Matayo 26

Ga aYudo abaakumba aberẽ pa imo Yesu

(Mk. 14:1-2; Rk. 22:1-2; Yo. 11:45-53)

1Si ki ta du wa gere, ho Yesu anyasi agi apai ni dunduko re, ko ki ya fu gako abawiriki, 2“Oni ini ya fuo rame ue pumbo susiri nikada, i ki fu Wiri boro i wagi ko.”

3Ni gu rago re abairamotumo ki dungura tiyo dunduko na ga aYudo abaakumba, ku rogo ga gu gbiamotumo ngbanga, i aya ti ko Kayafa. 4I ki ta bura dagba yo i zi Yesu ni biriki, ka imo ko. 5Ono i ki ya, “Rago pumbo te, aboro ka manga gbarakagbaraka dagba yo.”

De auka nzeme ku ri Yesu Betania yo

(Mk. 14:3-9; Yo. 12:1-8)

6Were ho Yesu adu ni Betania yo, rogo ga Simona bambu nangia boro ngbataka, 7de ki ye sa fuo ko nadu na ndukura nzeme kii genoho akia, ri ki uka ha ku riko yo, wa ko asungu ka ri riahe. 8Ono ho abawiriki abi he ni, si ki gberẽ agberã ti yo, i ki ya, “Ndu misika gi he re nga gine? 9Bambiko ka i abagi he tipa bakere marã, ki fuku he fu rungorungo aboro.” 10Ono Yesu ho ko agi he ni, ko ki ya fu yo, “Tipagine oni afuda de ti ni? bambiko ri mangi wene pai fere. 11Bambiko rungorungo aboro du na oni waragoagira; ono mi adu nga na oni waragoagira te. 12Bambiko wa ri nimbedi kpotore ni nzeme, ri nimangi he kuti rago kpisida re. 13Ya mi fu roni, ni rengo, rogo agu arago i ka tungusa gi wene pangbanga ni re zegino dũ, gi pai mangi gi de a re, i agúmba ha agumba ka atingida pari ti ni.”

Yuda aidi pa kusa Yesu

(Mk. 14:10-11; Rk. 22:3-6)

14Gu ko sa dagba agu yo nanidu bawe na ue, i aya ti ko Yuda Keriota, ko ki ndu koyo du abairamotumo ni, 15ki ya, “Gine oni ka fu fere mi ki fu Yesu ku be roni?” I ki ringbisi marã feda fu ko wa 30. 16Ti gu rago re ko ki nigbata rago ka fu ko ku be yo.

Yesu ari pumbo susiri na gako abawiriki

(Mk. 14:12-21; Rk. 22:7-14,21-23; Yo. 13:21-30)

17Were ti gu bambata uru nga ga pumbo susiri abawiriki ki niye fuo Yesu, ki ya, “Wari mo akpi nyemu ani mbakadi pumbo susiri ni foro mo ri he?” 18Ko ki ya, “Oni ndú ku bakporo yo fu gu kumba re, ki ya fu ko, ‘Ya Bayugupai wẽ, Ragore mbedi; mi nakpi nyemu ka ri pumbo susiri kpuro yo na gimi abawiriki.’” 19Abawiriki ki mangi a wa Yesu aringbisi he fu yo; i ki mbakadi pumbo susiri.

20Were ho nyemu ada ni, ko asungu ki niri riahe na agu abawiriki nanidu bawe na ue. 21Wa i ari he, ko ki ya, “Ya mi fu roni ni rengo, gu ni sa dagba roni nikakusa re.” 22I ki nirungo arungo bakere, ki tona sana ko ni ba sa sa, “Mi du, Gbia?” 23Ko ki karaga ha ki ya; “Gu ni ani anogoda he na ni kurungba yo, kina ni nikakusa re. 24Wiri boro nandu, a wa i ake pa ko; ono si agbérã agberã ti gu kumba nakusa Wiri boro re! ka i avunga nga ko ya si ka ngba tipa ko.” 25Yuda nga gu ko nakusi ko, ki ya, “Mi du, Bayugupai?” Yesu ki ya fu ko, “A si mo agumba ha re.”

Pa Ziazia Ngbanya

(Mk. 14:22-26; Rk. 22:15-20; 1 Kor. 11:23-25)

26Wa i ari riahe, Yesu ki di kpokuta ki fu tambuahe, ki kuadi he; ko ki nifu he fu abawiriki, ki ya, “Oni dí he ki ri he, gere nga borore.” 27Ko ki di inga, ki fu tambuahe, ki fu he fu yo, ki ya, “Oni mbiri he ambira ti ngba gere dunduko; 28bambiko gere nga kurere nga ga vovo ndika, i niuka ha tipa roni na dungu aboro sa dia gbegberẽapai ti yo. 29Ono ya mi fu roni, mi ambira nga gi rindi bakakue berewe te re dati gu mi ka mbira ni vovo ho na oni rogo ga Buba ngbi yo.”

30Fuo bi yo bia tambuahe, i ki ndu ku bagangara Aeraya yo.

Yesu ay ugu pa ga Petero tigo

(Mk. 14:27-31; Rk. 22:31-34; Yo. 13:36-38)

31Yesu ki ya fu yo, “I amánga roni oni koto akota dunduko tipa re ni gi yuru re. Bambiko i ake he ya, ‘Mi atá babanda akandoro ata, rimbasa akandoro ki gbandaka yasika.’ 32Ono ho Mbori ka zingisa re ni, mi andú mbata fu roni ku Gariraya yo.” 33Ono Petero ki ta karaga ha niya fu ko, “Ka i mangi agu yo i koto akota dunduko tipa ro, ka mi akóta nga ya.” 34Yesu ki ya fu ko, “Ya mi foro ni rengo, ni gi yuru re, mo aóra rimore aora bara biata mbata bakondo nikakua.” 35Petero ki ya fu ko, “Ka ani vura kpi akpi na mo mi óro nga rimoro te.” Agu yo ki mongo poi kina wo dũ.

Yesu akpari Getesemane yo

(Mk. 14:32-42; Rk. 22:39-46)

36Yesu ki ye na yo ku rogo gu ba i aniya ti ni Getesemane yo, ko ki ya fu gako abawiriki, “Oni súngu erẽ, wa mi andu ku yore ka kpara.” 37Ko ki rogo aPetero fuo ko na awiri Zebedayo ue, ko ki tona ka rungo, pai ki fudi ko bakere. 38Ko ki ya fu yo, “Mbisimore nazinga gbe kina yo du kpio ni. Oni nyé erẽ, ani ngére na oni.” 39Ko ki ndu ku mbata yo ngbutuko, ki ti sande ni kpakpuko, ki ta kpara, niya, “Ako Buba, ka si du wo, gi inga guari pati re re. Ono, ka si du nga wa mi akpi nyemu he ya, wa kina mo akpi nyemu he.” 40Ko ki ye fuo abawiriki, ki bi yo i nira ara, ko ki ya fu Petero; “Wãi, ka oni rengbe nga na ngera na mi saa du sa a te? 41Oni ngére ki nikpari, oni ka rima ku rogo asada. Mbisimoroni nakpi nyemu he ni rengo, bororoni anyaka nga ya.” 42Ko ki ndu berewe ni ue he, ki nikpari niya, “Ako Buba, ka gi inga anyasa nga re ya, kina gu ka mi mbiri he, mo mángi wa mo akpi nyemu he.” 43Ko ki ye berewe ki bi yo i nira ara, bambiko bangiriyo arõi arõa. 44Ko ki guari pati yo berewe, ki ndu ki kpari ni biata ha, nigumba kina agu apai berewe ko agumba mbata. 45Ko ki ye fuo abawiriki, ki ya fu yo, “Oni nara wa du rago re kindi ki ongodi; oni ngére, ragoho da, i fu Wiri boro ku vurube aboro ingapai. 46Oni gúari, ani ndú. Oni ngére, gu ni nikakusa re ni mbedi.”

Zia Yesu

(Mk. 14:43-50; Rk. 22:47-53; Yo. 18:3-12)

47Si kina ku ngbako, Yuda ki ye aye nga gu ko nadu dagba agu yo nanidu bawe na ue, na bakere rimbasa fuo ko na abasape a angbondo, yo du abairamotumo ni na ga aYudo abaakumba. 48Were gu ko nakusi ko, ko aima ringbisa ha fu yo, ki ya, “Gu boro mi ka dungo ni kina ko du. Oni zí ko.” 49Ko ki ye fuo Yesu ni ba sa, ki ya, “Ako Bayugupai!” Ko ki dungo ko gbe. 50Yesu ki ya fu ko, “Badiangba, mo mángi gu ye mo ti ni.” I ki ye ki moi beyo ti Yesu ki zi ko. 51Oni ngére, gu ni sa dagba agu yo nadu na Yesu ki tãi beni, ki mo gani basape, ki ta ga gbiamotumo moyambu ki yere tuko. 52Yesu ki ya fu ni, “Mo mói ga basape ku sirikpa ha yo. Bambiko agu yo dunduko naroga basape i akpi kina be basape. 53Ya mo tigamo mi arengba nga na zúngadi Buba ko kedi amaraika wa rika vura bawe na ue te? 54Ziazia Kekeapai awira pa diga wãi wo? wa si agumba ha ya si amánga amanga wo.” 55Ni gu rago re Yesu ki ya fu rimbasa aboro, “Sa oni re ni batuka ye oni ti ni na abasape na angbondo ka zia re? Wa mi anasunga yekaru yo na uru niyugu pai, oni nazia nga re te. 56Ono mangi agi apai re du, gu Ziazia Kekeapai da ti rengo nga ga anebi.” Abawiriki ki mongo guari aguari pati ko, ki oro.

Yesu barangba gbiamotumo

(Mk. 14:53-65; Rk. 22:54-55,63-71; Yo. 18:12-14,19-24)

57Agu yo nazi Yesu i ki ndu na ko koyo du gbiamotumo ni nga Kayafa, ho abakeapai adungura tiyo ku ho ni na ga aYudo abaakumba. 58Ono Petero ape ko tuturu, kuti mburu gu bambu nga ga gbiamotumo, ki rimi ku dimo yo, ki sungu na amoyambu, ka bi gu pai nikamanga. 59Abairamotumo ki nigbata pai agbata na ga aYudo aboro rondo dunduko kuti Yesu ka imo ko; 60ka i abi nga pai kuti ko ya, dungu adezire avura ye vurũ. Ono fuo ho agu yo ki ye ue, 61naya, “Gi kumba re aya wẽ, ‘Mi rengbe na gbarasa ga Mbori yekaru, ki dua ha berewe rame ki du biata.’ ” 62Gbiamotumo ki ru ku ari, ki ya fu ko, “Mo akaraga nga pai fere te? Gini pai agi aboro agumba kuti ro re?” 63Ono Yesu aongo aonga. Gbiamotumo ki ya fu ko, “Mi nazungadi ro ni rimo Mbori du ni ungako, mo yúgu he fu rani si ngia Kristo nga mo, nga Wiri Mbori?” 64Yesu ki ya fu ko, “A si mo agumba ha re. Ono ya mi foro, fuo gi rago re oni abi Wiri boro ko sungu pati kobe tandu, niye rogo mai ngbangbaturũ yo.” 65Gbiamotumo ki ta sira gako aroko, niya, “Ko nagberã ngbako yo. Gini pai ani akpi nyemu aboro gumba ha kuti ko berewe? Oni gi gberã ngbako yo awere. 66Oni ya wãi tigaoni?” I ki ta karaga ha niya, “Kpi ko ngba.” 67I ki nisukudi kpakpuko nituturã ko. Akura yo ki nita ko ni kpabeyo, 68ki ya, “Kristo nga mo, mo gumba nga ha fu rani! Da du nata ro?”

Petero aoro rimo Yesu

(Mk. 14:66-72; Rk. 22:56-62; Yo. 18:15-18,25-27)

69Were Petero nasungu ti mburu bambu. De pangbadimo ki ta ye fuo ko, niya, “Oni nidu a na gu boro Gariraya nga Yesu.” 70Ono ko ki ti kangu he ati barangba yo dũ, ki ya, “Mi aina nga gu pai mo agumba ha te.” 71Ho ko akuru ni ku ngbadimo, kura de pangbadimo ki bi ko ki niya fu agu yo nadu ho, “Gi kumba re nidu a na gu boro Nazareta nga Yesu.” 72Ko ki ti kangu he ati berewe, ki zunga he, ki ya, “Mi aina nga gu kumba te re.” 73Fuo ho ngbutuko agu yo naarundu ho ki ta ye fuo Petero niya, “Mo nidu dagba yo a ni rengo; bambiko furaro kusi he.” 74Ko ki tona sarawa tiko nyanyaki ki nizunga he, niya, “Mi aina nga gu kumba te re.” Bakondo ki kua akua ni ba sa. 75Petero ki tingidi gu pai Yesu agumba, wa ko aya, “Mo aóra rimore aora mbata bakondo nikakua bara biata.” Ko ki kuru, ki nikpari akpara gbe ni nunga.

Currently Selected:

Matayo 26: ZB1978

Highlight

Copy