Matayo 17

Kpoto Yesu asa tihe

(Mk. 9:2-13; Rk. 9:28-36)

1Fuo rame sita Yesu ki rogo aPetero, na Yakoba, na wirinako nga Yoane, ki dakpa na yo ku ri bagangara yo ni sa yo. 2Kpotoko ki sa tihe ku bangiriyo; kpakpuko ki du adu kurẽkurẽ wa kina uru, gako remu ki vuru avura wa imarago. 3Oni ngére, aMose na Eriya ki ye fuo yo ki nifura na Yesu. 4Petero ki ya fu Yesu, “Gbia, du ani erẽ a ngba ti rani; ka mo kpi nyemu he mi adúa basura biata; gamo sa, ga Mose sa, ga Eriya a sa.” 5Ko ki ta du na kina fura were, mai ki vuru avura ba riyo; fugo ki poi ki ya, “Wire du re, nyemuko namanga re, ngba ko ti re gbe; oni gí pa ko.” 6Ho abawiriki agi gu pai ni re, i ki vagadi kpakpuyo, ki nigunde gbe. 7Yesu ki ye ki zadi yo, ki ya, “Oni gúari, ka oni gúnde nga ya.” 8I ki ya ngere ku ari, ka i abi nga boro ya, kina Yesu sa.

9Wa i aguari ri bagangara yo, Yesu ki rugu yo, ya, “Ka oni pé nga pa yuguyugu pai ya, da kina ho Wiri boro ka zinga ni berewe dagba akangba.” 10Were gako abawiriki ki ta sana ko, niya, “Wa du he were, tipagine abakeapai aya ti ni Eriya aye mbata?” 11Ko ki karaga ha, ki ya, “Eriya ayé aye ni rengo, ko ki mbakadi ahe dunduko. 12Ono ya mi fu roni wẽ, Eriya aima ye, i aina nga ko te, ono i amangi ko wa i akpi nyemu he. Kina wo Wiri boro ahi dungu apai be yo.” 13Were abawiriki ki rugu tiyo na ni ya ko agumba pa Yoane Babapatiza fu yo.

Yesu ahusi gude na imawirianya ti ko

(Mk. 9:14-29; Rk. 9:37-43)

14Ho i aye ni ku pati rimbasa, kumba ki ye fuo ko ki ta kuka barangba ko, niya, 15“Gbia, mo ini pai fu wire, bambiko ko na imawirianya ti ko, ko naima be he gbegberẽ; bambiko ko natiwa ku we yo dedede, ki nitiwi ku ime yo a dedede. 16Mi ki ndu na ko fuo gamo abawiriki, ka si adu nga wa ka i husi ko ya.” 17Yesu ki karaga ha ki ya, “Ako gi keretukeretu rika aboro re nazanga idapase, ani aráka na oni wãi? mi ahi gaoni pai da wari? Oni yé na ko kono du mi ni.” 18Yesu ki za ru; daimona ki kuru kpoto gude yo. Gude ki hu ti kina gu saa re. 19Were abawiriki ki ye ni sa yo fuo Yesu, ki ya, “Tipagine ani arengba nga ka danda ru ti ni ya?” 20Ko ki ya fu yo, “Bambiko gaoni idapase toni. Bambiko ya mi fu roni ni rengo, ka gaoni idapase du wa tunga musutada, oni ayá fu gi bagangara re, ‘Mo gúari erẽ koyo re;’ si ki guari; a nga pai sa ka gasi roni te.” 21[“Ono ngbatunga gi ru re ago nga be he te kina kpe na gina riahe.”]

Yesu ayugu he ni ue he ya ko nikakpi ki zingi be kpio

(Mk. 9:30-32; Rk. 9:43-45)

22Wa i asungu Gariraya yo, Yesu ki ya fu yo, “I afú Wiri boro ku be aboro; 23i aímo ko, biata uru ko ki zingi berewe.” I ki nirungo arungo bakere gbe.

Marã ngbeti tipa yekaru

24Ho i ada ni ku Kaparanauma yo, agu yo nadungura marã ngbeti tipa vekaru ki ye fuo Petero, ki ya, “Ga bayugupai nafu marã ngbeti tigako?” 25Ko ki ya “Ii.” Ho ko arimi ni ku bambu yo, Yesu ki gumba ha fu ko mbata, ki ya, “Gini pai mo aberã Simona? Agbia zegino nadia gayo marã be da? watadu be awiriyo na be kungba aboro?” 26Ho ko agumba ha ni ya, “Be kungba aboro,” Yesu ki ya fu ko, “Awiriyo nara ni riyo. 27Ono mo ndú ku baime yo, ki ba kombe, mo ki zi gu tĩo mo ka ba ru mbata; ho mo ka sara ngbaru ni, mo abi marã; mo di ru, ki fu ru fu yo tipa rani na mo, i ka kota mbiko rani.”

Currently Selected:

Matayo 17: ZB1978

Highlight

Copy