Ba-Loma 3
3
Banto bauma baokwa nda joso ja Nzakomba
1La ngoko Bo-Yuda ale na? Ko nkito eʼetenelo ea nsonge ele na? 2Bouke nda bilenge la bilenge. Joi ja joso wete besise bia Nzakomba bekaemaki elʼiyo. 3Ngoso ngamo? Nkina bamo bakiyo ntabaki lʼimeezo mo! Mpanga bosamba bokiyo wʼimeezo bofofya nsosolo ea Nzakomba nde? 4Ngoko o nye! Lolo kela Nzakomba ayale owa nsosolo mpeka la wengiʼanto bale bafombi, nkʼelenge ekotama, Kela oyengwa nda bitefelo bike, Ko olonge ekosambelʼiyo bakambo bake. 5Lolo ayaka bosamba bokiso wa liongi boleneya liongi ja Nzakomba mpa totefele ngamo? La Nzakomba asamba liongi enjiezʼende nkele? (Ntefela ndʼelenge eʼonto.) 6Ngoko nye! Nkina ele ngoko, Nzakomba atena bakambo bʼokili ngamo? 7Lolo nga nsosolo ea Nzakomba efula lʼelonga nkʼele lokumo lokae ndʼewelʼea bampulu bakami, ndumbama lenkina ngʼokeli owʼobe lae? 8Ko ntatokelakʼobe, kela bolotsi wiele limʼoko lae? Elenge etofatsʼantʼamo, esangʼiyo wete iso totefela ngoko--umbelo ekiyo eji o njelama.
Bantʼauma baolumbama nda joso ja Nzakomba
9O isʼokela na? La iso, Ba-Yuda, tolekola nde? Afa ngoko nye. Ele tosilʼoaka wete bantʼaumaka, la Ba-Yuda la Ba-Elene, bale bakeli bʼobe. 10Nkʼelenge ekotama,
Bontʼowa liongi afʼeko, nko lʼomoko nye.
11Nkʼontʼokotala, nkʼomo ondasa Nzakomba.
12Iyʼauma baoleta lima mboka, ko baolungusana,
Nkʼomo oyekelʼolotsi, nko lʼomoko nye.
13Bongongo bokiyo bole boomba boyokombwa,
Iyo bongʼanto jongo la ndeum ikiyo,
Ngenge ea njwa ele ndʼase ba mbebu ikiyo.
14Bomwa bokiyo boyola la bitoi lʼaoyi bʼololo.
15Bakakʼakiyo bale la loango nda nduteza eʼalongo.
16Lofito lʼelo bale nda mboka ekiyo,
17Ko mboka ea kuci, iyo bafea nye.
18Boangi wa Nzakomba bofa nda joso jʼaisoʼakiyo.
19Lolo tea wae baoyiʼaso batefelʼEsekyelo, bayotefelama ele banto bale nda mpifo eʼEsekyelo, kela wengi bomwa boumbame, ko bokili bouma bokite ndʼumbelo ea Nzakomba. 20Ndʼewelʼeko lakʼonto oyengwa boyengo nda joso likande lʼelemo biʼEsekyelo. Ele bobe weana lʼEsekyelo.
Liongi liatema lʼimeezo ele Yesu, afa lʼEsekyelo
21Lolo aeyoko liongi ja Nzakomba jolenya lako Esekyelo, mpeka lʼEsekyelo la bateli basanga liongi liko; 22lile wete liongi ja Nzakomba liatema lʼimeezo ele Yesu Masiya, ko lile jʼantʼauma bandimezʼende. Ele ecikwanelo efʼeko. 23Ele bantʼauma baokelʼobe, ko bakutswa jilangi ja Nzakomba, 24ko bayengwa boyengo la nganji eʼoya bokande lʼesikwelo elʼele Yesu Masiya. 25Endʼoki Nzakomba olekyaka ngole mbeka eʼesikwelo ndʼewelʼeʼimeezo ndʼalongo bakae: ngoso aoleneya liongi likae, ekiʼndʼofenzaka baoyiʼobe bakelamaka nda joso baiso bakae ndʼisei ikae ya loncinji. 26Ko ayeneya liongi likae ndʼekekʼene, elʼende mongo ayale la liongi, ko la boyengoli owa bonto ondimeza Yesu lʼimeezo.
27Ngoso ekumyelo eʼomongo ele nko? Eolozama ndʼanza. Lʼesekyelo ea na? Esekyelo eʼelemo? O nye. Lolo lʼesekyelo eʼimeezo. 28Ele lokai lokemyʼiso wete, bonto ayengwa boyengo lʼimeezo mongo, nko belemo biʼEsekyelo. 29La Nzakomba ale Nzakomba ea Ba-Yuda kika? Afa nde Nzakomba ea Bafaya ngoko? O nde, o lʼea Bafaya ngoko. 30Ele Nzakomba ale nkʼemoko kika, Ende ifoyengola batenama nsonge lʼimeezo ekiyo, ko la batatenama nsonge lʼimeezo ngoko. 31La ngoso tooma Esekyelo lʼimeezo? O nye, lolo toyokemya Esekyelo nkakemya.
La Bible en Lomongo © Societe Biblique de la R.D. Congo 1987