Zefhania 1
1
Pa uru ga Yekova zinga
1Gu pai nga ga Yekova nga gu naye fu Zefania wiri Kusi ti gu rago nangia ga Yosiya wiri Amona, nangia bakindo a Yudo, Kusi angia wiri Gedaria, Gedaria ki ngia wiri A maria, Amaria ki ngia wiri Izikiya.
2“Mi agbarasa ahe kpakaya
auru kpotosende,” wo poi Yekova.
3“Mi agbárasa aboro na anya;
mi agbárasa azire ari na atio baime.
Mi abáfa agu ahe aboro nakota mbiko ho wa sa na gbegberẽ aboro;
mi abá tunga aboro dunduko auru kpotosende,” wo poi Yekova.
4“Mi atáã bere kuti Yuda,
na kuti araki Yerusarema yo;
mi ki ba gu yangara yo ku sa yo ti gi ba re nga ga Bara yo,
na rimo aboromotumo nga airisi kpiahe;
5na agu yo nairisa rimbasa agu ahe du angbangbaturũ yo
ri abambu yo;
na agu yo nairisa Yekova ki zunga he fu ko
ki nizunga he ti rimo Marekama a;
6na agu yo nakaraga tiyo ku sa yo ti peka Yekova,
agbata nga Yekova watadu sana he tipa ko a ya.”
7Mo óngo kii Para bangiri Gbia nga Mbori!
Bambiko rago Yekova nambeda;
Yekova mbakadi motumo ki kpara gako agino.
8Si adu wa gere ti gu rago nga ga ga Yekova motumo—
Mi ambúsa abazogo na awiri bakindo
na agu yo dunduko ukadi tiyo na ga kura ngbatunga aboro roko.
9Ti gu rago re mi ambúsa
aboro ni ba sa sa nga agu yo nagu ri barima ku dimoyo,
nga agu yo nahisa ga abairayo bambu na zuu na biriki.
10“Ti gu rago re,” wo poi Yekova,
“i agía kpe ku Ngbadimo Atio yo,
na tawawa ku Ue Papararago yo,
ba woro sumba he ku agangara yo.
11Ako araki Makatesa yo, oni yóro wawa!
Bambiko ababagiahe dunduko adu nga ho berewe te;
agu yo dunduko naringbisa feda i bafu yo ku sa yo.
12Ti gu rago re mi akpária pa Yerusarema na awe,
mi ambúsa agu yo
nanyakasa tiyo ku ba yo yo,
nga agu yo naya ku kpotoyo yo,
‘Yekova amanga nga wenepai te, ko amanga nga gbigbitapai a te.’
13I agbú gayo ahe,
gayo abambu adú ni gbarasigbarasi he.
Ka i vura dua abambu,
i aráka nga rogo ho yo te;
ka i vura rũka abakakue,
i ambíra nga gaha imekakue te.”
14Gu bakere rago nga ga Yekova du mbembedi,
si mbembedi ki niipisi tihe gbe;
woro gu rago nga ga Yekova du ni kere he,
iranyaka nakpara yo ni wawa.
15Rago dingidingi ngbaduse nga gu rago re,
rago fudifudipa na rago dungbapai,
rago gbarasahe na rago pa kungbaahe,
rago bitimo na rago du iyo, rago adubo na nduunduu bitimo,
16rago woro nambongo na woro sovura
kuti abaakporo ngapa
na kuti kirikiri agbata du ku ari.
17Mi ayé na fudifudipai ku ri aboro,
ya i ta wa airavurari,
bambiko i ingi kuti Yekova;
i aúka kureyo wa nvutu,
na pasioyo wa regbo nya.
18Gayo feda aréngba nga ka batasa yo
na gayo dahabu
ti rago dingidingi ngbaduse nga ga Yekova te.
Kpotosende dunduko adú ni nyasinyasi he;
rogo gu we nga ga gako zinga du na deringo,
bambiko ko anyása araki zegino dunduko
ki mangi yo rure kpakaya.
Currently Selected:
Zefhania 1: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
