1 AKorindo 1

Sanango aboro Korinda

1Pauro, i ayambu ko ko du ni ga Yesu Kristo mokedi mbiko Mbori akpi nyemu he wo, na Sosetene wirinarani,

2Fu gu ga Mbori kanisa du Korinda yo, nga agu yo i asa yo ni ziazia yo rogo Kristo Yesu yo, i ayambu yo i du ni ga Mbori aboro, na agu yo dunduko nakpara ni rimo gaani Gbia Yesu Kristo rogo arago dũ, nga gayo Gbia na gaani:

3Undahe dú fu roni na zereda be Mbori Barani na Gbia Yesu Kristo.

Tambuahe tipa ga Mbori agamahe nga ga Toro

4Mi natambua gi Mbori dedede tipa roni, mbiko gu ga Mbori undahe i afu fu roni rogo Kristo Yesu yo; 5bambiko i akumukosi roni rogo ko yo ni apai dunduko, ni gumbapai na inahe dũ; 6a wa i anyakasi ga Kristo dezire rogo roni yo. 7Si du oni aye nga ti ni ku sa yo ti gamahe wa sa te; nisungudi gu yugoti nga ga gaani Gbia Yesu Kristo. 8Ko du nikanyakasa roni dati digida ha, ya oni du nzunzu rago gaani Gbia Yesu Kristo. 9Mbori nga irarengo, nga gu ko i ayambu roni mbiko ko ku rogo gu ringara agume nga ga Wiriko Yesu Kristo gaani Gbia.

Kparaka pai rogo kanisa

10Awere mi zúngadi roni, awirina, ni rimo gaani Gbia Yesu Kristo, ya oni mongo gúmba pai sa, ka oni kparaka nga dagba roni yo ya; ono oni mongo dú teketeke na berã sa na rugatinapai sa. 11Bambiko i ayugu he fere tipa roni, awirinami, be agu yo du ku Kuroe yo, ya akpata du dagba roni yo. 12Were gere gumba mi he ti ni ya, oni naya ni ba sa sa, “Mi nga ga Pauro boro,” “Mi nga ga Aporo ko,” “Mi nga ga Kefa ko,” “Mi nga ga Kristo ko.” 13Kristo kparaka? I awagi Pauro tipa roni? Na i abapatizi roni ku rogo rimo Pauro? 14Mi tambua Mbori ya mi abapatizi nga roni wa sa te, kina Kurisipo na Gayo; 15gu boro ka ya i abapatizi roni ku rogo rimore. 16Mi ki bapatizi agu yo nadu ku Setefana yo; fuo agi yo re mi aina nga ya mi abapatizi kura borote. 17Bambiko Kristo akeda nga re mi nibapatizi aboro te, ono mi nitungusi wene pangbanga; ni gu tatamana nga gumbapai te, si ka sa ga Kristo wagiwagi ngua si du ni ku he.

Kristo nga gu tandu na gu tatamana nga ga Mbori

18Bambiko pa wagiwagi ngua du fu agu yo nakpí akpi ni mumungo pai; ono fu agu rani i nabatasa rani si nga ga Mbori tandu. 19Bambiko si ni keke he,

“Mi agbárasa gu tatamana nga ga airatatamana,

mi ki ba gu rugatinapai ku sa yo nga ga airarugapai.”

20Wari du iratatamana ni? Wari du bakeapai ni? Wari du gu irasakapai ni nga ga gi zegino re? Mbori amungosi nga gu tatamana nga ga zegino te? 21Bambiko wa du he ni ga Mbori tatamana ya zegino aina nga Mbori mbiko gaha tatamana te, batasa agu yo idi pai angba ti Mbori rogo gu mungo nga ga tungusapai. 22Bambiko wa aYudo nasana he tipa agu apai i aina pai ti ni, aGiriki ki nigbata tatamana. 23Ono ani natungusa pa Kristo ni wagiwagi ko, si nga úkota fu aYudo, ki du ni mumungo pai fu aGendiria. 24Ono si nga Kristo, nga ga Mbori tandu na ga Mbori tatamana fu agu yo yambu yo yo, watadu aYudo na aGiriki. 25Bambiko ga Mbori mungo nga tatamana susi gu tatamana nga ga aboro; ga Mbori rungbura du nyanyaki susi gu ome nga ga aboro.

26Bambiko oni ngére pa yamba roni, awirina, wa i ayamba nga agu yo du na tatamana wa du pa borose ni dungu yo te, agu yo nga bahe ni dungu yo te, agu yo nga irisiirisi yo ni dungu yo te. 27Ono Mbori asia gu mumungo ahe nga ga zegino, ko ba zee ti agu yo du na tatamana. Mbori ki sia gu rurungbura ahe nga ga zegino, ko ba zee ti agu yo du nyanyaki. 28Na agu ahe adu nga ni pai zegino va, gbia kuti agu ahe i napayasi he, si Mbori asia ha, ii, na agu ahe adu nga ho ya, ko sa agu ahe du ho ni ku he. 29Si du ka borose sámbua nga tini barangba Mbori wa sa ya. 30Ono oni ho mbiko ko rogo Kristo Yesu yo, ko i asa ko ni tatamana fu rani rogo ko yo. Mbori asa rani ni ruru rani, ni aboro fu Mbori, ni agu yo i atumo yo. 31Wa du he rogo Ziazia Kekeapai, “Gu ni nasambua he, ni sámbua gu pai Gbia amangi he.”

Currently Selected:

1 AKorindo 1: ZB1978

Highlight

Copy