Tshimuangi 13

Mikenji mikuabu ya tshibilu tshia Dipita dia Maweja-Nangila

1Maweja-Nangila kuambila Moshe ne:

2— Muanabute yonsu wa balume wa bena Izrayele, udi mukaji ulela, nansha wa tshimuna, umujidile, ashale wanyi.#13.2 Tangila Dib 3.13; Luk 2.23.

3Moshe kuambila bena Izrayele ne:

— Nuvuluke dituku edi. Kanudi mampa adibu bela buanga to. Bualu ke dituku divua Maweja-Nangila muleje bukole buende, munupatule ku bupika mu Ejipitu. 4Nuvua bapatuke lelu, mu ngondu ewu wa Abibe.#13.4 Tangila diumvuija dia matuku a ngondu. 5Panuafika mu ditunga dia bena Kenaane, bena Iti, bena Amore, bena Ivi ne bena Yebusa, divua Maweja-Nangila mulaye bankambua benu, ditunga didi ne biakudia bipite bungi,#13.5 Tangila 3.8 ne diumvuija. nuikale nuenza tshibilu etshi, ku tshidimu ku tshidimu, mu ngondu wa Abibe. 6Matuku malondangane muanda mutekete, nudie anu mampa adi kaayi mela buanga. Dituku dia muanda mutekete, nuenzele Maweja-Nangila tshibilu bua kumutendelela. 7Matuku muanda mutekete awu, nudie anu mampa adi kaayi mela buanga. Kanulami kabidi mampa mela buanga, nansha buanga bua mampa mene, mu ditunga dienu dijima. 8Pa kuenza tshibilu etshi, mmianyishe bana benu ba balume ne: Tudi tuenza nunku, bua kuvuluka muvua Maweja-Nangila mutupatule mu Ejipitu. 9Tshibilu etshi netshikale bu tshimanyinu ku diboku nansha pa mpala yenu, bua kunuvuluija dipatuka dienu mu Ejipitu. Nanku, netshinuvuluije munudi ne bua kumanyisha bantu mikenji ya Maweja-Nangila, uvua munupatule mu ditunga dia Ejipitu. 10Tshibilu etshi, nutshienze ku tshidimu tshionsu, dituku diatshi.

11Moshe kuamba kabidi ne:

— Pikala Maweja-Nangila munufikishe mu ditunga dia bena Kenaane, divuaye munulaye nuenu ne bankambua benu, 12nujidile muanabute yonsu wa muntu nansha wa tshimuna, bua ashale wa Maweja-Nangila. 13Kadi muanabute wa balume wa nyama wa mpunde, numupikule ku muana wa mukoku. Panuikala kanuyi mua kumupikula, numushipe nukoyobole nshingu. Nupikule kabidi muanabute yonsu wa balume wa muntu.#13.13 nyama wa mpunde: ke nyama uvua ne mikiya. Nanku kabavua bamulambula to. — Kupikula muanabute: tangila Dib 18.16. 14Dituku dikuabu pikala bana benu banukonka tshinudi nuenzela nanku, nubambile ne: “Tudi tuvuluka bukole bua Maweja-Nangila, uvua mutupatule ku bupika mu Ejipitu. 15Bu muvua mukalenga wa bena Ejipitu ubenga mua kutulekela, Maweja-Nangila uvua mushipe bamuanabute bonsu ba mu ditunga dia Ejipitu, ba bantu ne ba bimuna. Ke patudi tushipela Maweja-Nangila bamuanabute ba bimuna. Kadi tudi tupikula bamuanabute ba balume ba bantu.” 16Nanku, milambu eyi neinuvuluije bualu ebu, bu mudi tshimanyinu ku diboku nansha pa mpala. Neinuvuluije muvua Maweja-Nangila munupatule mu ditunga dia Ejipitu ku bukole buende.

Mvidi Mukulu udi ulombola bantu bende

17Mukalenga wa bena Ejipitu mumane kulekela bena Izrayele, Mvidi Mukulu kena mubaleje njila wa tshikosu wa mu ditunga dia Peleshete to.#13.17 Njila ewu wa ku mayi manene, bena mvita ba bena Ejipitu bavua bamulame. — Bena Peleshete: tangila Tshib 26.1 ne diumvuija. Bualu Mvidi Mukulu uvua mumanye ne: pikale mvita mijuke, nebatshine, bapingane kabidi mu Ejipitu. 18Nanku, Mvidi Mukulu kunyungulula bena Izrayele. Kulondabu njila wa mu tshipela bua kuya luseke ludi Mayi manene makunze. Bena Izrayele kupatuka mu Ejipitu, balondangane mu bisamba biabu.#13.18 balondangane: nansha ne bia mvita biabu bionso. 19Moshe kuambula mifuba ya Yozefe. Bualu Yozefe uvua mutshipeshe bana babu, mubalombe ne: “Pikala Mvidi Mukulu munupikule, nujule mifuba yanyi muaba ewu, nuye nayi.#13.19 Tangila Tshib 50.25; Yosh 24.32.”

20Bena Izrayele bumuke ku Sukote, kuasabu mitanda yabu mu Etame#13.20 Sukote: tangila 12.37 ne diumvuija. — Etame: kabena bamanye muaba ewu to. ku muelelu wa tshipela. 21Mu munya, Mvidi Mukulu uvua mu divuba#13.21 divuba: tangila 19.9; Lev 16.2, 13. kumpala kua bena Izrayele bua kubaleja njila. Kadi butuku uvua mu tshimunyi tshia kapia bua kutokeshila bena Izrayele njila. Ke muvuabu mua kuenda butuku ne munya. 22Nanku, divuba divua kumpala kua bena Izrayele mu munya, ne tshimunyi tshia kapia tshivua kumpala kuabu butuku. Kabivua biumuka kumpala kuabu to. Bivua anu Ubalombola diba dionsu.

Currently Selected:

Tshimuangi 13: TSH96

Highlight

Copy

Compare