Amosa 8
8
Gu biama yuguyugupai: Baga du na zuzu ahe nga ga faarago
1Were Gbia MBORI ayugu pai fere: oni ngére, baga du na zuzu angua nga ga faarago rogo. 2Ko ki ya, “Amosa, gine mo abi he?” Mi ki ya, “Baga du na zuzu angua nga ga faarago rogo.” Yekova ki ya fere,
“Digida rago da ku ri gimi aboro aYisaraere;
mi ambú nga pai fu yo berewe te.
3Agu abia nga ga yekaru adú ni kpe wawa ti gu rago re,”
wo poi Gbia MBORI;
“kangba aboro adú ni dungu he;
i abáfa ha dú rogo arago dú ku sa yo, niya, ‘Oni ongo kii.’ ”
Digida ga aYisaraere pai nambeda
4Oni gi gere, agu roni nasimba ri airazingohe,
ki nyasi pa rungorungo aboro du ringara yo,
5niya, “Fogo diwi ati ni gini rago,
ya ani bagi zende ahe berewe?
Na rago sabiti,
ya ani kusi nganu i ngbe he,
ani ki sa efa ni toni he ki sa sekere ni bakere he,
ki mangi pai ni biriki na iraira úringbisaahe,
6ani ki ngbe rungorungo aboro na feda
na irazingohe na katara sa,
ki bagi umu nganu a?”
7Yekova zunga he tipa gu ruka nga ga Yakoba:
“Ni rengo bangire ago nga ti gu mangaapai nga gayo te.
8Ringara akio nga tipa gi pai te re?
na agu aboro naraka rogo ho i akpara nga ni nunga ni ba sa sa te?
si ahí nga dunduko wa di nga Nire te?
ki nipangura kirikiri ki niugudi berewe, wa Nire du Ezipeta yo te?
9“Ti gu rago re, mi amánga uru si ki ti kina bebere uru,”
wo poi Gbia MBORI,
“mi ki birisi kpotosende rogo baima uru.
10Mi asá gaoni apumbo wa rago kparakpe ni nunga,
na gaoni abia dunduko ni bia akpe;
mi ayé na mbuzaroko ku dimoroni dunduko,
na kpatakpa ku ri aboro dunduko ni ba sa sa;
mi asá pa gu rago re wa rago kpe nunga tipa kpio bangisa gude, digidaha adú ni kere rago.
11“Oni ngére, arago naye,”
wo poi Gbia MBORI,
“ho mi ka keda ngbongi ni ku rogo ringara; ngbongi riahe te,
ngbongi gomoro ime a te,
ono ngbongi pa gia agu apai nga ga Yekova.
12I andú tona ti gu baime sa gu baime,
tona nodiyo ku uroyo;
i aóra ku bani na ku bani, ka gbata gu pai nga ga Yekova,
ono i abi nga ha te.
13“Ti gu rago re wene ngasu ade na paranga akumba
he amáka yo be gomoro ime.
14Agu yo nazunga he ti rimo Asima du Somorona yo,
ki ya, ‘Ako Dana, wa du ga mbori ni ungaha,’
na, ‘Wa gu sino nga ga Bera-saba du ni ungaha,’
i ati wa, ka i agúari nga berewe ya.”
Currently Selected:
Amosa 8: ZB1978
Highlight
Share
Copy
Want to have your highlights saved across all your devices? Sign up or sign in
La Sainte Bible en Zande © Alliance Biblique Universelle, 1978.
