Matayi Diumvuija
Diumvuija
Dilondangana dia malu mu mukanda wa Matayi ndifuanangane ne dia mu mukanda wa Marke:
— Malu adi Yowanane-Batiste wambila bantu (3.1-12).
— Badi batua Yezu mu mayi. Diabolu udi umuteta (3.13—4.11).
— Mu Ngalileya, Yezu udi ulongesha bantu, ujikija masama abu (4.12—18.35).
— Pashishe Yezu udi uya mu Yerushalayime (19-20).
— Udi ushalamu amu lumingu lumue: badi bamufundila lufu, bamushipa. Kadi bualu bua dikema: udi ubika ku lufu, umuenekela balongi bende (21-28).
Kadi mudi kabidi dishilangana ne mukanda wa Marke. Bualu Matayi udi utuadija mukanda wende ne malu a bankambua ba Yezu, diledibua diende, ne amue malu a ku buana buende (1-2).
Mu bitupa bibidi bia kumpala ebi, Matayi ukadi utuleja mu tshikosu, malu onsu adiye utumvuija mu mukanda wende mujima: Yezu udi Mukalenga, Musungidi uvua Mvidi Mukulu mutulaye; kadi udi kabidi “Emanuwele” (Mvidi Mukulu udi netu); kudiye Yeye ke kudi Mvidi Mukulu ukumbajila bivuaye mutulaye kale.
Matayi udi usangisha kabidi malongesha mavule a Yezu mu mayuki manene atanu: 1. Tshit. 5 too ne ku tshit. 7: “Dilongesha dia pa mukuna:” Yezu udi umvuija bimpe tshidi bantu badi basue kubuela mu “Bukalenga bua mu diulu” ne bua kuenza panu. 2. Tshit. 10: Yezu udi uleja mudi bantu mua kumanyisha bakuabu difika dia Bukalenga ebu. 3. Tshit. 13: mu nsumuinu 7, Yezu udi utumvuija mudi Bukalenga ebu: lelu butshidi busokome, kadi dikuabu dituku nebudileje ne lumu. 4. Tshit. 18: Yezu udi utulongesha mutudi mua kusomba mu Bukalenga ebu bu bantu bamue, badi banangangana. 5. Tshit. 24 ne tshit. 25: Yezu udi utuleja mudi malu onsu dituku dikuabu ne bua kushila Bukalenga ebu muaba.
Mu mukanda wa Matayi, Yezu udi udileja bu Mfumu ne Mulongeshi, udi ufika bua kutuadija ne bantu Bukalenga bupiabupia. Badi babuela mu Bukalenga ebu, Yezu udi ubamanyisha kabidi bidibu ne bua kuenza, bua bamone mua kujadikila bakuabu bulenga bua Bukalenga ebu.
Currently Selected:
Matayi Diumvuija: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996