Gate 13

1Yekova ki ya fu Mose, 2“Mo kpára bambata avungu fere dunduko nga gu naza rukumbu dagba awiri aYisaraere, dagba aboro na dagba anya a, si nga gimi.”

Pa kpokuta adu nga na agbooro ti ni ya

3Mose ki ya fu aboro. “Oni tíngidi pa gi uru re nga gu oni akuru ti ni Ezipeta yo, rogo kporo akanga, bambiko Yekova kusi roni rogo gi rago re mbiko nyanyaki beko; ka oni rí nga gu kpokuta du na agbooro ti ni ya. 4Ti gi uru re rogo gi diwi re nga Abiba oni nikakura. 5Ho Yekova ka ye ni na oni ku ringara aKanano yo na ga aEto, ga aAmoro, ga aIvo, na ga aYebuso, nga gu ko azunga he tipa ha fu abaroni ka fu he fu roni, oni amánga gi pai re rogo gi diwi re. Si nga gu ringara du adu na mamuanya na nzeme anyege kpaima. 6Tipa rame saba, oni arí gu kpokuta adu nga na agbooro ti ni ya; ti saba rame oni ki nimangi pumbo fu Yekova. 7Oni arí gu kpokuta adu nga na agbooro ti ni ya kina rogo agu arame saba re; ka i abí nga gu kpokuta be aboro du na agbooro ti ni ya, ka i abí nga agbooro be roni rogo gaoni ringara dunduko a ya. 8Oni agúmba pai fu awironi ti gu uru re, ki ya, ‘Si mbiko gu pai Yekova amangi fu rani, ho ani akuru ni Ezipeta yo.’ 9Si ki du ni yuguyugupai fu roni auru beroni, ni tingidapai ti ngbandia kpakpuroni a, ga Yekova ruguie ki du ngbaroni yo; bambiko Yekova akusi roni Ezipeta yo ni nyanyaki beko. 10Si du oni ka amanga gi rugapai ti ni re ti ragoho, na garã na agarã.

Pa bambata avungu

11“Ho Yekova ka ye ni na oni ku ringara aKanano yo, a wa ko azunga he fu roni na fu abaroni, ki fu he fu roni, 12oni akpára agu yo dunduko fu Yekova nikaza rukumbu. Gu bambata avungu nga ga eaoni anya dunduko nga abara nikanidu ni ga Yekova ra. 13Oni atúmo bambata win adongi ni kina wiri kandoro, ono ka oni akpi nga nyemu ka tumo ru ya, oni ki kiti goru. Bambata wiri aboro dagba awironi, oni ka tumo yo. 14Si adú wa gere ho awironi ka sana roni ni ti gu rago nikadu ku mbata yo, ki ya, ‘Gine nga gere?’ Oni ayá fu yo, ‘Mbiko Yekova akusi rani Ezipeta yo ni nyanyaki beko rogo kporo akanga yo. 15Ho Faro aka pa gate rani ni, Yekova aimi bambata avungu dunduko rogo ringara Ezipeta, bambata wiri aboro, na bambata wiri anya a. Si du tumo ani ni agu ra nga abara ti ni fu Yekova nazaka rukumbu, ono ani natumo gu bambata avungu nga awirani.’ 16Si adú ni yuguyugupai auru beroni, na he ka vo ho ti ngbandia kpakpuroni, bambiko Yekova akusi rani Ezipeta yo ni nyanyaki beko.”

Pa bakamikami Dubo na bakamikami We

17Were ho Faro aidi he ni fu aboro i ndu, Mbori angbe nga fu yo ku mbata yo ngba gene gu ringara nga ga aFereseto te, si avura mbeda vurũ; bambiko Mbori aya, “Si ngia aboro asá gayo aberã ho i ka bi vura ni, ki karaga tiyo ku Ezipeta yo.” 18Ono Mbori angbe fu aboro ku mbata yo ku ngba gene ngbakungba yo kirikiri pati Zamba Baime. Awiri aYisaraere akuru na ũvura beyo ringara Ezipeta yo. 19Mose ki di ameme Yosefa fuo ko; bambiko Yosefa arugu awiri aYisaraere ni zunga he, niya, “Mbori aye koyo du oni ni ni rengo; oni ki di amemere no ki tindi he fuo roni.” 20I ki guari Sukuta yo, ki zi bataya Etama yo, pati ngbakungba yo. 21Yekova ki ningbe ku mbata yo fu yo uru rogo bakamikami dubo ka yugo gene fu yo, na yuru rogo bakamikami we, ka hasa rago fu yo, ya i nindu uru na yuru. 22Gu bakamikami dubo nanidu uru, na gu bakamikami we nanidu yuru, si aguari nga bara bangiri aboro wa sa te.

Currently Selected:

Gate 13: ZB1978

Highlight

Copy