Daniere 8

Pa bi Daniere yuguyuguhe nga Bakandoro na Bameme

1Ti gu biata garã zogarago nangia ga Bakindo Berasasara, mi nga Daniere abi yuguyugupai, fuo gu naaye fere mbata. 2Mi ki bi he rogo yuguyuguhe yo: ho mi abi he ni, mi adu Susa yo nga ga bakindo gbata, nadu rogo ringara Erama; mi ki bi he rogo yuguyuguhe yo, mi ki du pati gu di nga Urai. 3Mi atuka bangire ki ngere, ki bi bakandoro naru ti ngba gango di. U adu na agbangaru ue, agu agbangaru ue re adu ni baagbangagbanga ha ono gu ki du ni bagbanga ha ki susi kura ha, gu bagbanga ha ki kuru fuo kura ha. 4Mi abi gu bakandoro re u nioro ku pa dioyo na ku nodiyo na ku sudiyo. A nga nya sa naarengbe na ru barangba ru te, ka boro adu nga ho ka batasa he be omeru a ya. U ki nimangi wa si angba ti ru ki nikiisi pa tiru.

5Wa mi aberã pa gi pai re, oni ngére, bameme aye dioyo ri kpotosende dunduko, niya aya zanga si sende. Gi bameme re adu na iiriwo gbangaru kina ngbandia õru. 6U aye sa gu bakandoro nadu na agbangaru ue, nga gu ru mi abi ru ti ngba gango ime, u ki oro sa ru na gu ngariangaria zinga nga ga gau tandu. 7Mi abi ru u nimbedi na bakandoro, u ki gbiriwo sa bakandoro ki fo ru ki kuadi agbangaru ue; ka bakandoro adu nga na ome ka ru barangba ru ya, ono u aba ru ku sande ki nisimbi ru. Boro adu nga ho naarengbe na ka batasa bakandoro be ru te. 8Si du bameme ki kiisi pa tiru ni bakere he; ono ho u adu ni nyanyaki, gu bakikindigi gbangaru re ki kuadi, kura iiriwo agbanga akuru biama ku ba ha rogo agu ayuge nidu biama nga ga ngbangbaturũ.

9Toni gbanga akuru ti gu sa, si ki kiisi pa tihe ni bakere he bara ku sudiyo, bara ku uroyo, na bara koyo du gu wene ringara ni. 10Si akiisi pa tihe da kina ku rogo rimbasa aungbangbaturũ yo; si ki bafu bete rimbasa akerekuru ku sande, ki nisimbi ra. 11Si ki kiisi pa tihe, ki ringbisi tihe na Bazogo arimbasa. Si adi gu zozo motumo be ko ku sa yo i naatumo na ni na uru, ki bafu gako kparakpara ba. 12I ki fu rimbasa fu he wa sa na gu zozo motumo i naatumo na ni na uru tipa samungu. Gbanga ki ba rengo ku sande, ki nimangi pai ki niu au. 13Mi ki gi pa gu ziazia ko ko nifura; gu kura ziazia ko ki ya fu gu ko naafura, “Rago adú waĩ tipa gu yuguyugupai nidu tipa gu zozo motumo i naatumo na ni na uru, na tipa gu samungu nagbarasa he, na tipa pa fu kparakpara ba na rimbasa si simbi he ku tii ndue yo?” 14Ko ki ya fu ko, “Tipa anyemu 2,300 na awiso a; fuo gure i agírisa kparakpara ba si ki du wa mbata.”

15Ho mi nga Daniere abi gu yuguyuguhe ni re, mi aberẽ pa ruga tire na pa ha; oni ngére, gu he aru bara bangire ngbanyaha adu wa ga boro. 16Mi ki gi fugo boro bangbanda gango Urai, si ki yambu he, “Gabariere, mo yúgu pa gu yuguyuguhe re fu gi kumba re.” 17Si du ko aye ki mbedi ku ho mi aru ni; ho ko aye ni, mi adu na gunde ki ti ku sande ni kpakpure. Ono ko aya fere, “Ako wiri boro, mo rúgu tiro na pa gu yuguyuguhe re ya si tipa digidarago.”

18Wa ko agumba pai fere, mi ati na bakere rame ni kpakpure ku sande; ono ko azadi re ki rugu re ku ngba ndure. 19Ko ki ya, “Mo ngére, mi ayúgo gu pai foro nikadu giza ti digidarago nga ga imisiri ngbaduse; bambiko si tipa gu ringbisiringbisiragongadigidaha. 20Tipagubakandoro nga gu ru mo abi ru na agbangaru ue, agere nga abakindo aMadio na aParaso. 21Gu bameme nga bakindo aGiriki; na gu bakikindigi gbanga naadu ngbandia õru nga bambata bakindo. 22Tipa gu gbanga naakuadi nga gu kura ha biama akuru ku baha, si nga angbi biama nikakura ti gako ngbi, ono na gako tandu te. 23Ti digida gayo zogarago, ho aguauru ndika ka da ni ti ndikidi gayo digidapai, bakindo akúra na kere ngera, nga gu ko rugu tiko na pa amasaku. 24Gako tandu adú ni bakere he, ko ki mangi baiiriwo gbarasahe, ki u au rogo agu apai ko amanga, ki gbarasi airaome na agu aboro nga ga ziazia yo yo. 25Ko amánga pa nangahe si u ku tii be ko be gako birĩ, ko akiisa pa tiko rogo gako berã. Ko agbarasa dungu aboro zanga fuga ha fu yo mbata. Ko ki guari a sa Bazogo nga ga abazogo ko; ono ko tigako akúadi, ono be be boro wa sa te. 26Gu yuguyuguhe nga ga anyemu na ga awiso nga gu i agumba pa ha si ni kinaku rengo; ono mo díka he ti yuguyuguhe bambiko si tipa dungu rame ku mbata yo.”

27Pai adi be re nga Daniere, mi tigimi ki pi sande tipa bete rame. Fuo ho mi ki guari ki ndu sa ga bakindo sunge; ono mi akigi be gu yuguyuguhe re ka mi aruga nga tire na pa ha ya.

Currently Selected:

Daniere 8: ZB1978

Highlight

Copy