Malu Menza 6
6
Badi basungula bantu muanda mutekete bua bambuluishe bapostolu
1Matuku makese apita, bu muvua bungi bua balongi buvulangana, bena Yuda bavua bakula tshiena ngreke, kujana bena Yuda ba mu ditunga. Bavua bamba ne: bena ditunga badi balengulula bakamba betu, padibu bababanyina biakudia ku dituku ku dituku.#6.1 padibu bababanyina biakudia: badi mua kuandamuna kabidi ne: padibu bababanyina makuta. 2Nanku bapostolu dikumi ne babidi kusangisha balongi bonsu, kubambila ne:
— Katuena mua kulekela kulongesha muaku wa Mvidi Mukulu, bua kubuelakana ne malu a didia to.#6.2 malu a didia: badi mua kuandamuna kabidi ne: malu a bulongolodi bua bintu (fuanyikija ne 6.1 ne diumvuija). 3Nenku bana betu, sungulayi munkatshi muenu bantu ba lumu luimpe muanda mutekete, badi buwule ne Mueyelu wa Tshijila, kabidi ne meji. Netubateke ku mudimu ewu. 4Tuetu netutungunuke ne mudimu wetu wa kutendelela Mvidi Mukulu, ne wa kulongesha muaku wende.
5Bantu bonsu kuanyisha bivua bapostolu bambe. Kusungulabu Stefane, muntu wa ditaba divule, muwule kabidi ne Mueyelu wa Tshijila, pamue ne Filipe, Prokore, Nikanore, Timona, Parmenase, ne Nikola, muena Antiyokiya, uvua mubuele mu tshisumbu tshia bena Yuda kukavua matuku. 6Pashishe kubalejabu kudi bapostolu. Abu kutendelela Mvidi Mukulu, kubatenteka bianza.
7Muaku wa Mvidi Mukulu kutanta bikole. Balongi kuelangana mu Yerushalayime. Batuangaji ba bungi#6.7 Bantu bavua mu bisumbu bishilangane bia batuangaji ba bena Yuda mu Yerushalayime bavua mua kuikala bu 8.000. bavua batuadija kuitaba.
Badi bakuata Stefane
8Mvidi Mukulu uvua muele Stefane lupemba. Kupetaye bukole bua kuenza bishima ne malu a dikema munkatshi mua bantu. 9Bantu bakuabu ba mu nzubu wa kutendelela wa bena Yuda, uvuabu binyika ne: “Ngwa Bapikula,#6.9 Bantu bavua basangile mu nzubu wa kutendelela wa “Bapikula”, ke bantu ba ku ndelanganyi ya bapika, bavua Pompeya, mulombodi munene wa basolayi ba bena Rome, mubueje mu ditunga dia bena Yuda mu tshidimu tshia 63 bgbg ne Y.K. Bavua babapikula panyima pa matuku.” kudiwula Stefane. Bantu abu bavua bena Yuda ba mu musoku wa Sirene, ne ba mu tshimenga tshia Aleksandriya, kabidi ba mu buloba bua Silisiya ne Aziya. Kuelanganabu mpata ne Stefane. 10Kadi kabavua ne bukole bua kumutuisha. Bualu Stefane uvua wakula ne meji, avuaye mupete kudi Mueyelu wa Tshijila. 11Kubuejilabu bantu, bua bamusonguele ne: “Tudi bamumvue usendeka Moshe, ne Mvidi Mukulu#6.11 Fuanyikija ne Mat 26.59-61; Mar 14.55-58. mene!” 12Ke pavuabu basonsola bakulu, ne balongeshi ba mikenji, ne bantu bakuabu. Kuyabu kudi Stefane, kumukuata, kuya nende ku Tshipangu tshikulu. 13Kubilabu kabidi bantu bavua bamushiminyina malu, bamba ne:
— Muntu ewu udi amu usendeka nzubu wetu wa tshijila, ne mikenji ya Moshe! 14Tudi bamumvue wamba ne: “Yezu wa mu Nazarete awu neupule nzubu wa Mvidi Mukulu; neakudimune kabidi bibidilu bivua Moshe mutushile!”
15Bantu bonsu bavua basombe mu nzubu wa Tshipangu bavua batangile Stefane talalaa. Bavua bamone mpala wende umueneka bu wa mutumibue wa Mvidi Mukulu.
Currently Selected:
Malu Menza 6: TSH96
Highlight
Share
Copy
Want to have your highlights saved across all your devices? Sign up or sign in
Bible avec Livres Deutérocanoniques en Tshiluba © Société Biblique de la R. D. Congo, 1996
