Matayo 23

Sino abakeapai na aFarusi

(Mk. 12:38-40; Rk. 20:45-47)

1Yesu ki gumba pai fu rimbasa aboro na gako abawiriki, 2ki ya, “Abakeapai nasunga auru ga Mose mbata na aFarusi, 3agu apai dunduko tie i ka gumba pa ha fu roni, oni mángi kina ha ki ka kuti ni; ono ka oni péke nga sinoyo ka manga wa yo ya; bambiko i nagumba pai, ono i amanga nga ha te. 4Ii, i navoda rõrõi tindiro ki tutumba ha ku pagorõ aboro; ono i akpi nga nyemu ka zada ha tigayo ni wirinzagayo te. 5Ono gayo apai dunduko i namanga ha fu aboro i bi yo ti ni: bambiko i nasa gayo úradatise ni bakere he, ki mangi pangba gayo aroko ni kikii he, 6ki nikpi nyemu bairisa kporo pumbo, na ambata irisa bambutiria yo, 7na paa aboro kuti yo bangbeahe yo, na aboro ya ti yo, bayugupai. 8Ono ka i ya nga ti roni bayugupai ya; bambiko gu sa nga gaoni bayugupai, oni ki du ni awirina dunduko. 9Ka oni ya nga ti gu boro du zegino wẽ baroni ya; bambiko Baroni sa du ngbangbaturũ yo. 10Ka i ya nga ti roni baira ya; bambiko kina Kristo sa nga bairaroni. 11Ono gu ni ka du dagba roni yo ni bakumba susi, ni ka du ni gaoni moyambu. 12Gu ni ka kiisa tini, i aúmbasi ni aumbasi; na gu ni nikaumbasi tini i akíisa ni.

Yesu ape pa rungo fu abakeapai na aFarusi

(Rk. 11:37-54)

13“Ono na gberẽ he fu roni abakeapai na aFarusi, nga airabiriki! bambiko oni nakisa gu ngbi nga ga ngbangbaturũ be aboro; bambiko oni arima nga tigaoni te, oni aida nga fu agu yo nakpi nyemu he i rimi ko yo a te. 14Na gberẽ he fu roni abakeapai na aFarusi, nga airabiriki! bambiko oni narita ga adekurugbo ahe, ki nikpari ni gbanga ha ni biriki; si du i ka gbarasa ngbanga fu roni ti ni susi. 15Na gberẽ he fu roni, abakeapai na aFarusi nga airabiriki! bambiko oni nake pati baime na pia yo ka sa boro sa ni gaoni bawiriki; ho oni ka sa ni ni, oni ki sa ni ni wiri Geyena susi roni wa bara ue.

16“Na gberẽ he fu roni, nga iravurari angbembatayo fu aboro, naya, ‘Gu ni ka zunga yekaru, si gbua; ono gu ni ka zunga dahabu nga ga yekaru ni nga boro bape.’ 17Oni nga mumungo aboro ni airavurari! Dahabu na gu yekaru nasa dahabu ni ziazia ha, gini gu susi? 18Oni ki ya, ‘Gu ni ka zunga bamotumo yo, si gbua; ono gu ni ka zunga gu gamahe du auru he, ni nga boro bape.’ 19Airavurari nga oni! Bambiko watadu gamahe, na gu bamotumo nasa gamahe ni ziazia ha, gini gu susi? 20Gu ni nazunga bamotumo tie ni nazunga ha, na agu ahe dunduko du auru he. 21Gu ni nazunga yekaru, ni nazunga ha, na gu ko sungu vuru he yo. 22Gu ni nazunga ngbangbaturũ, ni nazunga ga Mbori mbatabakindo, na gu ko sungu ri he.

23“Na gberẽ he fu roni, abakeapai na aFarusi, nga airabiriki! bambiko oni nafu sa dagba bawe nga ga danda na anisi na kumina, oni ki he manga gu pai kii dagba arugute, nga sapangbanga, na inapai, na idapase; ono ka oni amangi agi apai re ka oni ahe nga manga gu kura ha a ya. 24Oni nga iravurari angbembatayo fu aboro, naba wiri gbiro ku sa yo, ki mbiri kameri!

25“Na gberẽ he fu roni, abakeapai na aFarusi, nga airabiriki! bambiko oni nazunda gii inga yo na gii kurungbu yo, ono vuru he yo hi ahi be gbu ahe na ruguzuruguzu apai. 26Mo iravurari Farusi, mo zúndu vuru inga yo na vuru kurungbu yo mbata, gii he yo ki giri.

27“Na gberẽ he fu roni, abakeapai na aFarusi, nga airabiriki! bambiko oni du wa vurusivurusi ambia murã du ni wene he ti kpotoho bangirise, ono vuru he yo hi be meme kangba aboro, na zirĩ ahe dunduko. 28Oni kina wo a ki wiri ruru roni bangiri aboro, ono kpotoroni yo hi be biriki na ingapai.

29“Na gberẽ he fu roni, abakeapai na aFarusi, nga airabiriki! bambiko oni nadua mbia murã anebi, ki mbakadi ga ruru aboro murã, 30ki ya, ‘Ka ani adu na atitarani, ka ani angbe nga na yo sa kusa kure anebi ya.’ 31Were, oni nga adezire roni, ya oni nga awiri agu yo naimi anebi. 32Oni hisi gu maduka tie nga ga abaroni. 33Oni nga awo, oni nga awiri awo, oni awira pa bata be gu mbusa nga ga Geyena wãi? 34Were, oni ngére, mi nakeda anebi fu roni, na airatatamana, na abakeapai, agu yo oni aímo yo ki wagi yo; agu yo oni atáka yo rogo gaoni bambutiria yo ki nirungosi yo rogo akporo, 35ya gu ruru kure dunduko i auka ku sande, si ye ku ri roni, tona ti kure Ebere nangia ruru boro dati kure Zakaraya wiri Barakiya, ko, oni aimi ko dagba kparakpara ba na bamotumo. 36Ya mi fu roni ni rengo, agi ahe dunduko re si aye ku ri gi rika aboro re.

Ga Yesu kparakpe tipa Yerusarema

(Rk. 13:34-35)

37“Ako aboro Yerusarema, aboro Yerusarema, ninaimo anebi, ki nizumudi agu yo i akedi yo fuo roni! mi akpi nyemu dungura awironi a wa kondo nadungura awiru ku tii puporu bara wãi, ka oni aida nga ha ya! 38Oni ngére, i he gaoni kporo fu roni ni bate. 39Bambiko ya mi fu roni, oni abi nga re berewe te, daho oni ka ya ni, ‘Mbori fu maku fu gu ko naye ni rimo Gbia.’”

Currently Selected:

Matayo 23: ZB1978

Highlight

Copy