อำ นเจิก เตาะ ดาย ไอ มี ซีวะ อัง แป ซัก มี ติด เตาะ” เปาโล อัง เค็ย อัห
35แลว เปาโล จ็อก ออ แลว นำ ก็ ลด เอิด คนมปัง คอบคุน เอาซาง เคิบ มัด ปึง อัห นัน นำ ก็ เพก ป็อง 36อัห จู ล็อง ก็ เลาะ เล็ห ใจ มี ติด อัห ก็ ลด ป็อง เลิม เคิบ นำ 37ครำ ตี อุ ใน เฮือ นัน มี 276 ล็อง 38แลว อิม อัห แลว อัห ก็ เอิด กะซอบ ซา กะซอบ ซาลี มพลิห แอ็ม ตัก นอก ระ ซึล เล็ห เฮือ มี ติด วัล
39ทาเน ก็ ปัห ซะ ปัห ซะ แลว อัห ก็ เม็จ เปล ซิก อุ ลัห มัด ออ แต ไอ มี ซีเอ เม็จจึด เคิง นัน เป็น เคิง นเดย เคิง กวา ฮุ แต อัห เม็จ มี งกก นอก อุ ลัห มัด ออ นัน ตัก เปล งกก นอก นัน ก็ เป็น ดอน ซาย อัห ก็ อง ซับ เฮือ จน ซิห ตัก ดอน ซาย ตัก เปล ซิก นัน 40อัห ก็ ลด มเพ็จ แอ็ม ทาล ซะมอ ตี เกาะ ซิก นัน ซี เซ็น อัห กวาง แอ็ม ซะมอ นัน ตัก นอก นเซ็บ ทาล ตี อัห ท็อก แพ็น บังคับ เฮือ ตัก อุ ทิง ลอล เฮือ ลัห นเซ็บ นัน อัห ก็ อีด แอ็ม มด ระ แพ็น บังคับ เฮือ นัน มุน อุ ลือๆ ฮัก เจ็นนัน อัห ก็ เด็ง ทาล พา ไบ อัห ญ็อก พา ไบ ลัห มัด เฮือ ระ งกริม ปึห เฮือ เริล ซือๆ ตัก เปล ซิก นัน
41ทาเน เฮือ เริล โตะ มี คัล แลว มพุล เฮือ ก็ โตะ ซุก ซิห ตัก ดอน ซาย ทิง นอก ลัห เซ็บ แต เปล ซิก ควะ อุ เยอะ ซะ แดๆ กึ เฮือ ลด ซัก อุ แก็น ตัก ซาย นเซ็บ นอก ก็ ซำ โท็ล โตะ มพัห ซิห ลอล เฮือ ลอล เฮือ ก็ พุก แตก ตัก แร็ง นอก นัน มพัห
42ทาเน ปึง ทฮาน นัน ก็ กึด และ มเบิล แอ็ม นักโทด มด อัห นเจิก ปึง นักโทด ลอย นอก ปัด 43แต นายรอย ยูเลียด ซีรอก จวย เปาโล นำ ก็ ลด มบราง ปึง ทฮาน มเบิล นักโทด นำ ก็ ไล ครำ ตัก ลอย นอก เป็น นัน กะโดด ลอย นอก ปัด เริล ซะร็อห วาล 44ครำ ตัก ควะ เลือ ตี ไอ มี จางรู ลอย นอก นำ ก็ ไล อัห เกาะ ลำ เฮือ ตี แตก นัน อัห ก็ เกาะ ลำ เฮือ ตี แตก นัน ลอย ทอก โตะ ตัก ซะร็อห เจ็นนัน ก็ ไอ มี ซีเอ เปิล ซัก มี ล็อง เตาะ
Currently Selected:
ตัวแทน 27: Prai
Highlight
Copy
Compare
Share
Want to have your highlights saved across all your devices? Sign up or sign in
Global Partners
