Yoere 1
1
Pa gbarasa ringara na ayere
1Gu pai nga ga Yekova naye koyo du Yoere ni, nga wiri Petuere;
2Oni nga gbinza aboro, oni gí gere,
oni a nga araki rogo ringara dunduko, oni yé turoni!
Ngbatunga gi pai re amangi rago roni,
watadu ti rago abaroni?
3Oni gúmba pa ha fu awironi,
awironi ki gumba ha fu awiriyo,
awiriyo ki gumba ha fu gu kura ngbatungayo.
4Gu he a wiri ayere ambu he,
gugu ayere ki riti he.
Gu he gugu ayere ambu he,
abakirigba ki riti he,
na gu he abakirigba ambu he,
ayere gbarasangbi ki riti he.
5Oni nga akpibuda, oni zíngi rame yo, ki nikpari;
oni nga ambiri imekakue dunduko, oni yóro wawa,
tipa nzinziri imekakue, bambiko i di he ti ngbaroni ku sa yo.
6Bambiko rikaaboro naye sa gi ringara,
nga airaome i arengba nga ka geda yo ya;
rindiyo wa rindi abahu, gburukayo wa ga nabahu.
7I gbarasi gimi abakakue,
ki sapu gimi angua avurumo;
i yuku sisihe ki ba ha ku sande;
abehe du ni vurusivurusi he.
8Oni kpári wa gu ngasu de vo roko gira
tipa gu kumba napazua ri rago parangari.
9I rogo motumo riahe na mbirimbiri motumo ku sa yo
rogo ga Yekova bambu yo.
Aboromotumo nakpara ni nunga,
nga amangi pa ga Yekova sunge.
10I gbarasi aati,
ringara nakpara ni nunga;
bambiko i gbarasi zende ahe,
vovo imekakue nanyota,
nzeme nanyasa a.
11Ako oni nga abasopobino, oni dú na zee,
Ako oni nga ababanda abakakue, oni yóro wawa,
tipa nganu na he wa mapunga; bambiko zuzu aũati gberẽ.
12Bakakue nauga,
ngua vurumo nakpi.
Rindi ngua wa ndavu, na mbiro a, na rindi ngua wa ga manga
na agu angua du ati yo dunduko si ugu dũ;
ngbarago ti awiri aboro a te.
13Ako aboromotumo, oni úkadi mbuzaroko ki nita ngbaduroni na kpenunga,
Oni nga amangi pa bamotumo, oni tá wawa.
Ako oni nga amangi pa gi Mbori,
oni rími, oni rá yuru na mbuzaroko ti roni!
Bambiko i ka na motumo riahe na mbirimbiri motumo
ti ga gaoni Mbori bambu.
14Oni kpára rago tipa gina riahe,
oni yámbu irisiirisi gbuu.
Oni dúngura abaakumba
na araki rogo ringara dunduko
ku tii ga Yekova bambu yo nga gaoni Mbori;
ka kpara fu Yekova.
15Ako rungo du tipa gu rago re!
Bambiko rago Yekova nambeda,
si naye wa gu gbarasahe du be gu Ko du na tandu apai dũ.
16A nga i di riahe ku sa yo bara bangironi,
na ngbarago na du pusiapusia
ti ga gaoni Mbori bambu yo te?
17Tunga ahe nazirã ku tii mbadambada sende yo, asoro nye ni ku he;
agbamu ni kurugboho
bambiko zende ahe ugu ni agba ha.
18Ako anya nauko!
Si kpakara fu rimbasa zogozogo anya
bambiko banambu tipa ra te;
zavura arimbasa akandoro ami ni mbumbu ra.
19Ako Yekova, mi nakpara foro.
Bambiko we riti
abanambu ngbakungba yo,
mirãwe ki zo
angua dunduko ringara aati yo.
20Zavura anya nvuo ami nakpara foro
mbiko ime wiriadi ugudi dũ,
we ki riti
abanambu ngbakungba yo.
Currently Selected:
Yoere 1: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
