Pa Amotume 13

Arugute tipa ngbataka

1Yekova ki ya fu Mose na fu Arona, 2“Ho boro ka nidu ni na hihihe ti kina kpotoni, watadu iri oro, watadu biba, si ki sa tihe ti kpotoni wa kaza ngbataka, i anindu na ni koyo du Arona ni nga boromotumo, watadu fu gu ni sa dagba awiriko yo nga aboromotumo. 3Boromotumo aningana ho du kaza ni ti kpotoni; ka umu kpotoni sa tihe ni pusi he ho du kaza ni, si ki wiri kaza nmi ku tii ayu kpotoni yo, si nga kaza ngbataka; ho ngana boromotumo ho ni, ko ki ya ni ni birikosibirikosi ni. 4Ono ka ho du kaza ni du ni pusi he ti kina ayu kpotoni, si ki wiri si rimi ku tii ayu kpotoni yo, ono umu kpotoni ata sa nga tihe ni pusi he te, boromotumo ki kisi gu ni du na kaza tipa rame saba; 5boromotumo ki ngana ni ti saba rame, ka kaza ata maa nga pai bangiriko ya, ka si afira nga ti kpotoni berewe a ya, boromotumo ki kisi ni tipa rame saba berewe; 6boromotumo ki ngana ni ti saba rame berewe, ka ba kaza biri toni, ka si afira nga ti kpotoni a ya, boromotumo ki ya ni ni gigiri ni; si nga kungba ire; ni azúnda gani aroko ki giri. 7Ono ka iri oro afira ti kpotoni toni fuo yugo ni tini fu boromotumo tipa pa girisa tini, ni aniye berewe ka yugo tini fu boromotumo. 8Boromotumo aningana ha, ka iri he fira ti ayu kpotoni, boromotumo ayá ni ni birikosibirikosi ni, ngbataka nga ha.

9“Ho kaza ngbataka nidu ni ti boro, i anindu na ni koyo du boromotumo ni; 10boromotumo ki ningana ha, ka hihihe du ni pusi he auru ayu kpotoni, naima sa umu kpotoni ni pusi he a, ka oro du ti ni, 11si nga kuru ngbataka ti kpotoni, boromotumo ayá ni ni birikosibirikosi ni. Ko akísa nga ni te, bambiko ni ni birikosibirikosi ni. 12Ka ngbataka kuru ti kpotoni dunduko, ki ukadi kpoto gu ni du na kaza tona ti rini ki da ti kpete nduni, wa bi boromotumo ho, 13boromotumo ki ngana ha, ka ngbataka ukadi kpotoni dunduko, ko ayá ni giri be kaza. Si sa tihe dunduko ni pusi he, ni ni gigiri ni. 14Ono ho kpotoni nikanimburu ni na oro ni anidu ni birikosibirikosi ni. 15Boromotumo aningana gu kpotoni namburu ni oro ki ya ni ni birikosibirikosi ni, bambiko gu kpoto boro namburu ni oro si nga birikosibirikosi he, ono ngbataka nga ha. 16Ono ka gu kpotoni namburu ni oro sa tihe berewe ki du ni pusi he ni ki ndu koyo du boromotumo ni, 17boromotumo angána ni, ka kaza sa tihe ni pusi he, boromotumo ayá gu ni na kaza ni giri; ni ni gigiri ni.

18“Ho ka nzia du ni ti kpoto boro, si ki wi, 19pusi hihihe ki du ti ba nzia, watadu serõho ki du ni zamba ha, i aniyugu he fu boromotumo; 20boromotumo ki ningana ha, ka wiri kaza rimi ku tii ayu kpotoni yo, umu kpotoni aima sa tihe ni pusi he, boromotumo ayá ni ni birikosibirikosi ni. Si nga kaza ngbataka, si kuru ba nzia yo. 21Ono ka boromotumo ngana ha, umuhe adu nga ni pusi he ba ha yo ya, kaza arima nga ku tii kpotoni yo a ya, ono si biri toni, boromotumo anikisi ni tipa rame saba; 22ka si afira ti kpotoni, boromotumo ayá ni ni birikosibirikosi ni; kaza nga ha. 23Ono ka serõ du kina ku ba ha, ka si afira nga ya, si nga serõ nzia; boromotumo ayá ni ni gigiri ni.

24“Watadu ho kpoto boro nidu ni ni gbitiri he, pasioni ba ha ki sa tihe ni zamba ha watadu ni pusi he, 25boromotumo aningana ha, ka umuhe aima sa tihe ni pusi he, si ki wiri kaza rimi ku ayu kpotoni yo, si nga kaza ngbataka; si kuru oro we yo, boromotumo aya ni ni birikosibirikosi ni. Kaza ngbataka nga ha. 26Ono ka boromotumo ngana ha, ka umuhe adu nga ni pusi he ba ha yo ya, ka kaza arima nga ku tii kpotoni yo a ya, ono si biri toni, boromotumo anikisi ni tipa rame saba. 27Boromotumo aningana ni ti saba rame; ka si afira ti kpotoni, boromotumo ayá ni ni birikosibirikosi ni; si nga kaza ngbataka. 28Ono ka serõ du kina ku ba ha, ka si afira nga ti kpotoni a ya ni ni gigiri ni; si nga serõ oro we.

29“Ho kumba watadu de nidu ni na kaza ti riyo watadu ti maingbako, 30boromotumo aningana gu kaza re, ka si wiri si rimi ku tii ayu kpotoni yo, umuhe ki du nzerenzere ni ndindii he, boromotumo ki ya ni ni birikosibirikosi ni; si nga kpurunya nga kaza ngbataka ti ri boro watadu ti maingbani. 31Ka boromotumo ngana kaza kpurunya, ka si wiri si arima nga ku tii ayu kpotoni yo te, ka umuhe adu nga ni bi he a ya, boromotumo anikisi boro kaza kpurunya tipa rame saba, 32boromotumo aningana kaza ti saba rame; ka kpurunya afira nga ya, ka umuhe adu nga nzerenzere a ya, ka si wiri si arima nga ku tii ayu kpotoni yo a te, 33ni ki kpe maingbani, ono ka ni akpé nga ba kpurunya ya; boromotumo ki kisi boro kaza kpurunya tipa rame saba berewe; 34boromotumo aningana kpurunya ti saba rame, ka kpurunya aura nga ti kpotoni ya, ka si wiri si arima nga ku tii ayu kpotoni yo a te, boromotumo ayá ni ni gigiri ni; ni anizundu gani aroko, ki giri. 35Ono ka kpurunya afira ti kpotoni fuo girisa yo ni, 36boromotumo aningana ni, ka kpurunya afira ti kpotoni, boromotumo agbáta nga pa gu umuhe du nzerenzere berewe te; ni ni birikosibirikosi ni. 37Ono ka si wiri Dangiriko ya kpurunya afira nga ho te, umuhe kuru yo ni bi he, kpurunya aima go, ni ni gigiri ni; boromotumo ayá ni ni gigiri ni.

38“Ho kumba watadu de nidu ni na kaza wa imambimbo ti kpotoni kpau, 39boromotumo aningana ha, ka fuoho ti kpotoni du tataita, si nga kungba kaza nakura ti kpotoni. Ni ni gigiri ni.

40“Ka mangeri kumba mburu, ni ki du ni boro kpatakpa, ono ni ni gigiri ni. 41Ka mangerini mburu ti ngbandia kpakpuni, ni ki du ni boro soronga, ono ni ni gigiri ni. 42Ono ka fuo kaza ni zamba ha na ni pusi he du ti kpatakpa rini yo, watadu ti sorongani, si nga kaza ngbataka nakura ti kpatakpa rini yo, watadu ti sorongani. 43Boromotumo aningana ni, ka kaza hihihe du ni zamba ha na ni pusi he du ti kpatakpa rini yo, watadu ti sorongani, nawira ngbataka ti kpotoboro, 44ni nga boro ngbataka ni rengo, ni ni birikosibirikosi ni; boromotumo aniya ni ni birikosibirikosi ni; gani kaza ti kina rini.

45“Gu boro du ngbataka ti ni, ni aniukadi tini na sipisipi aroko, mangerini ki du ni zakizaki he ni gbanga ha, ni anizi ngbani ki poi ku ari ki ya, ‘Birikosibirikosi boro, birikosibirikosi boro.’ 46Ni anidu ni birikosibirikosi ni ti agu arame dunduko du kaza ti ni; ni ni birikosibirikosi ni; ni ki nisungu rogo gani kporo ni kina sa ni ku gii bataya yo.

47“Ho nvuta roko ni wa kaza ngbataka, watadu si du ni tutu giri mange kandoro, watadu ga giri nzibi, 48watadu si ti kumba girihe na ti dehe, ti giri nzibi watadu ti giri kandoro, watadu ti kpoto nya na ti gu he i nimangi he na kpoto nya; 49ka kaza kuru ni nvutanvuta ha ti roko watadu ni zamba ha, watadu ti kumba girihe na ti dehe, watadu ti kpoto nya, watadu ti gu he i nimangi he na kpoto nya, si nga kaza ngbataka, i ka niyugu he fu boromotumo. 50Boromotumo aningana gu kaza re, ki kisi gu he du na kaza ti ni tipa rame saba; 51ko aningana gu kaza re ti saba rame berewe. Ka kaza kii ti roko, watadu ti kumba girihe na ti dehe, watadu ti kpoto nya, na ti gu he i nimangi he na kpoto nya, gu kaza re si wa gbegberẽ kaza ngbataka ti roko; roko du ni birikosibirikosi he. 52Ko anizo gu roko re du na kaza wa ngbataka ti ni, watadu du he ti kumba girihe na ti dehe, watadu ti giri mange kandoro na giri nzibi, watadu ti gu he i nimangi he na kpoto nya, bambiko si nga gbegberẽ kaza wa ngbataka; i anizo ho azo.

53“Ka boromotumo ngana ha, ka kaza ata kia nga ti roko ya, watadu ti kumba girihe na ti dehe a ya, na ti gu he i nimangi he na kpoto nya a ya, 54boromotumo anirugu pai ya i zúndu gu he du kaza ti ni, ko ki kisi he tipa rame saba berewe; 55boromotumo aningana ha fuo zunda yo ho, ka kaza asa nga rangi he ya, ka kaza avura nga kia vurũ ya, si du ni birikosibirikosi he. Oni anizo ho azo, bambiko kaza ti ni dũ.

56“Ono ka boromotumo ngana ha, kaza ki biri toni fuo zunda yo ho, ko ki sipi he ti roko, watadu ti kpoto nya, watadu ti kumba girihe na ti dehe. 57Ka si akúra ti roko kindi, watadu ti kumba girihe, watadu ti dehe, watadu ti gu he i nimangi he na kpoto nya, si nga gu kaza nakia; oni anizo gu he azo du kaza ti ni. 58Ono gu roko oni ka zunda ha, kaza ki guari ti ni, watadu ti kumba girihe na ti dehe, watadu ti gu he i nimangi he na kpoto nya, oni ki zundu he ni ue he, si ki giri.”

59Gere nga gu rugute du tipa gu kaza du wa ngbataka du ti roko mange kandoro watadu giri nzibi, watadu ti kumba girihe na ti dehe, watadu ti gu he i nimangi he na kpoto nya, i ka ya ti ni si ni gigiri he, watadu si ni birikosibirikosi he.

Currently Selected:

Pa Amotume 13: ZB1978

Highlight

Copy