Gate 1
1
Pa rungosi aYisaraere Ezipeta yo
1Were gere nga rimo agu awiri aYisaraere nada ku Ezipeta yo, aboro ni ba sa sa na gayo aborokporo nada na Yakoba: 2Rubena, Simona, Revi, Yuda, 3Yisasakara, Zeburuna, Benyamina, 4Dana, Nafatari, Gada na Asera, i dunduko nangia awiri Yakoba. 5Agu aboro dunduko naenge ti Yakoba, i adu 70; Yosefa aima du Ezipeta yo mbata. 6A Yosefa ki kpiki na awiribako dunduko na gu rika ngbatungayo nadu ti gu rago re dunduko. 7Ono awiri aYisaraere ki zuga azuga ki ninge ange ni dungu aboro; ki nimoi pai, ki nidu na ome ki susi asusa gbe, i ki du adu na ringara tokpotokpo.
8Were vovo bakindo ki du ku ri Ezipeta naina nga Yosefa ya. 9Ko ki ya fu gako aboro, “Oni ngére, agu aboro nga awiri aYisaraere i nge ti rani, omeyo susi gaani a. 10Oni yé, ani mángi pai ni tatamana kuti yo, i ka nge ange, si du were ho ka vura mo ka aye ni sa rani, i agbía tiyo na avurarani a, ki so vura na ani, i ki guari rogo gaani ringara.” 11Si du i aringbisi abanyakasi pa sunge ti ni i nirungosi yo arungosi na sunge mbugo; i ki dudua abaakporo igaahe fu Faro, nangia aPitoma na Ramesese. 12Ono wa i arungosi yo na kere sunge, i ki ninge ange ki susi, ki nigbandaka agbandaka yasika. Ngbadu aEzipeto ki niimi aima fu awiri aYisaraere. 13Si du aEzipeto ki fu sukasuka sunge fu awiri aYisaraere du ni gbaniangba ha, i nimangi he. 14I ki rungosi yo ni kere he na asunge mbugo, na asunge pere, na asunge biriki, na ngbatunga asunge ati yo dunduko. Gayo asunge dunduko nga gu i afu he fu yo i nimangi he si adu ni gbaniangba ha.
15Bakindo aEzipeto ki gumba pai fu ga aEbere anasamba, rimo gu ri nangia Sifera, rimo gu kura ri ki ngia Pua, 16ko ki ya, “Ho oni ka nindu ni ni anasamba fu dere aEbere, ki bi yo i sungu ka batika, ka ngia kumbagude ka du, oni ki imi ko; ono ka ngia degude ka du, oni ki mbu ri ni ungari.” 17Ono agi anasamba re i anagunde ti Mbori, ka i amanga nga wa bakindo aEzipeto arugu yo na ni ya, ono i abatasa akumbagude, i nye ni ungayo. 18Bakindo aEzipeto ki kedi sunge fuo anasamba ki ya fu yo, “Tipagine oni amanga gi pai ti ni re, nga he gu rukutu akumbagude i nye ni ungayo kindi?” 19Anasamba ki ya fu Faro, “Bambiko dere aEbere wa dere aEzipeto te; bambiko i nyanyaki, i nabatika ni ipo mbata nasamba nikada koyo du yo ni.” 20Mbori ki ningba na anasamba; aboro ki nge ange, ki nidu na ome ki susi a gbe. 21Si ki ta du wa gere, wa anasamba agunde ti Mbori, ko ki fu avungu fu yo tigayo a. 22Si du Faro arugu gako aboro dunduko, ki ya. “Agu akumbagude dunduko i ka vunga yo fu aEbere, oni báfu yo ku Nire yo, ono adegude oni mbú yo ambu ni ungayo.”
Currently Selected:
Gate 1: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
