Mika 7
7
Pa ga aYisaraere gbegberẽ sino unga
1Na gberẽ he fere! Bambiko mi sa tire
wa rago dungura yo zuzu ngua nga ga faarago,
wa ho regbo dungura zuzu bakakue nida ni:
kpuraha ho ka i ri he te,
na bambata zuzu vurumo nga gu ka mbisimore akpi nyemu he a te.
2Boro sinombori nyasi kpotosende no,
ka ruru boro adu nga ho dagba aboro ya;
i dunduko nasunguda uka kure, i ni ba sa sa ki nigbata awirinayo na pio.
3Beyo du ti gu he du ni gbigbita ha, ka amanga ha sirisiri;
bazogo na basaringbanga nasana he tipa marã mobirimo,
gu bakere boro ki gumba pa gu gbigbita nyemuhe nga ga mbisimoni;
were i zi beyo sa.
4Gu ni ngba susi dagba yo du wa nguruza,
gu ni du ni ruru ni susi dagba yo du wa ndugu kiwe.
Rago gayo ababandarago, nga ga gayo mbusa, si da;
awere rago gayo baka bangirise nada.
5Ka mo kída nga kuti kuaro ya,
ka mo dú nga zukazuka rogo ga badiangbaro pai ya;
mo bánda kpotongbaro be gu ri pi ti ngbaduro;
6bambiko wiri boro napayasi pa bani,
degude ki zingi kuti nari,
dia wiri de ki zingi kuti nakumbari;
avura boro angia kina gani aborokporo.
Yekova naye na imarago na bata
7Ono tipa re, mi angéra koyo du Yekova ni,
mi asunguda Mbori nga gi bata;
gi Mbori agía pa re.
8Ako vurare, ka mo ngí nga ku ri re ya,
ho ti mi ni, mi agúari aguari;
ho sungu mi ni rogo bitimo,
Yekova adú ni imarago fere.
9Mi akpída gu imisiri ngbaduse nga ga Yekova
bambiko mi ingi pai kuti ko,
daho ko ka zungadi pai ni tipa gi pai
ki sari ngbanga fere.
Ko akúsa re ku imarago yo; mi abí gako bata.
10Si du vurare abí he,
zee azía gu ri naaya fere,
“Wari du Yekova ni nga ga Mbori?”
Bangire abí ri abi;
i nikasimba ri awere
wa fuka ngba agene bakporo.
11Rago du tipa dua gamo angapa!
Ni gu rago re i agbísa bangbandarago tuturũ.
12Ni gu rago re i ayé koyo du oni ni,
tona Asura yo ki da ku Ezipeta yo,
na Ezipeta yo ki da ku Di yo,
tona ti gu baime sa gu baime na ti gu bagangara sa gu bagangara.
13Ono kpotosende adú ni vurubate
bambiko agu yo araka rogo ho,
mbiko gu zuzuhe nga ga gayo mangaapai.
Nunga aYisaraere namanga Yekova
14Mo bánda gamo aboro na ga ngau babanda anya,
gu rimbasa aboro nga gamo yo,
naraka ni sa yo rogo birengua
rogo ringara aati;
i rígi tiyo Basana yo na Girada yo wa u agu arago naadu bakuru yo,
15Wa ti agu arago ho oni aye ni ringara Ezipeta yo
a wa mi nikayugo iiriwo apai fu yo.
16Arikaaboro abí he ki du na zee
mbiko gayo ngarã dunduko;
i amáa beyo ti kina ngbayo;
tuyo adú ni kisikisi he;
17i asíra nvutu wa wo,
wa agu agbiro nagbe tira nga ga kpotosende ra;
i ayé na kio rogo gayo nyanyaki abaagbata yo,
i ki gunde mbiko ro.
18Da du ni Mbori wa mo, navu aboro ti irairapai
ki mbu pa samungu
mbiko pa yangara gako aboro?
Ko azada nga gako zinga nye anye kindi te
bambiko rago angba ti ko ho ko aina pai ni.
19Ko adú adu na nunga rani ti ko berewe,
ko asímba gaani irairaapai ku tii nduko yo.
Mo abá gaani ingaapai dunduko
ku dudungura baime yo.
20Mo ayúgo rengo fu Yakoba
na inapai fu Abarayama,
wa mo azunga he fu abarani
tona ti agu arago naadu bakuru yo.
Currently Selected:
Mika 7: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
