Pa Amotume 3
3
Pa Amotumo Zereda
1“Ka ga boro gamunihe mbedisatise du ni motumo nga motumo zereda, ka ni ye na nya dagba rimbasa abagara yo, bara watadu nara, ni aniye na gu ru zanga serõ ku bara bangiri Yekova. 2Ni ki nimoi beni ku auru ri gani gamunihe mbedisatise, ki imi ru pangbadimo bamburoko dungurati; awiri Arona nga aboromotumo ki nimigidi kureru kuti bamotumo kirikiri. 3Ti gu motumo nga motumo zereda ni motumo ni we fu Yekova, ni aniye na gu nzeme du ti aũvuru yo na gu nzeme du ti vuru yo dunduko a, 4ni anirogo agbiiri ue ku sa yo, na gu nzeme du dimoru yo, na gu ngbebe du ti pavuru enderu wa sa na agbiiri a. 5Awiri Arona ki nizo ho ri bamotumo ku ri gu zozo motumo du ku ri nyake ti we; si nga motumo ni we, du ni guzuguzu fuõhe fu Yekova.
6“Ka gani gamunihe mbedisatise du ni motumo nga motumo zereda fu Yekova ni kandoro dagba rimbasara yo, bara watadu nara, ni aniye na gu ru zanga serõ. 7Ka ni ye na wiri kandoro tipa gani gamunihe mbedisatise ni aniye na u ku bara bangiri Yekova, 8ki nimoi beni ku ri gani gamunihe mbedisatise, ki imi ru barangba bamburoko dungurati; awiri Arona ki nimigidi kureru kuti bamotumo kirikiri. 9Ti gu motumo nga motumo zereda ni motumo ni we fu Yekova a, ni aniye na nzemeru na saru na nzemehe dunduko ni nadi he ti meme ngongoru, na gu nzeme du auru aũvuru yo na gu nzeme du vuru yo, 10ni anirogo agbiiri ue ku sa yo na gu nzeme du ti ni dimoru yo, na gu ngbebe du ti pavuru enderu wa sa na agbiiri a. 11Boromotumo ki nizo ho ri bamotumo wa gu riahe i afu he ni we fu Yekova.
12“Ka gani gamunihe mbedisatise du ni meme, ni aniye na u ku bara bangiri Yekova, 13ki nimoi beni ku auru riru, ki imi ru barangba bamburoko dungurati; awiri Arona ki nimigidi kureru kuti bamotumo kirikiri. 14Ni aniye na gani gamunihe mbedisatise nga motumo ni we fu Yekova, gu nzeme du auru aũvuru yo, na gu nzeme du vuru yo dunduko a, 15ni anirogo agbiiri ue ku sa yo na gu nzeme du ti ni dimoru yo, na gu ngbebe du ti pavuru enderu, wa sa na agbiiri a. 16Boromotumo anizo ho ri bamotumo, wa gu motumo i afu he ni we ni guzuguzu fuõhe. Nzemeru dunduko nga ga Yekova. 17Gi pai re si adú ni nyenye rugapai fu arika ngbatungaroni rogo gaoni abaraka dunduko, nga, ka oni níri nga nzeme watadu kure ya.”
Currently Selected:
Pa Amotume 3: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
