ARomo 3

1Gini pai susi Yudo ti ni tie? gini pai dũ nga a ti yeratise? 2Gagutie: mbata ha nga, i aasia pa sangba Mbori fu yo. 3Bambiko ka agu yo ti ku sa yo ti idapase si du wãi? gayo ti ku sa yo ti idapase si gbarasi pa gu weneringise nga ga Mbori? 4Wa sa te. Ii, kina Mbori du ni irarengo, aboro du ni kina airazire; wa du he ni keke he,

“Ya ga pai adu ni ruru he ho mo agumba pai ni,

mo ki di be pai ho mo ka ye ni sa sapangbanga.”

5Ono ka gaani irairaapai atambua ga Mbori rurupai, ani ya wãi? Mbori du na irairapai naye ni zinga? (Mi nagumba ha tigu wa boro.) 6Wa sa te. Bambiko Mbori awira pa sapa ngbanga zegino wãi tie? 7Bambiko ka ga Mbori rengo akiisi gako taarimo be gi zire, tipagine sapu yo ngbanga re ti ni a ni boro ingapai? 8Tipagine si adu nga wo ya wa i ape he ni zire, agu yo ki ya ani nagumba ha ya. Ani mangi gbegberẽpai, wenepai ye? Gayo kuangbanga ru aru.

A nga boro sa du ni ruru ni te

9Wai tie? Ani nga aYudo ani ngba susi yo? Oó, wa sa te: bambiko ani nikua ngbanga a Yudo na aGiriki a mbata, ya i du tii gbegberẽpai; 10wa du he ni keke he, ya,

“A nga boro sa du ni ruru ni te, oó, wa sa te

11a nga boro sa naruga tini na pai te,

a nga boro sa nagbata Mbori te.

12I karaga tiyo ku sa yo dú, i mongo mungo;

a nga boro sa namanga wenepai te, oó, wa kina sa te.”

13“Gorõyo du wa gbagaza murã;

i nangi he na mirãyo.”

“Gu kere sure nga ga kere wo si du tii kpotongbayo yo.”

14“Ngbayo ahi be tiwa he na wingba.”

15“Nduyo gbidi ka uka kure,

16gbarasa he na rungo du ngba gayo agene,

17i aina nga gene zereda te.”

18“Gunde ti Mbori si bangiriyo te.”

19Were ani ini ya agu apai rugute agumba, si nagumba ha fu agu yo du tii rugute; ngba ongo aonga dũ, i ye na aboro zegino dú ku tii ga Mbori sapangbanga: 20bambiko a nga boro sa i adia pai ri ni bangiriko mbiko manga rugute te; bambiko ina gbegberẽpai naye rogo rugute yo.

Du aboro ni ruru yo mbiko idapase

21Ono awere Mbori nayugo waĩ ko nasa aboro i du bangiriko ni ruru yo kpara ti rugute, adezirehe nga rugute na anebi. 22Mbori nasa aboro ni ruru yo mbiko ida yo pa Yesu Kristo. Si du kina wo fu agu yo du naida pa ko; bambiko aboro akpara nga te. 23Bambiko aboro aingi ainga dũ, ki ti bungudu ti ga Mbori taarimo; 24i di pai ri yo gbua mbiko gako undahe rogo gu tumori yo du rogo Kristo Yesu yo. 25Ko, Mbori amoi ko ko du ni motumo ga aboro ingaapai, wa i naida pa kureko. Rogo gere. Mbori ayugu waĩ ko nasa aboro ni ruru yo, wa ko ambu gu gbegberẽpai i anamanga mbata mbiko gako hipai. 26Si nayugo ho wa du rago re ya Mbori tigako du ni ruru ko, ko nadia pai ri agu yo idi pa Yesu. 27Wari du enda ni tie? Si ho te. Mbiko ngbatunga gini rugute? Mbiko mangaapai? Oó; kina mbiko gu rugute nga ga idapase. 28Si du ya ani ti ni i nidi pai ri boro mbiko idapase kpara ti manga rugute. 29Mbori nga kina ga aYudo Mbori sa? nga ga aGendiria Mbori nga ko a te? Ii, ga aGendiria ko du a! 30Ka si du wa Mbori du sa, ko adía pai ri aYudo mbiko idapase, ki di pai ri aGendiria rogo idapase. 31Ani sa rugute tie ni kungba he rogo idapase yo? Wa sa te! Oó, ani nanyakasa rugute anyakasa.

Currently Selected:

ARomo 3: ZB1978

Highlight

Copy