Ndo Nyanga Dɛ Mɔ 3
3
Wi wili do wuke 'da a wa bɛ̃a we nu Gale
1Zɛ dati, gɔ nɛa ngɔ osa'denɔ vɛ kɛ NWA Gale dɛa wa zamɔ gɛ ni do 'dã hã. Nɛ mbe 'da fala kpo, nɛ gɔ aka wuke na: “Gale bɛ̃a na, nɛ tɛ nyɔ̀ngɔ̀ wala tenɔ kɔ fɔ gɛ gɔ gbãlã we nde?”
2Nɛ wuke gese na: “Gɔ! Lɛ wia we nyɔngɔ owala tenɔ kɔ fɔ gɛ. 3Nɛ nde we duzu wala te kɛ dɛ gbogbo fɔɛ ni, Gale tɔa na, lɛ tɛ nyɔngɔ ma gɔ, nɛ lɛ tɛ 'bè 'bɔ tɛ nɛ gɔ. We kɛ lɛ nyɔngɔ ma, nɛ lɛ fe sɛ.”
4Nɛ gɔɛ gese na: “Nɛ fé sɛ gɔ. 5Gale tɔa ní, we kɛ a ĩ de wena na, fala kɛ nɛ nyɔngɔ ma nde, nɛ nɛ ɔ sɛ nɛ ɛ Gale ni. Li nɛ ma hũi sɛ, nɛ nɛ ĩ sɛ ti gɔnɔ sanga de mɔ do 'dã mɔ.”
6Nɛ wuke soko wala te ni, nɛ nde ma de li a wena. Nɛ a zɔ 'bɔ na, ma wia tɛ ɛfɛ nu wi wena, nɛ a kpa wɔ nyɔngɔ ma, takɔ a kpa hã zã. A 'bi wala te, nɛ a nyɔngɔ, nɛ a hã mbe hã wili a kɛ wa zi do a ni, nɛ a nyɔngɔ tɛ mɛ 'bɔ. 7Wa nɛa we nyɔngɔ ma do'do, nɛ li wa hũi do ti, nɛ wa zɔ tɛ wa na, lo do wila tɛ lo iko. Nɛ wa kala nwá te figɛ, nɛ wa fulu ma dɛ tɛ ngbɛ ɛ, nɛ wa he'de ma dɛ 'dɛ tili wa ɔ nɛ tulu ni.
8Wese gɛ̃a, nɛ NWA Gale ma ngɔ yɛnggɛ kɔ fɔɛ, nɛ wi wili do wuke 'da a wa zila giti nyanga a, nɛ wa usu tɛ wa dɛ sanga otenɔ na, da dɛ kɔ Gale zɔ́ lo gɔ. 9NWA Gale sa mɔ hã wi wili, nɛ a aka a na: “Mɔ a i do nde?”
10Nɛ wi wili gese na: “Mi zila giti nyanga mɔ kɔ fɔ i, nɛ mi dɛa kili, nɛ mi usu tɛ mi we kɛ mi do wila tɛ mi iko.”
11Nɛ NWA Gale aka a na: “Wi tɔa hã mɔ na, mɔ do wila tɛ mɔ iko ni, wi a wio nde? Mɔ nyɔngɔ tabi wala te kɛ mi tɔa zi hã mɔ na, mɔ tɛ nyɔngɔ gɔ ni nde?”
12Nɛ wi wili gese na: “Wi a wuke kɛ mɔ hã a hã mi gɛ, a a hã wala te hã mi, nɛ mi nyɔngɔ.”
13Nɛ NWA Gale aka wuke na: “Gulu kɛ mɔ dɛa ni we ge nde?”
Nɛ wuke gese na: “Gɔ ɔlɔ mi, ma hã mi nyɔngɔ wala te ni.”
14Nɛ NWA Gale tɔ̃ hã gɔ na: “We duzu kɛ mɔ dɛa ní ni, mi kana nu mi tɛ mɔ, nɛ mi fɔmbɔ mɔ sanga osa'denɔ nù gɛ vɛ. Mɔ fo'bo sɛ nù do ngu'du mɔ, nɛ li dungu nza 'da mɔ vɛ, nù ma le sɛ kɔ nu mɔ, nɛ mɔ nyɔngɔ sɛ ma. 15Mi fi sɛ sɛnɛmɔ sanga mɔ do wuko, sanga obe zã mɔ do obe zã a, nɛ obe zã a wa ma sɛ zu mɔ, nɛ mɔ nyɔngɔ sɛ tɛ mɛ 'bɔ timili nyanga wa.”
16Nɛ NWA Gale tɔ̃ tɛ mɛ 'bɔ hã wuke na: “Mɔ zɔ sɛ ngamɔ 'da fala zã 'da mɔ, nɛ tɛ mɔ ma zɛlɛ sɛ 'da fala ko obenɔ 'da mɔ wena. Gɛnɛ kɔ na mɛ ni, nɛ nde wɔ tɛ wili mɔ ma gã sɛ li sila mɔ wena, nɛ a sɛ a nwa ngɔ mɔ fai.”
17Nɛ a tɔ̃ hã wi wili na: “Mɔ zila we nu wuke 'da mɔ, nɛ mɔ nyɔngɔ wala te kɛ mi bɛ̃a na, mɔ tɛ nyɔngɔ gɔ ni. We duzu 'dã mɛ mɔ dɛa ni, mi kana nu mi tɛ nùi. Nɛ li dungu nza 'da mɔ vɛ, mɔ dɛ sɛ to nganda wena, nɛ tɛ mɔ zɛlɛ, sɛ nɛ mɔ kpa nyɔngɔmɔ ngɔ nùi gɛ de. 18Nùi ma ko sɛ otɛ̃ do ohɛlɛ hã mɔ, nɛ mɔ fa sɛ nwá Sanggo li fɔnɔ, sɛ nɛ mɔ nyɔngɔ de. 19Mɔ mĩlĩ sɛ gbɛngɛmɔ, sɛ nɛ mɔ kpa nyɔngɔmɔ li fɔnɔ 'da mɔ de. Mɔ dɛ sɛ ni gbaa nɛ mɔ fe do ma, nɛ wɔlɔ mɔ ma kpolo sɛ tɛ ɛ dɛ tɛ nùi kɛ mɔ yula tɛ nɛ ni. We kɛ mi dɛa mɔ do nù, nɛ mɔ kifi sɛ 'bɔ nù.”
20Nɛ wi wili kɛ li a a Adamu #3.20 Gulu li Adamu na: “Wele.” ni, a ia li wuke 'da a na Eva. Gulu nɛ na: “Kpasi”, we kɛ a a naa owinɔ ngɔ nù gɛ vɛ. 21Nɛ NWA Gale ba ndala sa'de, nɛ a fulu ma do tulu hã wi wili do wuke, nɛ a he'de ma dɛ tɛ wa.
NWA Gale ndaka Adamu do Eva kɔ fɔ Edɛnɛ
22Nɛ NWA Gale tɔ̃ na: “Di ngangga ni, wele a hɔa ɔ nɛ lɛ, nɛ a ĩ ti gɔnɔ sanga de mɔ do 'dã mɔ ia. Kɔ ma wè na, a 'bi 'bɔ wala te kɛ ma hã kpasi ni, kɔ a nyɔngɔ, hã a 'bana do kpasi fai gɔ.”
23Nɛ NWA Gale ndaka wele kɔ fɔ Edɛnɛ dɛ nza, takɔ a wa fɔ ngɔ nùi kɛ wa 'bua zi do a ni. 24A ndaka a ni do'do, nɛ a a oanzɛnɔ, kɛ li wa a okerubinɛ ni, tɛ nu fɔ Edɛnɛ. Nɛ wa 'bia tɔ̃a nu kɔya kɛ li ma nyɛ vɛ vɛ nɛ we, nɛ nu nɛ siki si falanɔ vɛ ni dɛ kɔ wa. Gale a wa dɛ di ni, takɔ wa zɔ mɔ tɛ wala kɛ ma la dɛ tɛ te kpasi ni na, da dɛ kɔ wele hɔ́ i mɔ gɔ.
Currently Selected:
Ndo Nyanga Dɛ Mɔ 3: NGB
Highlight
Share
Copy
Want to have your highlights saved across all your devices? Sign up or sign in
Ngbaka DC Bible (We Nu Gale) Version © Bible Society of the Democratic Republic of Congo, 1995.