Zekaraya 14
14
Pa Yerusarema na pa arikaaboro
1Oni ngére, gu rago nga ga Yekova naye, ho gu gbugbu ahe i agbu he be roni ka du ni ni kparakakparaka ha dagba roni. 2Bambiko mi adúngura arikaaboro dunduko kuti Yerusarema sa vura, i ki di bakporo ki gbu abambu ki nizapu ade; i ki ga na bebere aboro bakporo ni zizi yo, ono gu yangara aboro i aróga nga yo ku sa yo bakporo yo te. 3Yekova akúra ni tiko ka ndu ka so vura kuti agu arikaaboro wa ko aso vura ti rago vura. 4Ti gu rago re nduko arú ri Bagangara Eraya nga gu wagi barangba Yerusarema ku uroyo. Bagangara Eraya asára rogo ho ue tona uroyo ki da ku dioyo, ni babakere ngboongboorago; si du gu papara Bagangara sa ki gbe tihe ku ngbi ku nodiyo, gu kura papara ha ku sudiyo. 51 akísa gene ku ngboongboorago yo nga ga gimi abaagangara, bambiko gu ngboongboo nga ga abaagangara azáda pavuruhe. Oni aóra a wa oni aoro be bazigizo ti rago Uziya bakindo aYudo. Fuo ho Yekova gi Mbori ayé, na gu ziazia aboro dunduko na ko a.
6Ni gu rago re imarago adú nga ho te kina nzinzii rago na bitimo. 7Uru arú aru ku baha zaa, Yekova ini he, uru adú nga te na yuru a te, bambiko ku nzinzii rago imarago adú.
8Ni gu rago re unga ime afú Yerusarema yo kpua, bebere he ki fu ku rogo baime tikpo ku uroyo na gu kura bebere he ku baime tikpo ku dioyo; si afú kindi ti rago faarago a wa ti rago zere.
9Yekova adú ni bakindo ku ri kpotosende dunduko; ti gu rago re Yekova adú sa na rimoko a sa.
10Ringara dunduko adú kpasakpasa tona Geba yo ki da ku Rimona yo du pati Yerusarema ku sudiyo. Ono Yerusarema anyé ku baha tona ti ga Benyamina Ngbadimo sa kuru ngbadimo, sa Ngbadimo Tukpuhe, na tona ti ga Ananere Kirikiri gbata a ka ndu sa ga bakindo abapira imekakue. 11Aboro aráka rogo ho, bambiko motiwa adú nga berewe te; aboro Yerusarema aráka zezeredi.
12Gere ki ngia gu gberãngbi Yekova ka manga aboro na ni dunduko nga agu yo nandu ka so vura kuti Yerusarema: pasioyo agbídigira dú wa ru yo kina ku ngba nduyo, bangiriyo agbídigira ku due bangiriyo yo, mirãyo ki gbidigira kina ku vuru ngbayo yo. 13Ti gu rago re bakere gbarakagbaraka pai ayé be Yekova ki zi yo, si du aboro ni ba sa sa ki nizi be akurayo, be gu ni ki nizingi kuti be gu kurani; 14zavura Yuda si asó vura kuti Yerusarema. I adúngura gu kumuko nga ga arikaaboro dunduko kirikiri nga dahabu, feda, na aroko ni badungu he. 15Gberãngbi wa kina gu gberãngbi re ati ku ri afarasi, ku ri abaadongi, ku ri akameri, ku ri adongi, na ku ri agu angbatunga anya a ka du rogo agu abataya re.
16Si du agu aboro nikabata nga ga arika aboro yo dunduko nga agu yo naaye sa Yerusarema i andú koyo na garã na agarã ka irisa Bakindo nga Yekova nga ga arimbasa ko, ka manga pumbo abasura. 17Ka agu aborokporo nga ga kpotosende yo andú nga ku Yerusarema yo ka irisa Bakindo nga Yekova nga ga arimbasa ko ya, mai aná nga fu yo te. 18Ka aboro Ezipeta andú nga ka yugo tiyo yo ya, mai aná nga fu yo a te, ono gberãngbi ayé ku ri yo nga gu Yekova ka arungosi arikaaboro na ni nga agu yo nikandu nga sa pumbo abasura ya. 19Gere nikangia gu mbusa nikadu fu Ezipeta na gu mbusa nikadu fu arikaaboro dunduko nga agu yo andú nga sa pumbo abasura ya.
20Na ti gu rago re kekepai adú ti agu anzorõ du ti afarasi, nga “I kpara ha ziazia fu Yekova.” Agu aakoro du rogo ga Yekova bambu yo si adú wa agu akurungbu du barangba bamotumo; 21aakoro dunduko Yerusarema yo na Yuda yo adú ni kparakpara ha fu Yekova nga ga arimbasa ko, si du agu aboro dunduko ninatumo na ahe ka ye ti ni ka roga gu dagba ha yo ka pasa pasio nga ga motumo rogo yo. Ka babagiahe adú nga rogo ga Yekova bambu yo berewe nga ga arimbasa ko ti gu rago re ya.
Currently Selected:
Zekaraya 14: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
