Amokedi 18

Pauro Korinda yo

1Fuo agi apai re Pauro ki guari Atenai yo, ki ye ku Korinda yo. 2Ko ki bi Yudo sa rimoko angia Akuira, i avungu ko Pondo yo, i aye Itaria yo mbembedi awere na diako nangia Purisekira, bambiko Kuraudio aya fu aYudo dunduko i guari Roma yo, Pauro ki ye koyo du yo ni. 3Ko ki nye na yo bambiko ko anamanga kina gu sunge i amanga ha, i ki nimangi he; bambiko airamanga bamburoko nangia yo. 4Ko ki saki pai bambutiria yo na rago sabiti, ki nizungadi aYudo na aGiriki.

5Ono ho aSira aye ni na Timoteo Makedonia yo, pai ki zuba Pauro ko gumba ha fu aYudo ya Yesu nga Kristo. 6Ono ho i ati kangu tiyo ni ki nigberẽ ngbayo yo, ko ki zanzia gako remu ki ya fu yo, “Kureroni du ti kina rironi! Ono mi gigiri. Awere mi andú koyo du aGendiria ni.” 7Ko ki guari yo, ki rimi ku rogo ga kumba bambu rimoko angia Tito Yuseto, nanairisa Mbori, gako bambu adu pati bambutiria mbembedi. 8Kurisipo nangia baira bambutiria ko aidi pa Gbia na gako aboro kporo dunduko; aKorindo ki gi pai ki idi pa ha ni dungu yo, i ki bapatizi yo. 9Gbia ki ya fu Pauro rogo yuguyugupai yo yuru, “Ka mo gúnde nga ya, mo nipoi apaa, ka mo ongo nga ya; 10bambiko mi du na mo, boro ayé nga sa ro ka manga ro wa sa te; bambiko dungu aboro rogo gi bakporo re nga gimi yo.” 11Ko ki sungu yo tipa garã sa na diwi sita, niyugu ga Mbori pai dagba yo yo.

12Ono ho Gario adu ni ni bazogo Akaya, aYudo ki mongo guari kuti Pauro ki ye na ko ku barangba gu mbata i asunga auru he ka sapa ngbanga, 13niya, “Gi kumba re nazungudi aboro i irisi Mbori akia ti rugute.” 14Ono ho Pauro aye ni ka tuka ngbako, Gario ki ya fu aYudo, “Ako aYudo si ngia ingapai du na gbigbitapai ka mi gi he agia, 15ono ka si ngia sakapai tipa apai na rimo aboro na gaoni rugute, oni mángi he ni sa roni, mi akpi nga nyemu sapa apai wa gi te re.” 16Ko ki dandi yo adanda pati gu mbata i asunga auru he ka sapa ngbanga. 17I ki zi Sosetene dunduko, nangia baira bambutiria, ki ta ko barangba mbata sapangbanga. Gario aberã nga pa agi apai re wa sa te.

Pauro akaraga tiko ku Andiokia yo

18Pauro anye yo ti dungu rame fuo gi pai re, ko ki asia awirina, ki ndu kurungba yo ku Suria yo, na Purisekira na Akuira. Ko aima kpe mangeriko Kenikurea yo: bambiko ko azunga he. 19I ki ye ku Efesa yo, ko ki he yo yo. Ono ko ki rimi tigako ku bambutiria yo, ki saki pai na aYudo. 20Ho i akpari fu ko ni, ko ima na yo mbata, ka ko aida nga ha ya. 21Ono ko aasia yo, niya, “Ka Mbori idi he, mi ki karaga tire berewe fuo roni,” ko ki guari Efesa yo ki ndu kurungba yo.

22Ho ko akuru kurungba yo ni Kaisaria yo, ko ki ndu ki poi kuti kanisa, ki ndu ku Andiokia yo.

23Ho ko anye yo ni ngbutuko, ko ki guari ki tangara aringara Garatia na Purugia, ki ninyakasi abawiriki dunduko.

Aporo atungusi pai Efesa yo

24Were Yudo aye ku Efesa yo, rimoko angia Aporo, i avungu ko Aresanduria yo, iruinahe nangia ko ko aini pa Ziazia Kekeapai nyanyaki. 25Ayugu pa ga tibia gene fu gi kumba re mbata ko adu ni irarubangirise si du ko agumba agu apai ti ni re tipa. Yesu ki niyugu he nzunzu, ko kina pa ga Yoane bapatiza. 26Ko ki tona gumba pai bumbutiria yo zukazuka. Ho aPurisekira na Akuira agi pako ni, i ki di ko fuo yo, ki yugu pa ga Mbori gene fu ko wenengaĩ n gu ko ami mbata. 27Ho ko aberẽ pa si ni ku Akaya yo, awirina ki nyakasi ko, ki ke pai fu abawiriki i di ko ku gume. Ho ko aye ni, ko ki unda agu yo gbe naidi pai mbiko undahe, 28bambiko ko ariiungosi aYudo ni tandu, ku bangiri aboro a, niyugu pai ti Ziazia Kekeapai ya Yesu nga Kristo.

Currently Selected:

Amokedi 18: ZB1978

Highlight

Copy