Zefhania 3
3
Pa ga Yerusarema ingapai na pa tumori
1Na gberẽ he fu gu bakporo nasa mungu du ni birikobiriko ho,
nga bakporo barungosi aboro!
2Si adega nga tuhe sa fugo wa sa te,
si aida nga na pa rugatise te.
Si akida nga kuti Yekova te,
si ambeda nga mbembedi sa gaha Mbori a te.
3Gaha abazogo rogo ho
du wa gbiriwogbiriwo abahu;
gaha abasaringbanga du wa awaru ninata nyemu
nga agu ra ambu nga he da ku wiso ya.
4Gaha anebi nga azanga rugatinapai, nga airabiriki;
gaha aboromotumo gbarasi kparakpara rago,
i nairasi sangba rugute.
5Yekova du rogo ho yo ni ruru ko,
ko amanga nga irairapai te;
ko nayugo gako ruru sarangbanga na wiso na awiso,
ko azanga nga paha na girarago te;
ono gu boro zanga rurupai aina nga pa zee te.
6“Mi bafu arikaaboro ku sa yo;
gayo kirikiri agbata du ni gbarasigbarasi he;
mi sa gayo agene bakporo ni kungba rago
si du ka boro ata nga ngba ha berewe wa sa ya;
gayo abaakporo du wa kungba rago,
zanga boro, zanga araki rogo.
7Ya mi, ‘Ni rengo si agúnde ti re,
si aída na pa rugapai;
bangirihe ago nga
ti agu ahe dunduko fu mi rugute tipa ha fu he te.’
Ono i adu gbamagbama ki susi
ka manga gayo mangaapai dunduko ni wasiwasi he.”
8“Si du oni súngudi re,” wo poi Yekova,
“tipa gu uru ho mi ka guari ni wa dezire.
Bambiko gi sarangbanga nga ka dungura arikaaboro,
ka tiria aboro angbi,
ka uka gi imisiri ngbaduse ku ri yo,
na gi ngariangaria zinga dunduko;
bambiko rogo we gi deringo
kpotosende dunduko nikanyasa.
9“Ii, ti gu rago re mi asá gu fugo nga ga aboro
ni nzunzu fugo,
ya i dunduko ki yambu he ti rimo Yekova
ki nimangi pako kina ku bani sa.
10Mbiti adi Etiopia yo
azúngadi pa re ka ye ni na gi motumo nga ga riahe,
nga gimi gbandakagbandaka yo.
11“Ti gu uru re i abá nga zee ku ri roni
mbiko gu mangaapai oni asa mungu na ni kuti re te;
bambiko mi aróga agu aboro dagba gaoni yo ku sa yo
nasambua tiyo ni enda,
ka oni aknsa nga pa tironi
rogo gi kparakpara ziazia bagangara yo berewe ya.
12Bambiko mi ambu aboro umbasiti dagba roni
du ni rungorungo yo.
I agbáta bagbuko rogo rimo Yekova yo,
13agu yo i ambu yo ku Yisaraere yo;
i amánga nga irairapai te,
ki nigumba azire a te,
i abí nga mirãse
nga ga biriki ngbayo yo a te.
Bambiko i abí riahe ki piki sande rogo banambu,
ka boro agúndesi nga yo wa sa ya.”
14Ako aboro Siona, oni bi bia ku ari;
ako Yisaraere, mo tá ngbaro!
Ako aboro Yerusarema,
oni dú na ngbarago ki ningi na kpotoroni yo dunduko!
15Yekova di gu sarangbanga sari yo kuti ro ku sa yo,
ko ba avuraro ku zegi yo.
Bakindo aYisaraere nga Yekova, du dagba roni;
oni agúnde nga be gbigbitapai berewe te.
16Ni gu uru re i ayá fu Yerusarema wẽ:
“Ako Siona, ka mo gúnde nga ya;
ka bero nirúngbura nga ya.
17Yekova, ga Mbori, du dagba ro,
nga iranyaka nafu diabese fu aboro;
ko angi mbiko ro na ngbarago,
ko adu zezeredi rogo gako nyemuse;
ko adú pusiapusia mbiko ro nibi bia ni wawa
18wa ti rago pumbo.
Mi adia tindiro mbusa ri ro,
si du ka mo adu nga na gbarasarimo tipa ha berewe ya.
19Mo ngére, ti gu rago re mi amánga
abarungosi ro dunduko.
Mi ki batasi gu gbarígbarĩ yo
ki dungura gu dandidandi yo,
mi ki sa gayo pa zee ku rogo tambuahe
ni ũworimo rogo kpotosende dunduko.
20Ti gu rago re mi ayéga na mo ku kporo no,
ti kina gu rago ka mi dungura roni wa sa;
ii, mi atáka pande rimoro i tambua ro
dagba aboro dunduko auru kpotosende,
ho mi ka karaga gu gamo yo ni ku bara bangiro,
i azi yo,” wo poi Yekova.
Currently Selected:
Zefhania 3: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
