Matayo 21

Yesu arimi na irisa ku Yerusarema yo

(Mk. 11:1-11; Rk. 19:28-40)

1Ho i ambeda ni ku Yerusarema yo i ki da ku Betefage yo, ku pati bagangara Aeraya, Yesu ki kedi abawiriki ue, 2niya fu yo, “Oni ndú ku rogo gu kporo du pati roni, oni abí dongi ni ba sa ni vovo ru, na paranga dongi a na u. Oni záki ra ki ye na ami kono du mi ni. 3Ka boro sana roni, oni ki ya, ‘Gbia nakpi nyemu ra’, ni ki kedi ra ni ba sa.” 4Were gi pai re da gu pai dũ ni digisidigisi he nebi agumba ha, naaya,

5“Oni yá fu aboro Siona,

Oni ngére, gaoni bakindo naye kono du oni ni,

ni umbasiti nisungu auru dongi,

auru paranga wiri dongi a.”

6Abawiriki ki ndu ki mangi a wa Yesu arugu yo na ni, 7i ki ye na dongi na paranga dongi, ki ba gayo aremu auru ra; ko ki sungu ri he. 8Aboro rimbasa ki gbaragi gayo aremu ni dungu yo gene; agu yo ki dewe bengua ki gbaragi he gene. 9Gu dungu aboro naandu mbata yo fu ko, na agu yo naapeka ko, i ki ta paa ku ari, niya, “Tambuahe fú wiri Dawidi! Mbori fu maku fu gu ko naye ni rimo Gbia! Tambuahe dú ari yo gbe!” 10Ho ko aye ni ku Yerusarema yo bakporo ki wo awo dunduko, i ki ya, “Da nga gi boro re?” 11Rimbasa aboro ki ya, “Nebi nga gi ko re nga Yesu, ye Nazareta yo, du Gariraya yo.”

Yesu agirisi yekaru

(Mk. 11:15-19; Rk. 19:45-48; Yo. 2:13-22)

12Yesu ki rimi ku rogo ga Mbori yekaru, ki bafu agu yo ku zegi yo dunduko nanababaga ahe na agu yo nanangbeka ahe yekaru yo, ki vavagadi ga abaundaamarã ambisa, na agu ambata nga ga agu yo nanababaga ambipo. 13Ko ki ya fu yo, “Si ni keke he ya, ‘I ayá ti gi bambu, bambu kparakpe’; ono oni sa ha ni yaro abatuka.”

14Airavurari na airaterenga ki niye ku yekaru yo; ko ki husi yo. 15Ono ho abairamotumo abi gu iiriwo apai ni ko amangi he na abakeapai, na wa agude apaa yekaru yo, ki ya, “Tambuahe fu wiri Dawidi!” ngbaduyo ki niimi aima bakere; 16i ki ya fu ko, “Mo gi gu pai agi yo agumba ha re?” Yesu ki ya fu yo, “Ii: oni ageda nga ha, ya,

‘Mo rugu pa tambuahe zaa

ku ngba rukutu agude na ahaamai’, te?”

17Ko ki guari pati yo, ki kuru rogo gu bakporo re ka ndu ku Betania yo, ki ra yo.

Yesu atiwa vurumo

(Mk. 11:12-14,20-26)

18Were wiso wa ko akaraga tiko ku bakporo yo, gomoro amangi ko. 19Ko ki bi vurumo pangba gene, ki da pati he, ka ko abi nga zuzuhe ti ni ya, ono Kina kpehe; ko ki ya fu he, “Ka mo zú nga berewe fuo gere wa sa ya.” Were vurumo ki nyokora anyokora kindi. 20Ho abawiriki abi he ni, si ki niiriwo airiwo ti yo, i ki ya, “Gu vurumo re si niwiri pa nyokora ni ipo wãi?” 21Yesu ki karaga ha ki ya fu yo, “Ya mi fu roni ni rengo, ka idapase du ti roni, ka oni asaka nga ha kpotoroni yo ya, oni amánga nga kina gu i nimangi he fu vurumo te re, ono ka oni vura gumba ha fu gi bagangara re, si guari ki ti ati ku baime yo, si amánga amanga wo. 22Ahe dunduko, gu he ka oni sana he tipa ha rogo kpe yo, ni idapase, oni adia ha adia.”

Sanahe tipa ga Yesu tandu

(Mk. 11:27-33; Rk. 20:1-8)

23Ho ko aye ni ku yekaru yo, abairamotumo na ga aboro abaakumba ki ye koyo du ko ni wa ko ayugo pai, ki ya, “Gini tandu mo amanga agi apai na ni re? da asia agi apai foro mo amanga re?” 24Yesu ki karaga ha ki ya fu yo, “Mi asana roni a tipa pai sa, gu ka oni karaga pai fere, mi nikagumba pa gu tandu fu roni mi amanga agi apai na ni re. 25Gu bapatiza nga ga Yoane, si aye wari? watadu ngbangbaturũ yo na be aboro?” I ki saki pai dagba yo, niya, “Ka ani ya, ‘Si aye ngbangbaturũ yo,’ ko aya fu rani, ‘Tipagine tie oni aida nga pa ko ti ni ya?’ 26Ono ka ani ya, ‘Si aye be aboro,’ ani gunde agunde be aboro; bambiko i naya Yoane nga nebi.” 27I ki karaga ha fu Yesu, ki ya, “Ani aina nga ha te.” Ko ki ya fu yo a, “Mi agumba nga pa gu tandu fu roni mi amanga agi apai na ni re a te.

Sanza: awirina ue

28“Ono si bangironi wãi? Kumba nadu na awiriko ue; ko ki ye fuo bambata ni, ki ya, ‘Gude, mo ndú ka manga sunge rogo ati bakakue areme.’ 29Ko ki karaga ha ki ya, ‘Mi andú nga te’; ono fuo ho ko ki sa gako berã, ki ndu. 30Ko ki ye fuo ue ni, ki gumba ha kina wo. Ko ki karaga ha ki ya. ‘Ba mi nandu,’ ka ko andu nga ya. 31Gini ni du dagba agi yo ue re namangi sangba bani?” I ki ya, “Gu bambata ni.” Yesu ki ya fu yo, “Mi nagumba ha fu roni ni rengo ya abarogo marã ngbeti na adebari narima ku rogo ga Mbori ngbi yo mbata fu roni. 32Bambiko Yoane aye koyo du oni ni ngba gene rurupai, oni aida nga pa ko te; ono abarogo marã ngbeti na adebari aidi pa ko: oni, ho oni abi he ni oni asa nga gaoni berã fuo gure ka ida pa ko a te.

Sanza: ati bakakue na ababanda ha

(Mk. 12:1-12; Rk. 20:9-19)

33“Oni gí kura sanza. Kumba nadu irakporo naru bakakue ati yo, ki gbegba pati he kirikiri, ki ge due ka pirã ha yo, ki dua gbaraga, ki he he fu ababandaati, ko ki ndu ku rogo kura ringara. 34Ho regbo zuzuhe ambeda ni, ko ki kedi gako akanga koyo du ababandaati ni, i zuzuhe. 35Ababandaati ki zi gako akanga, ki ta gu ni, ki imi gu ni, ki zumudi gu ni na, ambia. 36Ko ki kedi kura akanga berewe susi gu naadu mbata; i ki mangi agi yore kina wo a. 37Ono fuo ho, ko ki kedi wiriko nga kumba fu yo, ki ya, ‘I airisa wire.’ 38Ono ho ababandaati abi wiriko ni, i ki ya dagba yo, ‘Dikumbo du re; oni yé, ani imi ko, ũkumbo du ni gaani,’ 39I ki zi ko, ki kusi ko ku sa yo ti ati bakakue, ki imi ko. 40Ho iraati ka ye ni ko amanga wãi fu agu ababandaati re?” 41I ki ya fu ko, “Ko agbárasa gu gbegberẽ aboro re gbegberẽ, ki he ati fu kura ababandaati nikafu zuzuhe na regboho.”

42Yesu ki ya fu yo, “Oni ageda nga, rogo Ziazia Kekeapai yo te? ya,

‘Gu mbia abaduabambu agindiga, ha,

si i asa ha ni gu nidu ti tukpu he ri he,

gi pai re Gbia amangi he,

si ki niiriwo bangirani.’

43Ya mi fu roni wẽ, gu ngbi nga ga tyw i adia ha adia be roni, i ki fu he fu gu aboro nikazu kina gaha zuzuhe. 44Gu ni ka ti ku ri gi mbia re ni akita akita ono gu ni si ka ti ku auru ni, si agbándaka ni agbandaka wa kina nvutu.”

45Ho abairamotumo agi gako asanza ni na aFarusi, i aini he ya ko agumba pa yo. 46Ho i aasadi zia ko ni, i ki gunde agunde be rimbasa aboro, bambiko i aya ti ko nebi.

Currently Selected:

Matayo 21: ZB1978

Highlight

Copy