Matayi 4

Diabolu udi uteta Yezu

(Mar 1.12-13; Luk 4.1-13)

1Pashishe Mueyelu wa tshijila kufikisha Yezu mu tshipela, bua bamutetemu kudi diabolu. 2Yezu mumane kupitshisha matuku makumi anayi a munya ne butuku kayi udia, kushishaye kumvua nzala. 3Diabolu kusemena kudiye, umuambila ne:

— Pawikala#4.3 Pawikala: badi mua kuandamuna kabidi ne: Bu muudi (mu kan. 6 kabidi). Muana wa Mvidi Mukulu, ambile mabue aa andamuke mampa.

4Yezu kuandamuna ne:

— Mukanda wa tshijila udi wamba ne: “Muntu kena ne muoyi anu bua mampa nkayawu, kadi nangananga bua diyi dionsu didi Mvidi Mukulu wamba.#4.4 Diel 8.3.”

5Nanku diabolu kufikisha Yezu mu Yerushalayime, tshimenga tshia tshijila, kumuteka ku musonga wa nzubu wa Mvidi Mukulu, 6umuambila ne:

— Pawikala Muana wa Mvidi Mukulu, diela panshi; bualu Mukanda wa tshijila udi wamba ne:

“Mvidi Mukulu neambile batumibue bende,

bakuambule mu bianza biabu,

bua kututshi dikasa diebe ku dibue.#4.6 Mis 91.11-12.

7Yezu kumuandamuna ne:

— Mukanda wa tshijila udi wamba kabidi ne: “Kutetshi Maweja-Nangila Mvidi Mukulu webe to.#4.7 Diel 6.16.”

8Diabolu kufikisha Yezu kabidi pa mukuna mule mutumbuke, kumuleja makalenga onsu a pa buloba ne buneme buawu, 9umuambila ne:

— Nenkupe bionsu ebi, anu pawikala muntuile binu bua kunkukuila.

10Kadi Yezu kumuandamuna ne:

— Diabolu, umbuka! Bualu Mukanda wa tshijila udi wamba ne: “Kukuila Maweja-Nangila Mvidi Mukulu webe. Umuenzele amu Yeye nkayende mudimu.#4.10 Diel 6.13.”

11Diba adi diabolu kumushiya. Batumibue ba Mvidi Mukulu kufika kudi Yezu, kumuenzela mudimu.

Yezu udi utuadija mudimu wende mu Ngalileya

(Mar 1.14-15; Luk 4.14-15)

12Yezu umvua ne: mbele Yowanane mu nzubu wa lukanu,#4.12 mbele Yowanane mu nzubu wa lukanu: ke Yowanane-Batiste. Tangilayi Mat 14.3. kumukaye bua kuya mu Ngalileya. 13Kadi kavua mushale mu Nazarete to. Kuyaye kusomba mu Kefamawume, tshimenga tshiyuabu base ku muelelu wa Dijiba dinene dia Ngalileya, mubuloba bua Zebulone ne bua Naftali.#4.13 Zebulone ne bua Naftali: ke bisamba bibidi bia bena Izrayele bivua bisomba ku mutu mu ditunga. 14Bionsu ebi bivua bienzeka bua kukumbaja bivua muambi Yeshaya mumanyishe bantu ne:

15“Wewe, buloba bua Zebulone, wewe, buloba bua Naftali,

maloba adi dishiya dia Yardene,

mu njila wa ku Dijiba dinene,

wewe, Ngalileya, muaba udi bantu benyi base!

16Bantu badi basomba mu midima

nebamone butooke bunene!

Bantu badi basomba mu ditunga dia lufu mu midima,

butooke nebubakenkele!#4.16 Yesh 8.23-9.1.”

17Biangatshile tshikondu atshi, Yezu kutuadija kulongesha bantu, wamba ne: — Kudimunayi mioyi yenu,#4.17 Kudimunayi mioyi yenu: badi mua kuandamuna kabidi ne: lekelayi mibi yenu, nudilengeje. bualu Bukalenga bua mu diulu bukadi pabuipi.

Yezu udi ubikila balobi ba mishipa banayi

(Mar 1.16-20; Luk 5.1-11)

18Pavua Yezu wendakana ku muelelu wa Dijiba dinene dia Ngalileya, kumonaye balobi babidi, bana ba muntu umue. Umue uvua Simone, uvuabu binyika kabidi ne: Petro, mukuabu uvua Andre. Bavua baloba mu dijiba ne bukondu buabu. 19Yezu kubambila ne:

— Ndondayi, nennuenze balobi ba bantu.

20Diakamue kushiyabu makondu abu, kuyabu nende.

21Yezu mumane kuenda mutantshi, kumonaye kabidi bana bakuabu babidi ba muntu umue, Yakobe ne Yowanane, bana ba Zebede. Bavua ne tatuabu Zebede mu buatu, balongolola makondu abu. Yezu kubabikila. 22Diakamue kushiyabu buatu, kabidi ne tatuabu, kuyabu ne Yezu.

23Yezu uvua wendakana mu ditunga dia Ngalileya dijima. Uvua ulongesha mu nzubu ya kutendelela, wambila bantu Lumu lua Disanka lua Bukalenga. Uvua ujikija kabidi masama ne matekete onsu avua bantu nawu. 24Mu ditunga dijima dia Siriya, kutuadijabu kuyukidilangana bualu bua Yezu. Bavua bafika kudiye ne bantu bonsu bavua kabayi bumvue bimpe, bikale ne masama ne ntatu bishilangane. Munkatshi muabu muvua bavuabu bakuate kudi diabolu, bena tshiseke,#4.24 tshiseke: ke bantu badi bafua tshiseke, bapatuka tshiseke. ne bena tuneke. Yezu uvua ujikija masama abu onsu. 25Bantu ba bungi bavua balonda Yezu, batumine ku Ngalileya, ku buloba bua Bimenga Dikumi, ku Yerushalayime, ku Yudeya, ne ku buloba budi dishiya dia Yardene.

Currently Selected:

Matayi 4: TSH96

Highlight

Copy