Gate 9

Pa gberãngbi fu anya

1Yekova ki ya fu Mose, “Mo ndú koyo du Faro ni, ki ya fu ko, ‘Ya Yekova nga ga aEbere Mbori wẽ, “Mo ídi fu gimi aboro i ndú ka manga pare. 2Ka mo ká pa nduge fu yo, ki ka kuti yo kindi, 3mo ngére, be Yekova adú ri gamo zogozogo anya du banambu yo, na ku ri afarasi, na adongi, na akameri, na rimbasa anya nga abagara, na akandoro, gbegberẽ kaza anya azía ra. 4Ono Yekova akpáraka dagba gu zogozogo anya nga ga aYisaraere ra na gu zogozogo anya nga ga aEzipeto ra, ka nya akpi nga sa dagba ga awiri aYisaraere ra ya.” ’ ” 5Yekova ki ringbisi ragoho, ki ya, “Gba, Yekova ka manga gi pai re rogo ringara no.” 6Gba Yekova ki mangi gi pai re; ga aEzipeto zogozogo anya ki kpiki dunduko, ono a nga ga awiri aYisaraere zogozogo anya akpi nga sa te. 7Faro akedi sunge, oni ngére, a nga ga aYisaraere zogozogo ru ho sa akpi te. Ono kpoto Faro yo anyaki anyaka, ka ko aida nga aboro ndu ya.

Pa gberãngbi be anzia

8Yekova ki ya fu aMose na Arona, “Oni ndúku kuku gbigiwi ni beroni, Mose ki mi he ku ngbangbaturũ yo ku bangiri Faro. 9Si asá tihe ni turubu misimisi ku ri ringara Ezipeta dunduko, si akúsa anzia na amuku ti kpoto aboro na ti anya, rogo ringara Ezipeta dunduko.” 10I ki nduku kuku gbigiwi, ki ru ku bara bangiri Faro, Mose ki mi he ku ngbangbaturũ yo, si ki sa tihe ni anzia na amuku ti kpoto aboro na ti anya. 11Ka abinza arengba nga na ru bara bangiri Mose bambiko anzia ya, bambiko anzia adu ti abinza, na ti aEzipeto dunduko. 12Ono Yekova ki nyakasi kpoto Faro yo anyakasa kindi, ka ko adega nga tuko sa sangbayo ya; a wa Yekova agumba ha fu Mose.

Pa gberãngbi be morogumba

13Yekova ki ya fu Mose, “Mo gúari ngbatutu wiso, ki ru bara bangiri Faro, ki ya fu ko, ‘Ya Yekova nga ga aEbere Mbori wẽ, “Mo ídi fu gimi aboro i ndu ka manga pare. 14Bambiko ti gi rago re mi akéda gi gberãngbi dunduko ku kpotoro yo, na ku ri gamo amoyambu, na ku ri gamo aboro, ya mo ini he nga a nga kura boro ho wa mi rogo zegino dunduko te. 15Bambiko wa mi arengbe ka taã bere ki mangi ro na gamo aboro na tata kaza, ka i adi ro ku sa yo ri kpotosende; 16ono tipa kina gi pai re mi aidi he ti ni mo nye ni ungaro, nga ka yugo pa gi tandu, i ki taki pande pa rimore rogo kpotosende yo dunduko. 17Mo natumba tiro kindi kuti gimi aboro ki ka pa nduge fu yo. 18Mo ngére, gba ti kina gi rago re, mi akéda mai si aná na kina kere morogumba, nga gu adu nga mbata Ezipeta yo fuo enga ha daku awere ya. 19Were mo kédi pai awere, i rimisi gamo anya na agu ahe dunduko du be ro ringara yo ku rogo bagbuko yo; bambiko morogumba azórã ku ri agu aboro ka du ati yo na ku ri zogozogo anya dunduko ata yega nga ku kporo no ya, i ki kpiki akpika.” ’ ” 20Gu ni nanigunde ti sangba Yekova dagba ga Faro amoyambu yo, ni ki nisosodi gani akanga i óro ku dimo yo na gani zogozogo anya; 21ono gu ni nagunde nga ti sangba Yekova ya, ni ambu gani akanga kina ringara yo na gani zogozogo anya.

22Yekova ki ya fu Mose, “Mo táĩ bero ku ngbangbaturũ yo, ya morogumba na ku ri Ezipeta dunduko, ku ri aboro, na ku ri anya, na ku ri rũkurũku ahe ati yo, ku rogo ringara Ezipeta yo dunduko.” 23Mose ki taĩ gako ngbondo ku ngbangbaturũ yo; Yekova ki kedi gumba na morogumba, we ki yara ku sende no. Yekova ki kedi morogumba si na ku ri ringara Ezipeta. 24Were morogumba adu na ikpira gumba ni vunduvundu he, ni kere he gbe, nga gu naadu nga mbata rogo ringara Ezipeta dunduko ho rikaaboro aenge ni yo ya. 25Morogumba ki gbarasi ringara Ezipeta na agu ahe nadu ati yo dunduko, aboro na anya a; morogumba ki gbarasi rũkurũku ahe ati yo dunduko, ki kuadi angua ati yo dunduko. 26Kina rogo ringara Gosene, yo awiri aYisaraere adu ni, morogumba adu nga ni ya.

27Faro ki kedi sunge, ki yambu aMose na Arona, ki ya fu yo, “Awere mi ingi pai ti gi rago re; Yekova du na rurupai, ono ani na gimi aboro ru nga gaani apai te. 28Mo zúngadi Yekova; bambiko gi kere gumba re na morogumba susi ni rengo; mi ki idi he fu roni oni ndú, oni anyé nga kono kindi te.” 29Mose ki ya fu ko, “Awere wa mi nikakura ku zegi yo bakporo no, mi atáã bere koyo du Yekova ni; gumba ago ago, ka morogumba adú nga berewe a ya, mo ini he ya kpotosende nga ga Yekova. 30Ono tipa ro na gamo amoyambu, mi ini he ya, oni agúnde nga ti Yekova nga Mbori awere te.” 31Nzibi na he wa mapunga dunduko ki du ni gbarasigbarasi he, bambiko regbo zara he wa mapunga nadu, mbumbuda nzibi aima kura a. 32Ono nganu na kpepasio agberã nga te, mbiko si adu ni kusa ha. 33Si du Mose ki guari pati Faro bakporo yo, ki taĩ abeko ku ari fu Yekova; sumba gumba ki go na morogumba, ka mai ana nga ku ri kpotosende a ya. 34Ho Faro abi he ni ya mai na morogumba si go na sumba gumba a, ko ki ingi pai berewe, ki nyakasi kpotoko yo, ko na gako amoyambu. 35Si du kpoto Faro yo anyaki anyaka gbe, ka ko aida nga fu awiri aYisaraere i ndu ya; a wa Yekova agumba ha ku ngba Mose.

Currently Selected:

Gate 9: ZB1978

Highlight

Copy