Mika 2
2
Pa rungo fu agu yo narungosi rungorungo aboro
1Na gberẽ he fu agu yo nasanga irairapai
ki niberẽ pa manga gbigbitapai ho piki yo ni ri gayo abarame!
Ho rago nagira ni, i namanga ha,
bambiko si rogo gu ome du ti beyo.
2I ki nikpi aati, ki nizi he;
na abambu, ki nirogo ho ku sa yo;
i narungosi boro na gani aborokporo,
boro na gani mosoro.
3Si du ya Yekova ti ni:
Oni ngére, mi nasanga gbigbitapai kuti agi arika ngbatunga aboro re,
nga gu oni ka dia nga ha ti goroni ya;
oni atá nga na ruka te,
bambiko si nikadu ni gbigbita rago.
4Ti gu rago re i abí bia sengahe kuti roni,
ki nikpari na kere kpenunga,
niya, “I gbarasi rani Kpakaya;
ko nasa agu ahe nga ga gimi aboro he;
ko di he be re ku sa yo!
Ko nakparaka gaani aati dagba asamungu.”
5Si du oni adú nga na boro na giri ringbisahe dagba roni tipa ringbisa he
rogo ga Yekova gbuu yo te.
6“Ka oni túngusi nga pai ya” —were i atúngusa pai—
“ka boro atungusa nga ngbatunga pai wa gu re ya;
pa zee adúsia nga rani te.”
7Ako ga Yakoba rika ngbatunga aboro, ka i gumba gere?
Ga Yekova Toro nahi pai te?
Agi apai re nga gako mangaapai te?
Gimi apai namanga nga wenepai
fu gu ni nata ni ruru ni te?
8Ono oni zingi kuti gimi aboro wa avurayo;
oni uru gbanga roko ti agu yo ra zezeredi,
ti agu yo a nasusa zezeredi
zanga kida kuti berã pa sovura.
9Oni bafu ga gimi aboro ade ku zegi yo
rogo gayo wene abambu yo;
oni di gi taarimo ku sa yo
ti paranga awiriyo nye anye kindi.
10Oni gúari ki ga,
bambiko gere nga ba gaoni ongoda te;
bambiko gu birikobiriko pai nagbarasa ahe
ni kere gbarasa he.
11Ka boro ata kirikiri ki gumba kungba apai na pa zire,
niya, “Mi atúngusa pa imekakue fu roni na baripiro,”
ko adú ni batungusipai fu agi aboro re!
12Ako Yakoba, mi adúngura roni dunduko ni rengo,
mi adúngura gu yangara yo nga ga aYisaraere yo;
mi amáa yo kina sa
wa akandoro rogo ndugu ra,
wa rimbasa akandoro rogo gaami banambu,
baworo adú mbiko ngenge aboro.
13Gu ko nasara gene nikangbe mbata fu yo;
i agbada koyo ki susi ngbadimo bakporo,
nikuru ku zegi yo ngba ha.
Gayo bakindo nikangbe ku mbata yo yo fu yo,
Yekova ki du ku mbata yo fu yo.
Currently Selected:
Mika 2: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
