1 AKorindo 3

Abadiasunge fu Mbori

1Mi a, awirina, ka mi agumba nga pai fu roni wa ka oni adu na Toro te, ono wa fu boro borose, wa fu fogo agude rogo Kristo yo. 2Mi arigi roni ni mai, ni pasio te; bambiko oni arengba nga na ni mbata te; oó, oni ata rengba nga na ni awere a te. 3Bambiko oni nga boro borose kindi; bambiko wa du kpihe dagba roni yo na kpata, oni nga boro borose wa oni nata fuo sino aboro, te? 4Bambiko ho gu ni aya ni, “Mi nga ga Pauro ko;” gu ni ki ya, “Mi nga ga Aporo ko;” aboro nga oni te?

5Gini he tie nga Aporo? Na gini he nga Pauro? Amoyambu oni aye ka ida pai mbiko yo; gu ni a wa Gbia afu he fu ni. 6Mi arú he, Aporo ki nitudi he; ono Mbori nazugasi he. 7Si du tie watadu gu ni narũ he na gu ni natuda ha, he nga ni te; kina Mbori nazugasi he. 8Were gu ni naru he na gu ni natuda ha, i sa. Ono gu ni ka dia gani mosoro tigani rengbe na gani nyanyaki sunge. 9Bambiko ani nga ga Mbori abadiasunge. Oni nga ga Mbori ati, ga Mbori duadua bambu.

10Wa du ga Mbori undahe i afu fere mi amoi mburuhe wa iratatamana bangbasia duabambu; gu kura boro ki dua he auru he. Ono gu boro banda tini wa ni nadua he auru he. 11Bambiko a nga kura mburuhe ho ka boro moi he fuo gu moi yo, nga Yesu Kristo te. 12Ono ka gu boro dua he auru mburuhe, dahabu, feda, agu ambia kii genoho, ngua, ugu nvuo, kakarika; 13i ayugo pa ga agu aboro sunge re. Bambiko gu uru ataka pande he, bambiko i ayugo ho rogo we yo; we tigaha ki asadi ga aboro sunge ni ba sa sa gini ngbatunga nga ha. 14Ka ga gu boro sunge ima ni adua ha auru he, ni adía mosoroho adia. 15Ka ga gu boro sunge gbi agbi, ni azánga; ono ni tigani nikabata; ono si adú wa rogo we yo.

16Oni aina nga ya ga Mbori yekaru nga oni, ga Mbori Toro ki ima rogo roni yo, te? 17Ka gu boro gbarasi ga Mbori yekaru, Mbori agbárasa ni; bambiko ga Mbori yekaru du ziazia, gu yekaru nga oni re.

18Ka boro nángi nga tini wa sa ya. Si ngia gu boro ho ya ni nga iratatamana dagba roni yo rogo gi zegino re, ni sá tini ni mumungo boro, ni ki ye ka du ni iratatamana. 19Bambiko gu tatamana nga ga gi zegino re si nga mumungo pai bangiri Mbori. Bambiko si ni keke he, ya, “Ko nazia airatatamana ni gayo bawagi,” 20berewe a, “Gbia ini ga airatatamana berã, ya si nga uturangba.” 21Wa du he were ka boro kíisi nga pa aboro ya. 22Bambiko ahe dunduko nga gaoni; watadu Pauro, na Aporo, na Kefa, na zegino, na unga, na kpio, na agu ahe du awere, na agu ahe nikaye; 23si nga gaoni dunduko; oni ki du ni ga Kristo yo; Kristo ki du ni ga Mbori ko.

Currently Selected:

1 AKorindo 3: ZB1978

Highlight

Copy