Bambata Pai 46

Pa ga Yakoba na gako aboro ku Ezipeta yo

1Yisaraere ki guari na gako ahe dunduko, ki da ku Bera-saba yo, ko ki tumo yo ni amotumo fu Mbori nga ga Yisaka Mbori nangia bako. 2Mbori ki gumba pai fu Yisaraere rogo yuguyugu pai yuru, ki ya, “Yakoba, Yakoba.” Ko ki ya, “Mi du re.” 3Ko ki ya, “Mi nga Mbori, gu Mbori nga ga bamo ko; ka mo gúnde nga tipa ndu ku Ezipeta yo ya; bambiko mi asá ro yo ni bakere rikaaboro. 4Ani andú na mo ku Ezipeta yo. Ani ki yega na mo berewe a; Yosefa ki kisi bangiro ni beko.” 5Yakoba ki guari Bera-saba yo; awiri Yisaraere ki tindi Yakoba nangia bayo, na rukutu awiriyo, na adiayo, rogo agu angbagida Faro akedi he tipa tinda ko rogo. 6I ki rogo gayo zogozogo anya, na gayo ahe dũ nga gu i abi he ringara Kanana yo, i ki da ku Ezipeta yo, aYakoba na ngbatungako dunduko, 7awiriko, na awiri awiriko nangia akumba, awiriko nangia ade na awiri awiriko nangia ade; na ngbatungako dunduko, ko ayega na yo ku Ezipeta yo.

8Gere nga rimo awiri Yisaraere nga agu yo nayega ku Ezipeta yo, Yakoba na awiriko. Rubena nangia bambata wiri Yakoba, 9na awiri Rubena: Anoka, Paru, Eserone na Karumi. 10Awiri Simona: Yemuere, Yamina, Oada, Yakina, Soara, na Saura nangia wiri dere aboro Kanana. 11Awiri Revi: Gerusona, Koata, na Merari. 12Awiri Yuda: Ere, Onana, Sera, Perese, na Zera, ono Ere na Onana akpiki kina ringara a Kanana yo; awiri Perese nangia Eserone na Amura. 13Awiri Yisasakara: Tora, Puva, Yobo, na Simerona. 14Awiri Zeburuna: Serede, Erone, na Yarere, 15agi yo re ki ngia awiri Rea, nga agu yo ri abatika yo fu Yakoba Padana-arama yo, na wiriko nangia Dina ni de; awiriko adu dunduko nga akumba na ade wa 33. 16Awiri Gada: Sifeyona, Agi, Suni, Esebone, Eri, Arodi, na Areri. 17Awiri Asera: Yimena, Yiseva, Yisevi, Beria, na Sera nangia dawiriyo. Awiri Beria ki ngia Ebere, na Marekiere, 18agi yo re nangia awiri Zirepa, nga gu ri Rabana afu ri fu wiriko nangia Rea; ri ki batika agi yo 16 re fu Yakoba. 19Awiri Raere, dia Yakoba: Yosefa na Benyamina. 20Yosefa ki batika aManase na Efuraima ringara Ezipeta yo, nga agu yo Asenata abatika yo fu ko nangia wiri Potifera, nangia boromotumo Ono yo. 21Awiri Benyamina: Bera, Bekere, Asebere. Gera, Namana, Ei. Roso. Mupima, Upima, na Arada, 22agi yo re nangia awiri Raere, nga agu yo Yakoba abatika yo wa aboro 14. 23Wiri Dana: Usima. 24Awiri Nafatari: Yasere, Guni, Yesere, na Sirema, 25agi yo re nangia awiri Bira, gu ri Rabana afu ri fu wiriko nangia Raere. Agi yo re ri abatika yo fu Yakoba wa aboro saba. 26Agi yo re dunduko nayega na Yakoba ku Ezipeta yo, nangia agu yo naenge ti kina ko, kpara kina dere awiriko, i adu dunduko 66; 27awiri Yosefa adu ue nangia agu yo i abatika yo fu ko Ezipeta yo. Ngbatunga Yakoba ki du dunduko 70, nga agu yo nayega ku Ezipeta yo.

Pa Yakoba na gako aboro ku Ezipeta yo

28Ko ki kedi Yuda ku mbata yo fu ko koyo du Yosefa ni, ka yugo gene fu ko ku mbata yo ku Gosene yo; i ki da ku ringara Gosene yo. 29Yosefa ki mbakadi gako ngbagida, ki ndu ka gbia bako nangia Yisaraere Gosene yo; ko ki yugu tiko fu ko, ki ti ku gorõko yo, ki nikpari ni gbanga ha ni aume ku ri gorõko. 30Yisaraere ki ya fu Yosefa, “Awere mi rengbe ka kpi, wa bi mi kpakpuro, ki ini he nga mo ni ungaro kindi.” 31Yosefa ki ya fu awiribako na fu ga bako aborokporo, “Mi nikandu ka yugo ho fu Faro, ki ya fu ko, ‘Awiribuba na ga buba aborokporo ima da kono du mi ni, nga agu yo naadu ringara Kanana yo; 32agi akumba re nga ababanda akandoro, bambiko i nangia abazogo anya. I ye na gayo rimbasa akandoro, na gayo rimbasa abagara, na gayo ahe dunduko.’ 33Si adú wa gere, ho Faro ka yamba roni ni, ki ya, ‘Gaoni sunge nga gine?’ 34Oni ayá. ‘Gamo amoyambu ningia abazogo anya, tona ti parangarani ki da ku awere, ani na abarani a.’ Si du oni ka araka ti ni kina ringara Gosene yo; bambiko ababanda akandoro dunduko gberẽ bangiri aEzipeto ki susi.”

Currently Selected:

Bambata Pai 46: ZB1978

Highlight

Copy