Gate 11

Pa fuga pa kpio bambata vungu

1Yekova ki ya fu Mose. “Kura gberãngbi koyo sa mi aka yé na ni ku ri Faro na ku ri Ezipeta; fuo gure ko ki idi fu roni oni guari no; ho ko ka ida ha ni fu roni oni ndú, ko akúsa roni kpakaya. 2Mo gúmba pai awere fu aboro, ki ya akumba na ade dunduko õ afongo be akurayo nga afongo feda na afongo dahabu.” 3Yekova ki mbakadi pa aboro i ngba bangiri aEzipeto. Ku ri gure gu kumba nangia Mose ki du ni bahe rogo gu ringara nga Ezipeta ku bangiri ga Faro amoyambu, na ku bangiri aboro a.

4Mose ki ya, “Ya Yekova wẽ: Mi akúra ku Ezipeta yo bebere yuru; 5bambata avungu nikakpika rogo ringara Ezipeta, tona ti bambata wiri Faro nasunga auru gako mbatabakindo, ki da ti bambata wiri gu kanga nga de nasunga gii mbia saahe yo; na bambata wiri zogozogo anya dunduko. 6Bakere kpe nikangbiko angbiko rogo ringara Ezipeta dunduko, kpe adu nga wo mbata te, si adú nga wo berewe fuo ho a te. 7Ono kuti gu wiri Yisaraere sa, ango agbokoda nga sa ni, sa akumba watadu sa anya te; ya oni ini he ya Yekova kpara dagba aEzipeto na aYisaraere. 8Gi gamo amoyambu re ki ye kono du mi ni, ki tumusa bara bangire, niya, ‘Oni gá, oni na gaoni aboro dunduko.’ Fuo gure mi ki ga.” Ko ki guari bara bangiri Faro na kina ngariangaria zinga. 9Yekova ki ya fu Mose, “Faro adéga nga tuko sa sangbaro te; si du gimi iiriwo yuguyuguapai angé ti ni rogo ringara Ezipeta.”

10AMose na Arona ki mangi gi iiriwo yuguyuguapai re dunduko ku bara bangiri Faro; Yekova ki ninyakasi kpoto Faro yo kindi, ka ko aida nga ha fu awiri aYisaraere i guari rogo gako ringara ya.

Currently Selected:

Gate 11: ZB1978

Highlight

Copy