Matayo 11

Ga Yoane Babapatiza abawiriki asana Yesu

(Rk. 7:18-35)

1Si ki ta du wa gere, ho Yesu anyasi ruga gako abawiriki ni nanidu bawe na ue, ko ki guari yo ki ta yugo pai nitungusi pai rogo gayo abaakporo.

2Were ho Yoane agi pa ga Kristo mangimangi apai ni bambukisa yo, ko ki kedi gako abawiriki, i sana Yesu ki ya, 3“A ngia gu ni naye nga mo, na ani ka ngera ti gu kura ni?” 4Yesu ki ta karaga ha fu yo niya, “Oni ndú ki yugu agu apai fu Yoane gi oni na gu bi oni: 5airavurari nangera, airaterenga ki nita, airangbataka ki nihu; airangbianga ki nigi apai, kangba aboro ki nizingi be kpio, i ki nitungusi wene pangbanga fu rungorungo aboro. 6Boro maku nga gu ni abi nga úkota ti re ya.”

7Wa agi yo aguari re ki nindu ngba gayo gene, Yesu ki tona ya fu rimbasa aboro tipa Yoane wẽ, “Oni andu ku ngbakungba yo ka bi gine? nganzi nawo be yuge? 8Ono oni andu ka bi gine? kumba navo rurungbura roko? Oni ngére, agu yo navo rurungbura roko i du ku abakindo yo. 9Ono tipagine oni andu ti ni? ka bi nebi? Ii, ya mi fu roni wẽ, ko susi nebi bakere gbe. 10Nga gi ko re i ake he tipa ko ya,

‘Mo ngére, mi nakeda gi sunge mbata yo foro,

Ko ambákada ga gene ku mbata yo foro.’

11Ya mi fu roni ni rengo, dagba agu yo ade avunga yo, a nga gu ni sa susi Yoane Babapatiza te. Ono gu ni du ni umba pa aboro rogo gu ngbi nga ga ngbangbaturũ ni susi ko. 12Tona ti rago Yoane Babapatiza, gu ngbi nga ga ngbangbaturũ nahi vura da ku awere, aboro vura nadia ha bambiko gbe he. 13Bambiko anebi dunduko na rugute i afugu pai dati rago Yoane. 14Ka oni idi pa gayo apai, gi ko re nga Eriya nikaye. 15Gu ni du na tu gia ha, ni gi nga ha.

16“Gi rika aboro re mi aríngbisa yo kuti gine? I wa kina agude nasunga bangbeahe yo, ki niyambu akurayo, 17ki ya,

‘Ani abi bia fu roni, ka oni ado nga ya;

ani ata wawa, ka oni akpara nga ya.’

18Bambiko Yoane aye ka ko ari nga he ki nimbiri he ya, i ki ya, ‘Daimona namanga ko.’ 19Wiri boro aye ki niri riahe nimbiri he, i ki ya, ‘Oni ngére, boro aramana, bambiri imekakue, badia abarogo marã ngbeti na aboro ingapai!’ Ono i asapa ngbanga fu tatamana mbiko sabehe.”

Rungo tipa abaakporo

(Rk. 10:13-15)

20Ko ki tona paa na agu abaakporo ko amangi dungu gako apai du na tandu rogo yo, bambiko i asa nga gayo berã te. 21“Na gberẽ he foro, Korazina! na gberẽ he foro, Betesaida! bambiko ka i amangi agu apai du na tandu rogo Tura na Sidona yo a wa I amangi he rogo roni yo, ka i asa gavo berã ki vo mbuzaroko, ki mbedi kuke. 22Ono ya mi fu roni wẽ, rago sapangbanga, pai angbá fu Tura na Sidona ki susi gaoni. 23Mo, Kaparanauma, i atúmba ro ku ngbangbaturũ yo? i azógosa ro ku Adisi yo bambiko ka i amangi agu apai du na tandu rogo Sodoma a wa i amangi he rogo ro yo, ka si anye ki da ti gi rago re. 24Ono ya mi fu roni wẽ, rago sapangbanga, pai angbá fu Sodoma ki susi gaoni.”

Ongoda rogo Yesu yo

(Rk. 10:21-22)

25Nigu rago Yesu ki ya, “Mi natambuaro, Ako Buba, Gbia ngbangbaturũ na sende, bambiko mo aoko agi apai re bangiri airatatamana na arugutinapai, ki kusi he fu fogo agude; 26ii, Buba, bambiko wo si angba bangiro. 27Buba afu ahe ku bere dunduko, a nga boro sa ini Wiri te, kina Ba; a nga ni sa ini Ba a te, ki na Wiriko, na gu ni Wiriko akpi nyemu ka kusa ko fu ni. 28Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni. 29Oni di gi gonga ku gorõroni, ki wiriki pa re; bambiko bayee boro nga mi nga irazerangbaduse, oni ki bi ongoda tipa mbisimoroni. 30Bambiko kii nga gi gonga te, na gi tindiro ni aakpura ha.”

Currently Selected:

Matayo 11: ZB1978

Highlight

Copy