Yezekere 45

Pa kparaka ringara na nzunzu ringbisaahe

1“Ho oni ka nikparaka ringara ni ni ukumbo, oni anikpara bete ringara tipa Yekova ni tumbatumba gamahe wa ziazia ngbi, bagizaha ki du wa bagiza mbiribe 25,000, patihe ki du wa bagiza mbiribe 20,000; si aniau ni kparakpara he wa du pa bakiaha dunduko. 2Dagba ha yo rago nikadu tipa kparakpara ba, bagiza pavuruhe biama ki du wa sa, nga bagiza mbiribe 500, na kungba rago pati he kirikiri wa bagiza mbiribe 50. 3Mo ki ringbisi rago rogo kparakpara ngbi, bagizaha ki du wa bagiza mbiribe 25,000, patihe wa bagiza mbiribe 10,000, yo kparakpara ba ka du ni, nga gu kparakpara ziazia ba susi. 4Si anidu ni kparakpara rago rogo ringara; si anidu tipa aboromotumo, nga agu yo namanga pa kparakpara ba ki mbedi na Yekova ka manga pa ko; si ki du ni ba tipa gayo abambu ni kparakpara ha tipa kparakpara ziazia ba. 5Kura rago adú tipa aRevi nga agu yo namanga sunge yekaru yo, ni gayo ringara tipa abaakporo ka raka rogo, bagizaha ki du wa bagiza mbiribe 25,000, patihe ki du wa bagiza mbiribe 10,000.

6“Ku pati gu rago i ka akpara ha ni ziazia ngbi oni anifu rago tipa bakporo, patihe ki du wa bagiza mbiribe 5,000, bagizaha ki du wa bagiza mbiribe 25,000; si anidu ni ga ngbatunga aYisaraere dunduko.

7“Angbi ti pavuru gu ziazia ngbi re ku bani na ku bani adú ni ga bazogo, na gu haúrago du ni ga bakporo, pavuru ziazia ngbi na gu haúrago du ni ga bakporo, ku dioyo na ku uroyo, rengbe na bagiza gu ga ngbatunga aYisaraere rago sa, si ki ndu tona ku dioyo sa gu ngbandarago du ku ringara ku uroyo. 8Si nikadu ni gako rago dagba aYisaraere. Ka gimi abazogo arúngosi nga gimi aboro berewe ya; i ki mbu ringara fu aYisaraere rengbe na angbatungayo.

9“Ya Gbia MBORI wẽ: Si rengbe, Ako abazogo aYisaraere! Oni moi pa zuu ku sa yo na pa gbarasahe, ki sari ngbanga nzunzu na rurupai; oni mbú pa do gimi aboro pati gayo ukumbo, wo poi Gbia MBORI.

10“Oni ka adu na ruru úringbisaahe beroni, nga ruru efa, na ruru batu. 11Paefa arengba na pa batu, batu bawe ki du nga omera sa, efa bawe ki du nga omera sa; omera nikadu ni ndikidi kpia uringbisaahe. 12Sekere sa anidu nga agera 20; asekere 20, gbiakuti asekere 25, gbiakuti 15 anidu nga kina gaoni mina sa.

Pa amotumo na apumbo

13“Gere nga gu tumbatumba gamahe oni ka afu he: aritere nganu sita rogo gu nganu du mbembedi na aritere 370, na aritere he wa mapunga sita rogo gu zende he du mbembedi na aritere 370, 14na ga nzeme ki ngia aritere biata na beberehe rogo gu nzeme du mbembedi na aritere 370; (koru sa si rengbe na omera sa; ki rengbe na batu bawe); 15na kandoro sa dagba rimbasa anya nga akama ue, be aboro wene banambu nga ga aYisaraere yo. Gere nga amotumo riahe, na zozo amotumo, na amotumo zereda, ka manga pa dada ingapai tipa yo, wo poi Gbia MBORI. 16Aboro ringara dunduko anifu gi tumbatumba agamahe re fu bazogo aYisaraere. 17Si anidu ni ga bazogo pai ka fu uzozo amotumo, amotumo riahe, na mbirimbiri amotumo ti arago pumbo, ti arago fogo diwi, na ti arago sabiti, na ti arago gu ringbisiringbisi apumbo dunduko nga ga ngbatunga aYisaraere: ko nikanimbakadi amotumo ingapai, amotumo riahe, zozo amotumo, na amotumo zereda, ka manga pa dada ingapai tipa ngbatunga aYisaraere.

18“Ya Gbia MBORI wẽ: Ti bambata diwi, ti rameru sa, mo anidi paranga babagara zanga serõ, ki girisi kparakpara ba na u. 19Boromotumo anidi bete kureru nga motumo ingapai ki moi he ti ngua pangbadimo nga ga yekaru, na ti gu tukpuhe biama du ti pavuru bamotumo, na ti agu angua ngbadimo du ku vurukporo ku dimo yo. 20Mo animangi kina gu pai re ti saba rame nga ga gu diwi re tipa gu boro mangi ingapai ira aira watadu zanga ina ha; si du mo animangi pa dada ingapai tipa yekaru.

21“Ti bambata diwi, ti rameru 14, oni animangi rago pumbo nga susiri, oni ki niri gu kpakuta adu nga agbooro rogo ho yo ya tipa arame saba. 22Ti gu uru re bazogo animbakadi paranga babagara tipa tiko na tipa aboro ringara dunduko, tipa motumo ingapai. 23Na rogo agu auru saba nga ga gu pumbo re ko animbakadi paranga abaabagara saba na abaakandoro a saba zanga serõ, ni zozo motumo fu Yekova ti agu auru du saba re ni ba sa sa; na bameme sa na uru tipa motumo ingapai. 24Ko ki nimbakadi motumo riahe du mbembedi na aritere 37 tipa abaabagara ni ba sa sa, na gu a wo tipa abaakandoro ni ba sa sa, na nzeme wa aritere sita tipa gu aritere du 37. 25Ti saba diwi, ti rameru 15, ko animangi kina gu ungba re tipa rame saba nga ga pumbo, tipa amotumo ingapai, tipa zozo amotumo, na tipa amotumo riahe, na tipa nzeme a.

Currently Selected:

Yezekere 45: ZB1978

Highlight

Copy