Amokedi 1

Gu kidohe tipa fu Ziazia Toro

1Ako Teofiro, bambata geda pai mi ake tipa agu apai dunduko Yesu atona manga niyugu pa ha, 2dati kina rago dia ko ku ari yo, fuo ruga ko agu amokedi sangba Ziazia Toro yo, ko asia yo. 3Ko ayugu tiko fu yo a ni ungako fuo gako hipai nimangi dungu apai i ini ko ti ni, ki yugu tiko ayugo fu yo rame ki du 40 ki nigumba pa ga Mbori ngbi. 4Ko ki nirugu yo ni gu rago i atiria na ko ya ka i guari nga Yerusarema yo ya, i sungudi gu ũmokido nga ga Mbori nga Ba, nga gu ko aya fu yo, “oni agi paha ngbare, 5bambiko Yoane anabapatizi aboro ni ime ni rengo; ono oni araka ngbutuko i ki bapatizi roni ni Ziazia Toro.”

Yesu aga ku ngbangbaturũ yo

6Si du i asana ko ti ni ho i atiria ni, ki ya, “Gbia, mo agása ga aYisaraere ngbi fu yo wa du rago re?” 7Ko ki ya fu yo, “Sa gaoni naina rago ahe na gu regbo ahe Mbori nga Ba amoi sa kina gako tandu? 8Oni adia tandu ho Ziazia Toro ka ye ni ku ri roni. Oni adu ni adezirere, Yerusarema yo na Yuda yo a Somorona yo, na digida sende yo.” 9Ho ko agumba agi apai ni re, wa i angera ko ki ga ku ari yo, mai ki di ko ti bangiriyo. 10Wa i angera ku ngbangbaturũ yo kindi wa ko andu, akumba ki ru pati yo ue na pusi remu ti kpotoyo. 11I ki ya; “Ako aboro Gariraya tipagine ru oni ti ni ka angera ku ngbangbaturũ yo? Gi Yesu re di yo ko adia be roni ku ngbangbaturũ yo ko ayé aye a wa oni abi ko ko nindu ku ngbangbaturũ yo re.”

Sia mokedi ku ba Yuda

12I ki karaga tiyo ku Yerusarema yo ri bagangara Aeraya, nambedi ambeda ku Yerusarema yo, ni ba nunguro rago sabiti.

13Ho i arimi ni i ki ndu ku rogo gu vuru bambu nadu ku ari, yo i araka ni; aPetero nadu na Yoane na Yakoba na Andarea, Firipo na Toma, Barutoromayo na Matayo, Yakoba nangia wiri Arafayo, a Simona Zerote, na Yuda nangia wiri Yakoba. 14Agi aboro re i animongo nikpari kina ku bani sa kindi, na agu ade, na Maria nga na Yesu na awirinako.

15Petero aru ku ari ni gu rago re dagba abawiriki rimbasa yo adu ho wa 120. Ko ki ya, 16“Awirinami, da Ziazia Kekeapai ti rengo nangba, gu pai Ziazia Toro agumba mbata ku ngba Dawidi tipa Yuda, gu ko nangbe mbata yo fu agu aboro nazi Yesu. 17Bambiko iagedi ko ku dagba rani, ko ki di gako sunge dagba gi mangapase re.” 18(Were gi kumba re nangia Yuda angbe ati ni mosoro gako ingapai; ko ki ya ti sande, vuko ki sari, reko ki gbadi agbada dunduko. 19Agu aboro naaima ku Yerusarema yo dunduko i ki ini he aina wa i aza ka yamba rimoho payo yo nga Akeradama, si wa ka i ya, Ati kure.) 20“Bambiko si ni keke ho rogo kitabu Tambuahe yo ya,―

‘Kpuko dú ni bate,

ka boro ima nga ku rogo wa sa ya’;

ki ya,―

‘Kura boro dí gako sunge.’

21Were, dagba agu akumba nanasunga na ani ni gu rago gu Gbia ata dagba rani nga Yesu, 22ho ga Yoane bapatiza aenge ni, dati kina gu rago i adi ko ku ari yo be rani, dagba agi yo re gu ni nikadu dagba yo sa na ani ni dezire zinga ko be kpio.” 23I ki kpara agu yo ue, nga aYosefa i aniya ti ko Barusaba, kura rimoko ki ngia Yuseto, na Matia. 24I ki kpari ki ya, “Ako Gbia, mo nga gu ko ini kpoto aboro yo dunduko, mo yúgu gu ni ka mo kuti ni dagba agi yo du ue re, 25ni di ba dagba gi mangapase re na dagba amokedi, gu ba Yuda ati ti ni ka ndu ku bako yo.” 26I ki ba ake tipa yo, ake ki yugu Matia; i ki gedi ko ku dagba agu amokedi yo nanidu bawe na sa.

Currently Selected:

Amokedi 1: ZB1978

Highlight

Copy