Bambata Pai 48

Pa fu Yakoba maku fu aEfuraima na Manase

1Were, fuo agi apai re, i ki ya fu Yosefa, “Mo ngére, bamo nakaza”; ko ki rogo awiriko ue ki ndu na yo, nangia Manase na Efuraima. 2I ki gumba ha fu Yakoba ki ya, “Mo ngére, wiro nga Yosefa naye kono du mo ni”; Yisaraere ki nyakasi tiko ki sungu auru ba. 3Yakoba ki ya fu Yosefa, “Mbori du na tandu apai du nayugu tiko fere Ruza yo rogo gu ringara nga Kanana, ki fu maku fere, 4ki ya fere, ‘Mo ngére, mi azúgasi ro, ki ngeesi ro ki sa ro ni rimbasa angbatunga aboro. Mi ki fu gi ringara re fu ngbatungaro fuo ro, si dú ni gayo nye anye kindi.’ 5Were agu awiro du ue re, nga agu yo i abatika yo foro ringara Ezipeta no, mbata mi nikaye kono du mo ni ku Ezipeta no, gimi yo du; Efuraima na Manase adú ni gimi yo wa kina aRubena na Simona. 6Agu agude mo ka abatika yo fuo yo nikangia gamo yo; i ayámba rimoyo ti rimo awirinayo rogo gayo ringara. 7Ho mi ayega ni Padana yo, rungo adu fere wa Raere akpi be re gene rogo gu ringara nga Kanana wa Efurata aturú aturã toni koyo; mi ki kpisidi ri yore ngba gene ku Efurata yo, si nga Betereme.”

8Yisaraere ki ngana awiri Yosefa, ki ya, “Ada nga agi yo re?” 9Yosefa ki ya fu bako, “Awire du, nga agu yo Mbori afu yo fere erẽ.” Ko ki ya, “Mi nazungadi ro, mo yé na yo kono du mi ni, mi fu maku fu yo.” 10Ono bangiri Yisaraere adu adu tataita be gbinza, ka ko angera nga ngba ya. Yosefa ki ye na yo koyo du ko ni; ko ki nyoro pa ngbayo ki dungo yo. 11Yisaraere ki ya fu Yosefa, “Mi aberã nga ha ya mi abi kpakpuro berewe te; mo bí nga, Mbori idi he fere mi bi awiro a.” 12Yosefa ki kusi yo dagba arukusuko, ko ki nugadi ni kpakpuko ku sende. 13Yosefa ki rogo yo ue, Efuraima ku kumbabeko yo ku bara garebe Yisaraere, na Manase ku garebeko yo ku bara kumbabe Yisaraere, ki ye na yo fu ko. 14Yisaraere ki taĩ kumbabeko, ki moi he ku ri Efuraima, nangia tame, ko ki moi garebeko ku ri Manase, ki wata abeko, bambiko Manase nangia unvuru. 15Ko ki fu maku fu Yosefa ki ya,

“Gu Mbori abuba nga

aAbarayama na Yisaka nanata bara bangiri ko,

nga gu Mbori nanariga re na uru

ki da ku areme,

16gu maraika nanabatasa re

be gbegberẽ apai dũ, ko fú maku fu agi agude re;

rimore na rimo abuba nga aAbarayama na Yisaka

dú ni yambuyambu he ku ri yo;

i mói pai amaa ki dú ni barimbasa aboro

auru kpotosende.”

17Ho Yosefa abi he ni ya bako moi kumbabeko kina ku ri Efuraima, si ki gberẽ ti ko; ko ki tumba be bako ri Efuraima ki gbisi he ku ri Manase. 18Yosefa ki ya fu bako, “Wo te, buba; bambiko gi ko re nga unvuru; mo moi kumbabero ku ri ko.” 19Bako ki ka aka, ki ya, “Mi ini he, wire, mi ini he. I asá ko ni rimbasa aboro, ki kiisi pa ko a; ono tameko adú ni bahe ti ko, ngbatungako adú ni barimbasa rikaaboro.” 20Ko ki fu maku fu yo ni gu uru re, niya,

“Rogo ro yo aYisaraere ka afu maku ni, niya,

‘Mbori sá ro wa Efuraima na Manase a.’ ”

Si du ko amoi Efuraima ti ni ku mbata yo fu Manase. 21Yisaraere ki ya fu Yosefa, “Mo ngére, mi nikakpi, ono Mbori adú na oni, ki karaga roni berewe ku rogo ga abaroni ringara. 22Were, mi fu bete kparakpara rago sa foro ki susi ga awiribamo, nga gu mi adi he be aAmoro ni gi basape na mboto.”

Currently Selected:

Bambata Pai 48: ZB1978

Highlight

Copy