MALAKI 3
3
1Nɛ zélé we kɛ NWA ngɔ mɔ nyanga nza vɛ̃, a gisa hã nɛ gɛ: “Mi tombo sɛ wi toe 'da mi na, a 'dafa li wala hã mi. 'Do nɛ, nɛ mi NWA, kɛ nɛ 'bɔ 'da tɛa 'da mi ni, mi hɔ sɛ do gbanga nɛ, nɛ mi le sɛ kɔ Tɛmpɛloe 'da mi. Wi toe 'da mi NWA kɛ nɛ kɔ̃a na a tɛ ni, a li wala tɛ tɛ ma. A hɔ sɛ, nɛ a tɔ̃ sɛ we gba tɔkɛ kɛ mi gba ma do nɛ ni.”
2Kɔ fala kɛ a hɔ, nɛ wi nɛ kpasa sɛ, wi a wio nde? Fala kɛ a gbanga nɛ, nɛ wi nɛ yolo sɛ dati a a wio nde? A ɔ sɛ nɛ nyɛa we kɛ ma yeke mɔ bolo, tabi sa'buni kɛ wa fɔlɔ do tulu ni. 3A ɔ nɛ wi dɛ dula kɛ a fi mɔ bolo li we, nɛ ma yeke, nɛ 'dɔlɔ nɛ fo tɛ̃ ɛ kɔ nɛ ni. Na mɛ ni, a fo sɛ 'dã mɔ kɔ onganganɔ, obe zã Levi, sɛ nɛ wa hã sɛ dɔnggamɛnɔ kɛ ma wia ni hã NWA de. 4Nɛ NWA a kɔ̃ sɛ gɛnɛ dɔnggamɛnɔ 'da Oyuda do owi Yeruzalɛmɛ, ɔ nɛ kɛ a kɔ̃a zi gɛnɛ ma kɔ sabɛlɛnɔ zi dati ni.
5NWA ngɔ mɔ nyanga nza vɛ̃ tɔ̃a na: “Mi tɛ sɛ, nɛ mi dungu dɛ sanga nɛ we gɔnɔ ngbangga 'da nɛ. Nɛ winɔ mi gɔnɔ sɛ ngbangga 'da wa dati, wi a Owi dɛ sɔ̃nɔ, do owinɔ kɛ wa ɔ do wukonɔ 'da ngba wa, do wanɔ kɛ wa ba kombo tɛ wa do bɛlɛ, do wanɔ kɛ wa 'bili nu mbili 'da owi dɛa tonɔ 'da wa, do wanɔ kɛ wa zɛlɛ tɛ wi fio wilinɔ do obe gulanɔ, do wanɔ kɛ wa dɛ 'dã mɔ do ogɛnɛnɔ, do owinɔ kɛ wa dɛ́ kili mi gɔ ni. Mi NWA ngɔ mɔ nyanga nza vɛ̃, mi tɔ̃a ní.
We ngɔ hã kpo mbe 'bu kɔ mɛnɔ we dɔnggɔ do NWA
6“Mi NWA, mi yápá tɛ mi gɔ. Nɛ mi zɔa na, nɛ 'bana tɛ mɛ 'bɔ ongbongbo be zã Yakɔbɔ, 7we kɛ nɛ tɛ ɔkɔlɔ mi fai, ɔ nɛ kɛ 'da oyaa nɛ zi dati gɛ. Nɛ bɛ̃a gɛnɛ mɛnɔ mi bia hã nɛ ni, nɛ nɛ dɛ mbulanɔ 'da mi gɔ. Kɔ 'da fala nɛ kpolo tɛ nɛ dɛ 'da mi, nɛ mi kpolo sɛ tɛ mɛ 'bɔ tɛ mi dɛ 'da nɛ. Mi NWA ngɔ mɔ nyanga nza vɛ̃, mi tɔ̃a ní. Nɛ nɛ aka 'bɔ na: ‘Mɛ ngboo lɛ wia we dɛ ma na, lɛ kpolo tɛ lɛ dɛ 'da mɔ ni a ge nde?’ 8Kɔ mi gese hã nɛ do aka we na: Ɔkɔlɔ mi Gale mɛ a dia mɔ nde? Ĩ na, nɛ ɔkɔlɔ mi. Nɛ nɛ aka mi na: ‘Lɛ ɔkɔlɔ mɔ do ge nde?’ Nɛ ɔkɔlɔ mi we kɛ nɛ ha kpo mbe 'bui kɔ mɛnɔ 'da nɛ hã mi gɔ, nɛ nɛ ha 'bɔ dɔnggamɔ hã mi gɔ. 9Nɛ ĩ na, gà fɔmba tia ngɔ nɛ, we kɛ nɛ, obe Israɛlɛ vɛ̃, nɛ ɔkɔlɔ mi. 10Kɔ nɛ tɛ́ do kpo mbe 'bui kɔ mɛnɔ 'da nɛ vɛ̃, hã nɛ a ma kɔ Tɛmpɛloe 'da mi, dɔ nyɔngɔmɛ 'da onganganɔ zɔ́lɔ́ kɔ tɔa 'da mi gɔ. Nɛ yámbá sila mi, NWA ngɔ mɔ nyanga nza vɛ̃ ɔ nɛ kɛ mi tɔ̃a ni, hã nɛ zɔ, fala kɛ mi wèlè nu mi tɛ nɛ, nɛ mi hũi nu li nza, nɛ mi sulu ode mɔ hã nɛ gɔ sɛ. 11Mi fo sɛ odɔkɔ kɔ fɔnɔ 'da nɛ na, wa tɛ 'dàngà kpalɛnɔ 'da nɛ gɔ. Nɛ mi dɛ sɛ na, te vinɔnɔ 'da nɛ ma wala wena. 12Ogele winɔ vɛ̃, wa sa sɛ li nɛ na, nɛ a Owi yangga, we kɛ nyɔngɔmɔ sɛ kɔ le 'da nɛ wena. Mi NWA ngɔ mɔ nyanga nza vɛ̃, mi tɔ̃a ní.”
Gale 'bili we 'da a do bɔlɔ nɛ
13NWA tɔ̃a na: “Nɛ wele o'dã we do zu li mi gbaa, nɛ nɛ aka 'bɔ na: ‘Li 'dã we lɛ wila hã mɔ ni a ge nde?’ 14'Dã we kɛ nɛ wele ni ma kɛ. Nɛ na: ‘Gulu dɔnggɔ Gale na ge nde? Lɛ dɛa mbulanɔ 'da a, nɛ lɛ dɛa zi 'bako we 'dã mɛ 'da lɛ, takɔ a, NWA ngɔ mɔ nyanga nza vɛ̃, a be dia zã 'da a hã lɛ. Nɛ nde lɛ kpà mɔ olo nɛ gɔ. 15Nɛ lɛ zɔa na, wi dɛ yangganɔ wi a Owi dɛ gã zunɔ, nɛ wi kpa de mɛnɔ, wi a owi dɛ 'dã mɛnɔ. Gɛnɛ kɔ wa dɛ 'dã mɔ dɛ 'da Gale, nɛ nde mɔ kpo dɛ́ wa gɔ.’ ”
16Ma kɛ owinɔ kɛ wa zele we nu NWA ni, wa wila we dɛ sanga tɛ ngba wa, nɛ NWA zila wenɔ kɛ wa tɔ̃a ni. Nɛ a ba nu a na, wele kɔmɔ li wa kɔ 'buku. Nɛ wi ni kɔma li winɔ vɛ̃ kɛ wa dɛ kili NWA, nɛ wa dɔnggɔ a dɔngga ni. 17Nɛ NWA ngɔ mɔ nyanga nza vɛ̃ tɔ̃ na: “Do ngba soe mi hɔ sɛ nɛ ni, mi be sɛ ngawi 'da mi, nɛ winɔ gɛ, wa sɛ a owinɔ 'da mi ngboo. Nɛ mi be sɛ dia zã hã wa, ɔ nɛ kɛ baa be be do dia zã hã bulu be 'da a, kɛ a zele we nu a zila ni. 18Do ngba soe ni, nɛ nɛ zɔ sɛ na, ode winɔ do o'dã winɔ wa wè kɔ̃ gɔ. Nɛ nɛ zɔ sɛ 'bɔ na, winɔ kɛ wa dɛ mbula 'da mi Gale, do wanɔ kɛ wa dɛ́ mbulanɔ 'da mi gɔ ni, wa wè kɔ̃ gɔ.
19“Mi NWA ngɔ mɔ nyanga nza vɛ̃, mi tɔ̃a na: Mbe ngba soe kpo, nɛ nɔ̃lɔ̃ zã 'da mi, ma nyɛ sɛ ɔ nɛ gba nyɛa we ni, nɛ ma bɛlɛ sɛ owi gã zunɔ do owi dɛ 'dã mɛnɔ nɛ́ zɔ̃ ni. Nɛ mɔ kpo 'báná sɛ olo wa gɔ. 20Nɛ nde nɛ, kɛ nɛ dɔnggɔ mi dɔngga ni, nɛ zélé mbuli kɛ mi kpua gɛ. Bɔlɔ zu 'da mi ma be sɛ tɛ̃ ɛ ɔ nɛ gba wese ni, nɛ ma kpasa sɛ nɛ. Nɛ dɛ sɛ yangga, nɛ nɛ bũlũ sɛ dɛ ngɔ, ɔ nɛ obe dua kɔ ba'de, kɛ wele fĩ nu wa na wa hɔ nza ni. 21Do ngba soe kɛ mi be sɛ ngawi 'da mi ni, nɛ nɛ ma sɛ o'dã winɔ ti nyanga nɛ ɔ nɛ fumbɛlɛ ni. Mi NWA ngɔ mɔ nyanga nza vɛ̃, mi tɔ̃a ní.”
Elia a kpolo sɛ tɛ̃ a
22NWA tɔ̃a na: “Nɛ lénggé do wenɔ kɛ wi dɛa toe 'da mi Mɔizɛ bia zi hã nɛ ni, nɛ nɛ dɛ́ mbulanɔ kɛ mi hã zi ma hã a tɛ ngɔ kala Horɛbɛ we nɛ, obe Israɛlɛ vɛ̃ ni.
23“Nɛ ĩ́ na, kɔ̃ tũi kɛ mi NWA, mi hɔ sɛ nɛ ni, mɛ sɛ a tũ kɛ ma hã sɛ gã kili hã owinɔ wena. Nɛ dati kɛ na kɔ̃ tũi ni ma we ni, mi tombo sɛ wi gba olo nu mi Elia. 24Nɛ a hɔ sɛ, nɛ a 'dafa sɛ sanga obaa be do benɔ 'da wa. A dɛ sɛ ni na, da dɛ kɔ mi tɛ́ hã mi 'danga le 'da nɛ gɔ.”
Currently Selected:
MALAKI 3: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.