Matayo 14

Erode aimi Yoane Babapatiza

(Mk. 6:14-29; Rk. 9:7-9)

1Ni gu rago re Erode nangia bazogo ringara Gariraya agi pa Yesu, 2ko ki ya fu gako amoyambu, Gi ko re nga Yoane Babapatiza; ko zingi be kpio; mbiko gure gi gako apai re du na tandu nakura ti ni. 3Bambiko Erode azi Yoane, ki vo ko, ki moi ko ku bambukisa yo tipa Erodia, dia wirinako nga Firipo. 4Bambiko Yoane agumba ha fu Erode ya, “Ru nga ha foro mo di ri ni diaro te.” 5Ho si adu ni wa ko akpi nyemu ka imo Yoane, ko ki gunde be rimbasa, bambiko i aberẽ he ya nebi nga ko. 6Ono ho rago tingida pa vunga Erode ada ni, wiri Erodia ado gbere dagba yo, si ki ngba ti Erode. 7Were ko ki zunga he ya ko afu gu he fu ri ri akpi nyemu ka sana ko tipa ha. 8Mbiko sangba nari, ri ki ya, “Mo fú ri Yoane Babapatiza ku rogo kurungbu yo fere.” 9Rungo ki zi bakindo; ono bambiko gako zungahe, na agu yo nari riahe na ko, ko ki rugu yo i fu he afu; 10ko ki kedi aboro i ndu ka kata ri Yoane bambukisa yo. 11I ki ye na riko kurungbu yo, i ki fu he fu degude; ri ki ndu na ni fu nari. 12Gako abawiriki ki ye, ki di kangbako ki kpisidi ko; i ki nindu ka gumba paha fu Yesu.

Yesu arigi aboro 5,000

(Mk. 6:30-44; Rk. 9:10-17; Yo. 6:1-14)

13Ho Yesu agi he ni, ko ki kpara ni sa ko ka ndu kurungba yo, ku ngbakungba yo. Ho rimbasa agi he ni, i ki ye rogo abaakporo ki ndu fuo ko tigayo pia yo ni nduyo. 14Ko ki ta kura nibi bakere rimbasa, nunga yo ki mangi ko, ko ki husi gayo akaza. 15Ho nyemu ada ni, gako abawiriki ki ye fuo ko, ki ya, “Ngbakungba nga gere, uru ima ti; mo kédi rimbasa aboro, i ndu ku rogo akporo kirikiri, ka ngbeka riahe ni tiyo.” 16Ono Yesu ki ya fu yo, “Pai ho ka i guari ti ni te; oni fú he fu yo i ri he.” 17I ki ya fu ko, “Udiudi kpokuta kina bisue be rani, na atĩo ue.” 18Ko ki ya, “Oni yé na ni fere.” 19Ko ki rugu rimbasa aboro i susungu auru nvuo; ko ki di gu kpokuta nadu bisue, na agu atĩo nadu ue, ko ki ngere ku ngbangbaturũ yo ki fu tambuahe, ki kuadi kpokuta nifu he fu abawiriki, abawiriki ki fu he fu rimbasa aboro. 20I ki riki he dunduko, ki mbiki. I ki dungura gu mbusuruhe nanye, baga ki hiki bawe na ue. 21Agu akumba nari he i adu wa ka i du 5,000 gbia kuti ade na agude.

Yesu ai du ri baime

(Mk. 6:45-52; Yo. 6:16-21)

22Yesu ki tona ruga gako abawiriki ni ba sa i zorõ ku kurungba yo, ka si mbata fu ko ku mbiti yo, ko ki asia rimbasa aboro. 23Fuo asia ko rimbasa aboro, ko ki kpara ni sa ko ka ndu ku ri bagangara yo ka kpara yo. Ho rago abiri ni ko ki du yo ni sa ko. 24Ono kurungba ki du bebere baime, si ki du ngba pai yo mbiko sungbura baime naamanga ha; bambiko yuge ayada ha bakere. 25Pamanangba wiso ko ki ye fuo yo, ki nindu ri baime. 26Ho abawiriki abi ko ni ko nindu ri baime, ngbaduyo ki nikua akua, i ki ya, “Toro du!” I ki nipoi ku ari ni gunde. 27Ono Yesu ki ta gumba ha fu yo ni ba sa, niya, “Oni wása; mi du; ka oni gúnde nga ya.”

28Petero ki ta karaga ha fu ko niya, “Gbia, si ngia mo du, mo yá fere mi ye fuo ro ku ri ime.” 29Yesu ki ya, “Mo yé.” Petero ki kuru kurungba yo, ki nindu ri ime, ka ndu fuo Yesu. 30Ono ho ko abi yuge ni, ko ki nigunde agunde; ko ki tona rinda, ko ki kpari ki ya, “Gbia, mo batasi re.” 31Yesu ki tãi beko ni ba sa, ki zi ko, ki ya fu ko, “Ako mo na toni idapase, tipagine mo asaka kpotoro yo ti ni?” 32Ho i ayari ni ku kurungba yo, yuge ki kiti. 33Agu yo nadu kurungba yo ki ta irisa ko, niya, “Wiri Mbori nga mo ni rengo.”

Yesu ahusi aboro kaza Genesareta yo

(Mk. 6:53-56)

34Ho i asi ni i ki da ku rogo gu ringara nga Genesareta. 35Ho aboro gu ringara re abi ko ni, i ki kedi asunge ku rogo gu ringara re kirikiri dunduko, i ki ye na agu yo nakaza fuo ko dunduko. 36I ki zúngadi ko i zadi kina pangba gako remu; agu yo dunduko nazadi he ki huku ahuka dunduko.

Currently Selected:

Matayo 14: ZB1978

Highlight

Copy